屋裡廂：少有上海小食同點心

趁住信用卡做優惠，專程去試一試。點了套餐，包括有醉雞、醃篤鮮、糟香桂花魚、奶油腐皮津白、蝦仁兩面黃、小籠包、豆漿芒果杏仁豆腐（甜品），另外再加埋鎮江肴肉、啤酒黃泥螺、雞火雲吞雞、蔥油麻餅同雙釀糰。

糟香桂花魚

蔥油麻餅

除咗有部分做得較鹹之外，整體都ＯＫ喎，以下都值得推介下：
1. 醉雞 - 有酒香就應該啦，但食落口雞肉好嫩滑、好有鮮雞味，而雞皮唔肥，仲可以用爽脆嚟形容。
2. 醃篤鮮 - 聽個名唔知喺乜，原來喺個湯，裡面有鮮竹筍、百頁、菜膽同金華火腿，啲鮮竹筍真喺好正好甜。

3. 奶油腐皮津白 - 賣相睇落又白、又滑，腐皮好有豆香，津白又唔會煮得太腍，清淡得嚟唔會好寡。

4. 鎮江肴肉 - 餐前冷盤，細細粒，陣陣鹹香，幾好食。

5. 啤酒黃泥螺 - 較特別又幾得意嘅小食，有陣陣啤酒味，啲黃泥螺有殼，又有少少內臟，要陰陰力啜啲肉出嚟食，食落就好有螺味。啲螺喺用鹽醃，有啲似潮州人食嘅醃蜆仔咁。

6. 雙釀糰 - 即喺雙層糯米糍，但好講手工。最中間喺芝麻餡，包住一層糯米糍粉皮，再包一層豆沙餡，然後包上最外層粉皮，撒上椰絲。食落好軟糯，芝麻同豆沙餡都好香！

至於環境稱得上雅緻。服務都唔錯，好似個雞火雲吞雞，服務員都晌隔離枱分好晒一碗碗至拎過嚟，而我哋有個朋友未到，佢都識留番一碗雲吞雞喺個大燉盅度唔分出嚟，等個朋友到先上，而且，好似見我哋對住碟啤酒黃泥螺討論緊點食嘅時候，佢又解釋下點食法！基本上都好有禮貌同招呼週到。

但稍為覺得價錢貴咗少少，若果唔喺有信用卡優惠，可能每人要成$170左右！

個人評分
味道：6/10
環境：8/10
服務：8/10
抵食：3/10
平均每人消費：HK$110

餐廳資料：
屋裡廂
西灣河鯉景灣太康街55號

2568 9098