京都薈 Capital Canton：團年聚「薈」

之前，曾到訪過「京都薈」飲早茶，而且，感覺唔錯，雖然啲枱櫈舊啲、殘啲，但啲點心平靚正，又有唔少優惠選擇。故此，細胞小組嘅團年飯就揀咗晌度食，可惜，跟早市比，晚市似乎有好大落差！

由於時近農曆新年，有唔少人都喺揀番食中餐，所以，酒家內都坐滿客人，好不熱鬧。

介紹吓啲基本餐牌，都喺大家晌一般酒樓常見嘅菜式，都喺啲明爐燒味、地道小食、巧手小炒、炒粉飯麵、海鮮呀、優惠組合、套餐呀……等等。另收茗茶就$15位，小食（花生）$15碟，加一就唔在講啦。所以，飲啖茶，食啲花生，加埋一就已經收咗我哋兩嚿幾水喇。

餐牌中有一個稱為「晚飯九大天皇」嘅菜牌，喺啲特價嘢嚟，我哋有得10個人，可以揀其中3款。諗住花膠雲吞雞湯、雙冬羊腩煲、脆皮芝麻雞，點知後兩者話無供應。

花膠雲吞雞湯 $198

呢個喺「晚飯九大天皇」嘅菜式之一，原價標$398，依家賣$198，最划算嘅菜式。而且，足有半隻雞，份量都有一大鍋，不過，花膠廖廖無幾，最弊喺隻雞唔熟，裡面仲滲血，已經麻煩經理再整過，湯底佢用番原湯（因為認得啲雲吞），可惜第二隻半邊雞都喺唔熟，真喺唔明。但經理都好好人，照幫忙取消呢道菜。

蜜桃菠蘿咕嚕肉 $38

餐牌都有講明個特價菜喺例牌份量，其實，睇落都有8兩嘅例牌份量，但用隻大碟，就顯得寒寒酸酸咁。味道方便，喺一啲都唔差，酸香唔嗆喉，開胃好食，啲咕嚕肉外層又唔會黐住大大嚿粉。

清蒸沙巴龍仔 $58

條沙巴龍仔，OK喎，賣得$58，睇落有斤幾重，依家去街市，求其買條魚平平哋都要幾十蚊啦。食魚鮮最好就喺清蒸，咁先食出其鮮味，而條魚蒸得啱啱好，又有鮮甜味。

另外，仲有一款「海鮮大匯晚市孖寶」特價餐牌，8款海鮮菜式，任揀兩款都只喺賣$228，睇落好划算，但試過就知有啲呻笨。

豉椒炒花甲

豉椒菜式一向受人歡迎，所以，其中一款海鮮菜式就揀炒蜆。的確，炒得幾香口惹味，而且，吉殼唔太多，蜆肉亦算得肥大。

豉汁蒸大白鱔

豉汁蒸又喺另一伴飯好菜式，但相對碟炒蜆，碟蒸大白鱔有少許失色，尤其跟菜牌張相，份量真喺差好遠，賣相碎濕濕。幸好，啲鱔味道唔差，又油潤甘香。

竹笙鼎湖上素 $108

又魚又肉，就梗喺點啲蔬菜類菜式啦。先上場喺清清哋嘅鼎湖上素，蠔皇汁底，所以，食起嚟唔會覺得好寡，感覺唔錯。

百合木耳炒西芹 $78

另一道蔬菜菜式都喺揀得清啲，而且，木耳高營養，西芹又可以降血壓，同埋，木耳同啲西芹都好爽口，啱我哋當中嘅中佬，哈哈！

臘味糯米飯 $98　

除咗嗌咗啲白飯，仲加個臘味糯米飯墊吓肚。成晚嘅菜式，似乎最好喺道糯米飯，色澤均勻，飯粒黏糯卻唔會一嚿嚿，好食喎。

雖然同枱唔少細路，但個個都食得吓，所以，之後再補多兩個餸先夠填飽大家，但就無影到相。今晚菜式OK啦，但份量有啲偏少，招呼就還可以啦。

個人評分
味道：7/10
環境：7/10
服務：7/10
抵食：7/10
平均每人消費：HK$110

餐廳資料：
京都薈 Capital Canton
美孚美孚新邨4期百老匯街73號地下及1樓
2727 3188