糖妹妹糖 Lady Sugar：法式牛軋糖

近依年托食友嘅福，讓小弟試咗來自唔同地方、帶有唔同特色嘅零食，嚐味之餘，又開開眼界。今次獲贈嘅由「糖妹妹糖」引入，台灣「糖村」嘅「超人氣法式牛軋糖」。由於只有300克、600克，750克包裝，所以起步價都唔平，就以300克嘅法式牛軋糖為例，賣$120 / $130，視乎包裝而定，最重600克嘅賣到成$300。據食友講，一包300克牛軋糖只有22粒，為起差唔多近$6一粒，咁樣計落又似乎唔喺貴喎！

食友好有心思，以花紙小袋包起嚟分俾大家。而內裡嘅糖村法式牛軋糖每粒都喺透明獨立包裝，衞生方便，而且睇到大大粒杏仁粒，好吸引啊。

由於講到依隻牛軋糖晌台灣好有名氣，所以都「專燈」上去佢個網頁睇睇，糖村嘅出品原來有四大堅持：品質要新鮮，衛生安全做足功夫，食材要天然健康，手藝要不斷改進。而牛軋糖即喺鳥結糖，糖村嘅牛軋糖亦秉承上述堅持，唔單只用上法國無鹽忌廉，配上美國加州杏仁粒，前者口味特別清爽，後者經3小時低溫烤烘，飽滿嘅杏仁粒寧捨香脆。此外，晌煮糖嘅溫度及時間控制得宜，所以先能夠做出軟硬適中、柔軟中帶煙韌嘅口感。確實，甜度適中嘅牛軋糖，充滿奶香，入口煙韌柔軟，唔太黏牙，杏仁夠多，又卜卜脆。由於無添加、無防腐，30日內就要食，建議放入雪櫃冷存，想食就晌拎出嚟室溫攤10分鐘，咁就效果最理想，香濃最滋味。

作為下次去完台灣嘅伴手禮，應該唔錯，咁！幾時去台灣好呢？仲好懷念上次2010年去台南、高雄、墾丁之旅，下一站應該再過去台北走走。賣吓廣告，有興趣小弟嘅台灣南部之旅，可登入以下網址：http://travel.openrice.com/traveller/trip.htm?tripid=1982。

個人評分
味道：8/10
環境：7/10
服務：7/10
抵食：7/10
平均每人消費：HK$0（禮物）

餐廳資料：
糖妹妹糖 Lady Sugar
尖沙咀彌敦道36-44號CKE重慶站2樓278A至B舗
3428 8106