ZERO：「零」缺勿濫

雖然喺嚟食西餐、薄餅，其實，呢餐喺團年飯嚟，約咗細佬妹，加埋老婆，一行4人，唔食中菜，揀咗西餐，都喺想帶佢哋試吓唔同嘅嘢。最後揀咗「朗豪坊」嘅「Zero」，一來貪佢位置中間，就到晒我哋咁多人；二來有里數儲吓，仲專登揀星期一，雙倍里數嘛！

餐廳位處商場近頂層，搭星際扶手電梯快過等一般電梯，唔使層層停。而餐廳採半開放形式，所以，一眼就望晒成間餐廳嘅格局。裡面裝飾都帶點格調，以黑色為主調，配以柔和燈光。

我哋則被安排緊貼商場嘅一排4人枱，好嘅就環境光猛啲，對我影相都好啲，唔好嘅就喺總有人晌旁邊經過，你唔去刻意留意啲商場客，其實都無乜嘢嘅。

刀叉、餐碟、紙巾早已放晌枱上，而枱面喺搵白磁磚砌成，望落都好乾淨整潔，對餐廳而言，就極之方便打理。

「Zero」主打喺薄餅，所以，頭兩版就喺唔同款式嘅薄餅選項，此外，就仲可以DIY，由醬料、芝士口味，以至配料，都可以隨心所慾。而且，醬料、芝士、配料都有好多選擇。

薄餅以外，就仲有頭盤、沙律、主菜、意大利麵、意大利飯及甜品，所以，都唔使擔心無選擇。

飲品方面，有一系列酒精、雞尾酒特飲，咁都仲有啲生啤呀，烈酒呀、蘋果酒呀、紅白餐酒之類。唔飲得酒嘅都無問題，亦有一系列非酒精特飲、沙冰、果汁、汽水及啡茶。

朱古力Oreo $42

細佬揀咗杯朱古力，大大杯兼噴滿忌廉，佢話先飲一啖，啲朱古力味都幾濃郁；再攪勻啲忌廉，再飲落去就覺得好滑溜，整體感覺唔錯。餐廳採用紙飲管，夠環保。

脫脂乳酪沙冰 $42

我就喜歡乳酪系嘅飲品，所以，揀咗呢款脫脂乳酪沙冰，要芒果配熱情果口味。入口當然好爽快，味道酸酸甜甜，以芒果味較主導，配薄餅同濃味嘢就好夾。美中不足之處喺沙冰打得唔夠柔細，飲落仲有好多冰粒感。

雜錦拼盤 $198

我哋有得4個人，費事諗嚟諗去，就選個拼盤一了百了唔使煩。拼盤包括5款小食：丹麥酥多士、照燒汁芝士肉丸串燒、伊比利亞火腿炸薯丸、墨西哥辣椒蜜餞雞翼及炸大蝦與獅子唐辛子。最大亮點喺以摩天輪形式登場，夠晒浮誇，擺到上枱，其實都幾掗位，哈哈！

丹麥酥多士

睇落以為喺啲普通方包條，其實喺丹麥多士，所以，食落外皮會更酥香，包身亦特別富牛油香氣。個拼盤伴有4款醬，但侍應就無乜點介紹，正正有兩款喺牛奶同花生醬，啱晒點多士。

照燒汁芝士肉丸串燒

啲肉丸又幾正，肉質唔會太粗嚡、太雜，芝士感就唔喺太強，反而，塗上照燒汁，又灑上木魚碎，喺幾正。挑剔位喺嚟到唔夠熱，只喺微暖。

伊比利亞火腿炸薯丸

炸薯丸當然喺普通嘢，不過，加咗啲伊比利亞火腿就唔同晒，但又唔好太大期望，火眼粒粒就唔喺好多，但薯丸就非常軟滑。

墨西哥辣椒蜜餞雞翼

唔喺講笑，都幾辣吓，夠晒刺激，所以，頗為惹味，有少少蜜糖香，所以，確喺幾好食。

炸大蝦與獅子唐辛子

個小食名真喺咁寫，問番「獅子唐辛子」喺乜？其實喺七味粉燒青椒仔。啲炸蝦唔喺好大隻，炸得嚟又比較油；反而啲青椒仔幾好食，香口唔辣。

燒豬肋骨 $228

細佬妹比較少食西式嘢，故今次除食薄餅，就點一客豬肋骨。我就幾鍾意佢哋嘅處理手法，雖然唔及一大條過豬肋骨咁有睇頭，但分好晒一條條，就方便咗大家好多。此外，伴上大旺3脆炸薯條，正呀喂！

至於啲肋骨，肉質燒得好軟腍，啲骨唔黐肉，個醬汁又濃又正，灑上黑白芝麻，點綴又好睇，味道又再豐富啲，大家都讚賞呢道菜式。

完美配搭薄餅 $138

叫得拼盤就知我哋喺懶人，唔多想諗，所以，雖然薄餅可以DIY，完全由自己組合，但我哋都喺晌6款預設嘅薄餅中揀其中款，就喺呢款「完美配搭薄餅」（Mix & Match Pizza）。

餐牌已列明所有材料， 10.5吋嘅薄餅包括有帶煙燻味煙芝士、烤鴨、蒲燒鰻魚、意大利煙肉、蘑菇及乾蕃茄，再撒下大量芝麻菜。睇外觀就知用料十足，保証啖喺都有魚有肉，而且，加咗鰻魚、意大利煙肉，甚具油香，果真「完美配搭」。

慢煮八爪魚亞枝竹炒意式米麵 $128

細妹見到呢一款「意式米麵」（其實喺做成米粒型嘅意大利粉），就甚感興趣，小弟就曾經晌其他意大餐廳試過，有種明明喺「米」，但食落有啲咬口嘅意粉感覺，口感喺幾過癮，所以，點一客俾佢哋體驗吓。

出嚟個賣相有啲似中式嘅乾牛河嘅炒飯版，其實，味道都有啲似，主要喺以豉油去炒，加入咗啲八爪魚同亞枝竹。細妹第一次試就覺得好得意，味道都幾香，之但喺，絕對喺過鹹咗，大打折扣。

「Zero」主打薄餅，觀乎今晚所試嘅薄餅，絕對喺合格有餘，用料不賴，夠晒份量，而其他菜式都唔錯，喺碟意式米麵鹹咗啲。環境、招呼都幾好，食物嘅定價亦唔算貴。搵食就梗喺寧缺勿濫啦，「Zero」都應可列為再幫襯嘅餐廳。

個人評分

味道：8/10
環境：7/10
服務：8/10
抵食：8/10
平均每人消費：HK$215

餐廳資料：
ZERO
旺角亞皆老街8號朗豪坊12樓5-9號舖
2918 1234