另一邊「廚房位」（可隔着玻璃睇到廚房裡面運），化身為和風牌檔模樣，並掛上「天吉屋」大招牌，非常醒目。呢邊屬一人位，所以，就算一時興起，一個人嚟食碗天婦羅丼都唔怕尷尬。
炸物一向討人歡心，夠香口嘛！不過，小弟對天婦羅就唔算好有研究。翻一轉餐牌，如好多日本餐廳，賣嘅嘢唔多，夠專。菜品只有5款，但每款嘅天婦羅都有唔同配搭，定價$108-$158，而貫徹日本人做菜嘅認真，用上秘製天婦羅粉、秘製天丼醬汁、北海道七星米、自家調製柚子胡椒沙律汁。
飲品方面，選擇唔多，只有幾款罐裝飲品，數款日本酒品。不過，唔多選擇都無問題，因為有啲健康嘢提供。
牛蒡茶
一坐低，店員就奉上一大壺自家沖製嘅牛蒡茶，近年都有唔少人興食牛蒡，據網上資料，牛蒡茶有去油膩降血脂嘅效用，夠養生，配天婦羅就啱晒啦。飲落有種獨特嘅香氣，味道回甘順喉，感覺幾舒服。
雖然，菜品無說明喺定食，但其實已包埋味噌汁，免費提供嘅牛蒡漬、蘿蔔漬、椰菜沙律。
牛蒡漬、蘿蔔漬
等候我哋嘅天婦羅丼期間，細味牛蒡漬及蘿蔔漬嚟打發時間就最好不過。前者口感軟軟哋，又爽爽哋，食落仲有種蔘味；後者就酸香清爽，作為食天婦羅嘅間場清一清味蕾就最好不過。
椰菜沙律
可能你會覺得簡單，椰菜絲啫，但條條切得幼細，冰涼爽口而多汁，最精彩喺淋上嘅自家調製柚子胡椒沙律汁，柚子味極之突出，酸酸味，帶微微辣，有層次，有越食越想食之感。店員見你食到差唔多無，好主動問你使唔使再添加。
味噌汁
家家所做嘅味噌汁都有所分別，「天吉屋」嘅絕對喺料多，雖然影相唔覺，但其實湯中有好多清甜嘅蘿蔔、嫩滑嘅豆腐，而湯嘅本身，麵豉味甚濃香，飲得出用料不賴。
天幕御膳 $148
友人就喜歡試多啲嘢，所以，揀嚟第二貴嘅「天幕御膳」，講真，單喺睇相已經好有睇頭，食材豐富，有黑虎蝦、海紅鯛配紫蘇葉、軟殼蟹、什錦炸物（洋蔥及魷魚）、茄子、南瓜、炸紫菜及四季豆；而且，食法更有啲花巧，可以有3種食法，故此，更專登印張食法指引俾大家參考。
成品送到嚟，喺咪有啲震撼呢？友人一邊食，就一邊讚，小弟就唔太詳細講佢覺得點喇，等陣食到我份先慢慢分享。不過，佢就話，啲天婦羅炸得好出色，香而不膩，每款食材都有個性，好好食；去到尾，好似建議咗倒入鰹魚茶湯做茶漬飯，湯中嘅鹹鮮及煙燻香，一湧而出，甚有驚喜。
天吉丼 $118
小弟就揀個無咁貴，但喺獲金獎嘅「天吉丼」，咪睇小佢，一樣喺好豐富，勁多配料，包括黑虎蝦、魷魚、海紅鯛、茄子、南瓜、四季豆、炸紫菜同溫泉蛋，啲天婦羅堆到滿一滿，睇落仲好似餸多過飯咁。
黑虎蝦
如果有留意餐牌面，就發現佢哋嘅天婦羅海老喺孖條「雙蝦」炸法，一口過咬兩件蝦，自不然有份雙倍滿足感，蝦肉鮮甜且爽彈，有濃郁蝦鮮味，而且，炸功了得，唔會感覺一口油。
魷魚
有嚿炸物四四方方咁，初時以為喺豆腐，但咬落軟腍，又帶點煙韌，原來喺魷魚嚟，有口感，幾好食，當然脆漿做得薄，應寄一功。
海紅鯛
可以講喺「炸魚柳」高度版，賣點喺魚肉嘅本質，件海紅鯛肉質嫩滑而味鮮，加上薄薄嘅脆漿，無得輸。
茄子
多數食茄子嘅天婦羅都喺做成一片片，好裝飾，又易入口，但呢度為到做得有睇頭，茄子都喺一大件咁，大啖大啖食得豪邁。
南瓜
平常食天婦羅野菜中，小弟就特別鍾意南瓜，尤其啲日本南瓜，特別粉甜，今次件南瓜大大件，更實在，更食出南瓜原味。至於啲炸四季豆、炸紫菜都好好食。
溫泉蛋
相信食開日本嘢嘅朋友都食唔少，但炸嘅溫泉蛋又試過未？一咬落去就當然爆漿啦，而咬嗰吓，就多咗層脆口晌面面，感覺有點新奇。
七星米
一碗靚丼，好嘅米當然亦好重要，用上北海道七星米梗喺想做出一碗好丼啦。飯粒分明不在話下，而且，有米香，又黏糯，淋上秘製天丼醬汁，唔喺講笑，齋喺「豉油撈飯」我都可以食到成碗。如果點「天吉丼」，追加白飯要+$15，仲要落單時講明，相反，點「天幕御膳」寫明白飯可以自由添加，如果喺「飯桶」一名就應該識點嗌啦，哈哈！
百零蚊食碗飯，有人會覺得貴，但食到嘅喺一碗得獎天丼，配料又多，日本靚米入饌，唔使飛過日本食，計計吓有賺啦。再者，食落確喺用料不賴，味道紮實無hea做，啲招呼又好，有禮貌，但留意一點，用餐有時限：60分鐘，每人最低消費$100，怕啲cheap友點客「天幕御膳」兩人「些牙」，再不停添飯囉！
個人評分
味道：9/10
環境：8/10
服務：8/10
抵食：8/10
平均每人消費：HK$146
味道：9/10
環境：8/10
服務：8/10
抵食：8/10
平均每人消費：HK$146
餐廳資料：
天吉屋 Tenkichiya
旺角亞皆老街8號朗豪坊11樓25-29號舖
3105 0986
天吉屋 Tenkichiya
旺角亞皆老街8號朗豪坊11樓25-29號舖
3105 0986
沒有留言:
發佈留言