奇華餅家 Kee Wah Bakery：好友狂嚐曲（86）

晌農曆年，我同啲親戚都仲維持大家族式團拜，即喺多個家庭一大班人聚晌某人屋企嚟聚一聚，共賀新禧。不過，除咗派利是俾啲細路之外，送賀禮已經好少喇，只喺，偶爾會收到一份半份而已。而今年，其中一份收到喺嚟自「奇華餅家」出品嘅「精選迎春禮盒」，以一對錦鯉作為包裝盒嘅設計，明顯喺寓意年年有餘，可謂大方得體。

打開包裝盒，內有7款「零食」，包括：杏仁片朱古力牛油曲奇、小紅莓牛油曲奇、腰果牛油曲奇、椰絲蛋白曲奇、牛油蛋卷、原味蝴蝶酥及咖啡蝴蝶酥，每款都以獨立包裝，以保衛生。

杏仁片朱古力牛油曲奇

禮盒中嘅幾款曲奇，都好啱口味，先分享呢一款以香濃嘅朱古力做牛油曲奇底，再混入薄薄脆脆嘅杏仁片，所以，除咗曲奇本身都脆口之外，咬落啲杏仁片時，又多重脆脆嘅口感。

小紅莓牛油曲奇

跟杏仁片朱古力牛油曲奇好唔同，以簡單嘅牛油曲奇做底，加入好多小紅莓乾，所以，牛油曲奇入口好香、好鬆化，而小紅莓煙煙韌韌，又帶微微酸甜味，予人感覺清新。

腰果牛油曲奇

同樣以牛油曲奇做底，但就加入腰果碎，塊曲奇其實本身都幾好食，腰果亦好脆口，當然，再加多啲腰果碎就更加正啦！

椰絲蛋白曲奇

盒內仲有一款曲奇，屬於唧花曲奇嘅一種，形狀有點似花塔餅，因為成份加入蛋白，所以咬落比較脆身，蛋香就微啲，而加咗椰絲，就多份椰香。

牛油蛋卷

以前都食過「奇華餅家」嘅牛油蛋卷，雖然喺大量製作嘅出品，但質素就無欺場。入口好脆口，又確喺有蛋香，算唔錯！

原味蝴蝶酥

城中有唔少「名店」嘅蝴蝶酥被推為出色之作，其實，「奇華餅家」嘅蝴蝶酥都頗出色，因為做得外形工整，蝴蝶形平均對稱，又烘得金黃，層次清晰。塊塊都既鬆脆，又富牛油香味，而且，仲喺少甜。

咖啡蝴蝶酥

額外加入咗咖啡味，加沾少少沙糖粒，外形依然平均對稱，有質素即喺有質素，口感極之酥脆，又滿滿咖啡香，好食，配茶、配啡都好夾。

「好友狂嚐曲」呢個系列又喺停產咗將近一年，多謝好友嘅送贈，又可以寫番篇，以延續呢個系列嘅食評。

個人評分
味道：9 /10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：

奇華餅家 Kee Wah Bakery
深水埗深旺道28號V Walk 2樓48號舖
2677 2980