梅蘭菊竹 Heart Spade Diamond Club：「疫」流大縮

早前有一套本地電影「逆流大叔」，真喺講正唔少中年人所面對嘅難處，我哋一班老同學都年屆大叔之齡，當然有不少共鳴。小弟都好耐無出街食嘢，今日因要事約咗位老同學食晏，之前有社會運動，依家又有疫情爆發，睇見啲餐廳捱吓捱吓，生意額大縮，真喺唔知捱唔捱得過呢個寒冬。

專登揀上斜行到「雲咸街」尾篤篤嘅「梅蘭菊竹」酒吧餐廳，因為貪佢相對少少隔涉，嚟食晏嘅客人唔多，其實，近來中環食晏嘅人流比平常少近半，見啲人買外買多。走進餐廳裡面，唔使多講就喺一派酒吧格局，裝修都幾型格，入門口嘅吧位，天花掛滿「梅花」，非常搶眼。

落咗樓梯位，更設有個音響小舞台，相信喺俾樂隊表演用。

走入啲，就喺主用餐區，天花以麻繩做成嘅網織，亦都別樹一格，而且，枱櫈嘅編排亦較闊落，唔會太有拘束感。

一邊牆身，更手繪咗數個粵劇花旦，畫功出色，手法富藝術感，好有本土色彩。

午市套餐，就打正旗號賣泰國菜，講到明喺泰國師傅主理。A-H共8款選擇，定價$68 / $78，包基本餐飲及泰式甜品，亦可額外加公轉特飲，依家新張更加少少節扣優惠。

泰式海南雞配香油飯 $78

新加坡嘅海南雞飯食得多，泰式嘅就真喺好少食，最明顯喺配嘅喺泰式酸辣醬，而唔喺甜醬油、薑蓉及辣醬。除咗有大大碗香油飯，仲有碗類似冬瓜湯奉送添，唔知有無強肺功效，哈哈！。

啲香油飯唔錯，有陣陣油香，而且，飯粒分明、爽口；至於啲海南雞，份量十足，雞皮好爽，皮下脂肪少，雞肉又做得嫩滑，沾一點泰式酸辣醬，更突出到雞肉嘅鮮甜。

黃咖喱牛腩飯 $78

非常時期，就無試同學嘅黃咖喱，不過，聽佢講咖喱嘅味道幾得，唔太辣，又幾有香料嘅層次；而啲牛腩呢？炆得好腍，咬落好鬆化，同樣份量好夠。

熱檸茶

基本上喺無咩特別嘅，不過，佢哋環保啲唔會主動俾糖包你，但你開到聲嘅，就會俾一小罌糖漿你。

椰汁糕

雖然只得一小粒，但做得唔錯，上層喺椰汁做，下面薄薄一層就喺椰青水做，頗清甜。同學就話食完啲咖喱再食呢粒小甜點就最好不過。

咪睇佢只喺間酒吧餐廳，做菜固然唔失禮，服務亦到位，好似上主食咁，真喺同步上菜，唔會一份嚟先，一份嚟後，侍應亦好有禮貌。希望疫情快啲過去，等大家回復番過去平靜嘅日子。

個人評分
味道：8/10
環境：8/10
服務：8/10
抵食：8/10
平均每人消費：HK$75

餐廳資料：
梅蘭菊竹 Heart Spade Diamond Club
中環蘭桂坊雲咸街29號LKF 29地下及1樓
2389 1908