Fiat Caffè：車房內嘆爽快意菜

年初嚟過一次快意試菜，嗰次試咗多款特色意菜，印象喺創意無限，味道不俗，值得翻兜再試，況且，意菜一向都喺小弟心水菜系之一。晌依個車房，可以講食唔講車，況且講到尾，小弟對車喺一竅不通。多謝老友搵小弟做伴，等我再次重溫美食。

跟上次嚟，整體格局無乜點變，但枱櫈，部份零售架位置有少少變動，而最明顯喺客就多咗，估唔到仲要多數喺女生，仲以為會多啲愛車男士嚟捧場添！但始終都覺得啲枱太細張，放兩、三碟嘢已無乜多餘空間。

Fiat主打賣創新意菜，選擇唔算得話好多，一張A4呎吋餐牌就包括晒頭盤、精選主菜、開面三文治（Bruschetta）、意式三文治（Panini）、甜品5大類別，認真貴精不貴多。另一張A4呎吋餐牌，就列晒各款飲品，包括餐酒、雞尾酒、意式特飲、汽水果汁、咖啡、紅茶及冬日特飲。今次揀嘅菜式，盡量跟上次唔重複，希望試得多啲嘢。

Honey Figs Margarite $50

除雞尾酒外，仲有啲無加入酒精嘅雞尾酒（Mocktails），經店員介紹，揀咗一杯無酒精嘅「瑪格麗特」，有飲開雞尾酒嘅人都大概知佢喺由龍舌蘭酒、檸汁、君度橙酒混合而成。而眼前依小杯橙紅色嘅「瑪格麗特」，搗爛整個新鮮無花果，加入蜜糖，配上檸檬梳打，雖則有創意，入口亦好清新，但個人而言，唔算好好飲，因為突出唔到無花果嘅鮮甜味，或許蜜糖落得唔多，有啲聊勝於無嘅感覺！

法邊豆、羊芝士、合桃、白葡萄醋（French Beans, Goat Cheese, Walnuts and Balsamic Bianco）$80

法邊豆雖然極少接觸，但都唔喺第一次食，之前晌土瓜灣8度餐廳食過，不過真喺要搵專家幫吓手，晌8度餐廳個餐牌見佢英文名叫Kenya bean，但依家晌Fiat Caffe個餐牌見就叫French bean，但中文同樣譯法邊豆，再睇番上次8度啲相，兩者都喺一樣，極似我哋中國嘅豆角，或者同種唔同源，一個來自法蘭西，一個來自肯亞。今次啲法邊豆幾爽，加埋合桃嘅脆，仲有羊芝士嘅鹹香，整個組合個味道幾有層次，由於羊芝士屬重口味嘢，澆以白葡萄醋似乎幾有心思嘅做法，再以黃色及紅色車厘茄襯托，可見晌賣相色澤上都計算過，確喺一道不錯嘅頭盤。

香煎沙甸魚、水瓜柳、檸檬（Fried Sardines with Capers, Lemon and Dill）$95

另一道頭盤香煎沙甸魚，原以為得條魚，原來墊有兩件酸忌廉麵包，一層疊一層，賣相幾立體。煎好嘅沙甸魚肉質挺實淨，帶有鹹香味，撈上刁草橄欖油，再唧啲鮮檸檬汁，食時感覺油潤得嚟又有朕清新感。對水瓜柳感覺一般，但加咗意大利乾蕃茄，蕃茄味超濃縮，咁就正好多。酸忌廉麵包外皮既乾且韌，好歐陸式，包心會軟熟一啲，味道會帶微酸，如想夾埋件沙甸同食，效果唔會太理想，都喺一啖魚，一口包會易處理啲。

藍青口、白酒、洋蔥、香草（Blue Mussels, White Wine, Onion and Parsley）$135

主菜揀咗白酒藍青口，雖然貴為主菜，但份量唔算多，大概10隻左右，一個人食都未必夠頂肚，更何況跟人分享一齊食。雖然唔知嚟自邊度，不過喺有質素嘅，算幾大隻，又有肉地，白酒、洋蔥、香草，令啲青口幾香。同樣伴有一件酸忌廉麵包，依次沾啲白酒汁，兼浸淋佢少少，會好味且易食啲，因為啲「硬屈屈」嘅歐陸包唔喺個個人都接受得到！

朱古力雪糕（$40）士多啤梨雪葩（$40）

最後就有甜品出場，選擇上有「意大利曲奇」、「香桃、雲呢拿忌廉、杏仁杯」、「意大利芝士杯」，不過上次都已經試過，所以，就揀意大利雪糕嚟試試，雪糕喺由品牌XTC供應，是晚款式有朱古力雪糕同士多啤梨雪葩。前者朱古力味道頗為濃郁，睇睇杯底成份，原來用咗Valrhona朱古力，但略嫌質感有啲生硬；後者則果味鮮活，士多啤梨幾像真，由於無加入牛奶，所以冰感幾重。

以質素計，今餐價位都蠻划算，睇到配搭、用料都下過心思，而且，好些菜式都幾特別。總結，無論服務、食物都無乜失準，足以証明佢哋做意菜唔喺單靠「快意」品牌嘅效應，靠嘅喺真材實料，出色嘅烹調，留住客人嘅心。

個人評分
味道：8/10
環境：7/10
服務：8/10
抵食：6/10
平均每人消費：HK$270

餐廳資料：
Fiat Caffè
銅鑼灣禮頓道77號禮頓中心G5-G6號舖
2960 9222