美心MX Maxim's MX：我的美孚下午茶餐 ~ 下午茶當晚餐

一朝早食咗個自家製豐富早餐，all day breakfast嘅輕量版，有多士、太陽蛋、茄汁豆及豬肉腸，食得好飽不在話下，結果午餐都唔使食。雖然喺星期六，老婆都要返公司加班開工，晚飯又要食自己，由於早餐食得晏，又食得飽，所以，慳慳哋拖到傍晚，趁仲有下午茶供應，嚟個「早鳥晚餐」，哈哈。真喺時間校得啱啱好，買完個下午茶餐，就開始換牌上晚餐，嚟遲5min都可能會截單呀！

開始換走下午茶餐牌，差啲叫唔到！

我都幾鍾意嚟美心食下午茶餐，一來地點就腳，二來都有幾多啱心水嘅選擇，好似公司三文治餐、蜜糖燒雞翼茶餐、皇牌湯粉茶餐……等等。今次就睇中迷你鍋仔蒸飯茶餐，夠平又諗住飽肚啲，一共有有3款：淨鍋仔飯加餐飲（$18.5）、鍋仔飯配碗仔翅加餐飲（$21.5）同鍋仔飯配油菜加餐飲（$22）。最終要中間配碗仔翅，因為好耐無食過依款街頭美食喇。

蒸豉汁排骨鍋仔飯
雖然細細盅，都有一碗飯嘅份量，飯粒蒸得爽，添加埋李錦記甜豉油，真喺豉油撈飯都可以食佢成碗，你見我都清晒底架。講到明喺茶餐，排骨就唔好期望有好多，不過都叫放滿飯面，而豉汁蒸排骨總覺得喺絕配，其次小弟心目中第二位應喺梅子蒸排骨，南瓜蒸排骨我都OK，因為鍾意食南瓜嘛。

碗仔翅
咪睇碗碗仔翅表面平平無奇，一撈大大舊瘦肉沉底，仲有大大粒冬菇，講得好聽就用料十足，唔好聽嗰句就粗製濫做，製作俹簁。就喺依舊瘦肉先激發我寫下美心快餐嘅食評，因為美心、大家樂、麥記依類連鎖快餐雖則間中有幫襯，但無特別都費事寫喇。不過，碗翅舊肉製作咁「求其」，所以，先至有啲興趣寫一寫。

製作「求其」，竟然成舊瘦肉晌碗翅裡邊。

奶茶
除茶餐廳以外，都只有美心我仲會幫襯飲奶茶，因為佢啲奶茶都算唔錯，茶味不俗，可惜今趟滑度差啲啲！

好一餐，唔好又一餐，依款茶餐又真喺幾抵食，當得一餐晚飯，哈哈！

個人評分
味道：6/10
環境：6/10
服務：6/10
抵食：8/10
平均每人消費：HK$21.5

餐廳資料：
美心MX Maxim's MX
美孚蘭秀道1-15及2-24號美孚新邨五期地下N10-N12號舖
2743 2793