富豪軒 Regal Court：「糕」度戒備

雖然同啲朋友間都唔多興拜年，不過，農曆年始終對香港人而言都喺個大節日，總會相互送吓禮物。最近，就收到「富豪酒店」系嘅「瑤柱臘味蘿蔔糕」，真喺多謝晒朋友嘅厚愛，等小弟有機會試到唔同酒店嘅出品。

紅噹噹嘅應節包裝盒，印有簡約梅花圖案，蘿蔔糕以真空包裝，乾淨衛生。而蘿蔔糕做成長條形，非慣常嘅圓形，小學就覺得方便切咗。

表面已睇到鋪咗好多瑤柱絲及臘味粒，材料豐富，而切件後，睇到糕身混有原條蘿蔔條，唔會淨喺得啲粉。

將瑤柱臘味蘿蔔糕煎香後，外脆內軟，糕身嘅蘿蔔味唔錯，質感又唔會太削身，沖杯熱茶，咁又當咗一餐。最近，受到武漢肺炎嘅疫情影響，全城都要高度戒備，屋企有呢啲糧餉，應急之餘，又可以盡量少晌街食飯。

今次所試到嘅蘿蔔糕，都比較喺傳統款式，因為依家唔少商家推出嘅蘿蔔糕口味都做到五花八門，用料高檔，仲要配搭新奇。小弟對食，其實要求唔高，傳統又好，新派又好，好食嘅就喺好。最後，希望疫情嘅陰霾盡快過去，快啲雨過天清，大家可以回復番正常嘅生活！

個人評分

味道：8/10
環境：-/10
服務：-/10
抵食：-/10
平均每人消費：HK$0（朋友送贈）

餐廳資料：
富豪軒 Regal Court
沙田大涌橋路34-36號麗豪酒店2樓
2132 1012