2021年2月21日星期日

阿爺燒鵝餐室 Roast Goose Restaurant:鵝油撈粗

今日約咗朋友行上獅子山,由大圍出發,直接行上「紅梅谷」起步,由於今日嘅拍檔都喺行山好手,所以,一股作氣上到獅頭,比預計嘅時間快。起步前就約埋一齊先食個晏,揀咗「阿爺燒鵝餐室」,因為老友推介佢哋嘅鵝油撈麵。

2021年2月20日星期六

東叔叔雞蛋仔:最緊要新鮮

前文提要吓,同老婆晌牛頭角嘅「break」食完晏,再沿觀塘海濱走廊漫步,過到嚟觀塘,再逛逛廠廈買吓嘢。經過「駱駝漆大廈」呢邊,晌閘門口角落見到間小店賣雞蛋仔,堆滿人幫襯,又聞到陣陣雞蛋仔香氣,過吓口癮就買咗包「止癮」。

break:從容不「Break」嘆午餐

雖然限聚方面放寬咗,但都怕啲人一窩蜂湧晒出嚟,平常星期六嘅節目都喺行山多,但今回就同老婆改行海濱。我哋算叫西九龍人,所以,東九龍呢邊甚少過嚟,因為我哋入元朗、屯門仲快過過嚟九龍灣、觀塘。故此,今日就打算先晌牛頭角一帶食晏,再漫步觀塘海濱走廊,再逛觀塘廠廈買吓嘢。牛頭角近海皮一帶近年有唔少新商廈陸續落成,之前就幫襯過「Tapa Room」、「Lagom Kaffe」,今次又搵到間秘點「Break」!

2021年2月10日星期三

Hunger Point:「墨」有所值

墨西哥嘢小弟都鍾意食,因為都幾夠特色,不過,就好少刻意去搵。晌上環返工嘅老友告之,晌歌賦街近尾新開咗間小店,主打墨西哥美食,都喺開咗兩個月左右,叫我有興趣嘅話可以去試試。所以,今次專誠走訪一下。

2021年2月9日星期二

蜜滋麻美 Mizimamei:「滋」足常樂

雖然本身都鍾意飲啲台式茶飲,尤其珍珠鮮奶茶、花果茶,但就真喺好少專登去幫襯啲茶飲專門店,大多數都喺堂食開就飲番杯。今次仲專登走到晌大斜路之上嘅「蜜滋麻美」,都喺朋友超極力推介,叫我試試呢間台中過江龍。

2021年1月31日星期日

Delifrance:周日小「素」求

噚日同啲單車友行山,今日輪到陪老婆行一轉短嘅,其實,都喺由美孚兜上去馬騮山,再兜返落嚟。不過,上山前就先過嚟荔枝角嘅Delifrance食晏,再改由荔枝角起步行上饒宗頤,兜過去馬騮山。點解隔個地鐵站過到嚟Delifrance食嘢,咪就喺晌啲報紙剪咗啲$50優惠券囉。

2021年1月30日星期六

美景茶餐廳 Mei King Restaurant:菠蘿油新「景」界

因為老婆是個星期六早、午有兩個網上研討,小弟就成為無所事事自人,啱啱好遇着一班單車友唔踩車,改為行山,啱晒啦!是次行程由大埔梧桐寨出發,2.5小時一直梯級上到大帽山,都幾喺嘢,再行返出荃錦公路,搭返巴士落荃灣完結,頭頭尾尾連埋休息、食嘢,都行咗5.5個鐘。行咗咁長途,仲要喺一班麻甩佬,點都要搵個合適點攤抖吓,其中一位老友喺荃灣返工,就帶我哋嚟到「美景」嘆下午茶。

2021年1月23日星期六

沙嗲軒 Satay Inn:Staycation之「星馬風情」

為慶祝結婚周年,又因疫情無得去旅行,就專登揀咗遠離市區又有渡假環境嘅「黃金海岸酒店」住番晚加飲飲食食,買咗個「悠然下午茶住宿計劃」,包雙人豪華海景房、入住當日嘅主題下午茶、翌日嘅雙人自助早餐。雖然個住宿計劃無包午餐,但今早食完早餐,再去行千島湖,返到嚟啱啱好正午多啲,退完房就順道晌埋酒店內嘅「沙嗲軒」食完午餐先走,一來覺得酒店晌防疫方面做得好,二來食過好幾次「沙嗲軒」(尖沙咀分店)都喺印象良好,三來揀食星馬菜感覺就更添渡假氣氛,故此就梗喺捨遠取近啦。

聆渢咖啡廳 Cafe Lagoon:Staycation之「早安大滿足」

前文就提及到為慶祝結婚周年,又因疫情無得去旅行,就專登揀咗遠離市區又有渡假環境嘅「黃金海岸酒店」住番晚加飲飲食食,買咗個「悠然下午茶住宿計劃」,包雙人豪華海景房、入住當日嘅主題下午茶、翌日嘅雙人自助早餐,全費$980,食完個主題下午茶,住咗一晚豪華海景房,個價真喺抵番晒,仲包埋早餐添。由於喺自助早餐,又唔知多唔多客,加上今早嘅安排喺食完早餐會輕裝行千島湖,所以,策略喺一早落嚟食早餐,避一避人流。

2021年1月22日星期五

聆渢咖啡廳 Cafe Lagoon:Teacation 之「綠茶派對」

疫情關係,無得出外旅遊,為減低感染風險,除與人保持社交距離,仲有就喺減少社交接觸,而大棚朋友嘅活動就自疫情都無搞過,至少都喺三幾個相熟友人約埋行吓山。結婚周年,以往都只喺食吓飯,但今年就叫大搞少少,安排咗人生第一個Staycation,偽旅行一下當慶祝。因為都真喺想有啲旅行嘅感覺,所以,專登揀咗遠離市區又有渡假環境嘅「黃金海岸酒店」,其中悠然下午茶住宿計劃(Tea-cation)最啱我心水,包雙人豪華海景房、入住當日嘅主題下午茶、翌日嘅雙人自助早餐,已包稅金,全費$980,感覺真喺好抵。行程亦都度好晒,第一日,先食個豐富嘅早餐,再去行「河背水塘家樂徑」,晌港版嵐山竹林、小瀑布影吓相,下午到酒店享用精緻嘅下午茶,傍晚再看看日落美景(可惜喺沙灘封晒);翌日,一早落去食完自助早餐後,輕裝上千島湖,之後再返回酒店辦退房,然後食埋個午餐才施施然歸家。

2021年1月16日星期六

珺 Emerald:渾身解「素」

睇見相熟食友嘅食評,大讚呢一家中西合璧嘅新派素食餐廳,故趁周六方便,同老婆過嚟試試,因為佢喺偏素愛好者,而是日天氣又好,暖暖哋加上陽光普照,更可以順道行一行港島區嘅行山徑。「珺」字,究竟讀「君」定「郡」?原來正音喺讀「菌」,查查字典解美玉,而店名英文用了「Emerald」,即綠寶石,未知喺咪配合店名,一排梳化椅都用上綠色;然而,從店名,約略感到其所想帶出的君子雅氣。

2021年1月15日星期五

Ninetys:「九」負盛名

大概兩年半前幫襯過「Ninetys」,嗰時佢應該喺第一間店,開晌灣仔合和斜對面,睇番當時嘅食評,總結喺無論食嘅,飲嘅,都嚐得到高水準嘅出品,加上環境唔錯,招呼又到位,做飲食嘅,永遠都喺要靠食物做得出色先喺長「九」之計。眨吓眼,原來已開到第3間店,仲開咗嚟中環,就晒我啦,可以過嚟食餐晏仔。

2021年1月12日星期二

湕承 · 台式便當 Kinshing TW Food:「承」意便當

代公司過嚟金鐘政府合署辦點事,之後,偶然晌海富中心發現二樓一角有多家外賣小店,其中一家叫「湕承」,主打賣台式便當,一來有啲興趣,二來即時睇睇啲食評,又好似幾OK喎,所以,就順道買咗個便當返去試試。