美心 MX：摻摻午餐

公司一向有包伙食供應，足不出戶餐晏就晌公司搞掂，但新冠狀病毒疫情關係，有啲新安排，包伙食就暫停咗先，同事們就叫住外賣。由於「筆直」有限，所以，我哋都喺嗌快餐店之類。今日就試咗「美心MX」嘅喇沙，覺得唔錯，就草草哋寫番篇。

呢一款「喇沙摻摻」可以配穀飼肥牛片（$47）或香茅豬扒（$46），同樣包基本餐飲。

小弟就選咗肥牛，而大碗內喺摻摻、炸魚片、半隻烚蛋同啲芽菜，而細碗內則喺喇沙湯底及三數件豆卜，望見橙紅色嘅喇沙湯，以及散發陣陣香氣，感覺幾對辦。

未倒湯，碗粉都好墜手吓，落埋啲湯落去，真喺「感覺」到個份量十足，不過，你睇碗粉滿滿就知無呃秤啦。碗內嘅摻摻（油麵撈米粉）確喺幾多，而肥牛亦有唔少，挑剔位喺啲油麵腍咗啲，相信啲肥牛一早灼好放晌盒內，唔算好滑；反而，個喇沙湯就幾得，濃郁而有椰香，我仲清咗個湯七七八八。

晌中環食晏一向都唔平，就算快餐店、茶記一樣唔平得去邊。所以，$47個餐，份量足，包埋嘢飲，加上味道唔差，都算喺咁啦！

個人評分
味道：7/10
環境：7/10
服務：7/10
抵食：8/10
平均每人消費：HK$47

餐廳資料：
美心 MX
中環干諾道中24號中華總商會大廈地下
2140 6689