文記茶餐廳：客家茶記

趁天氣好，同啲老友一次過由屯門起步，行晒藍地水塘、石礦場同洪水坑水塘，最後經過埋村屋出番青山公路，但未到青山公路就遇上「文記」，大家都無咩要求，索性就晌度放飯。

從外就知喺村屋格局加建出嚟，有露天位，亦有室內，時值正午，喺有啲熱，自自然然揀入去坐，涼吓冷氣舒服啲，再者，坐出去要吸二手煙嘛！

午餐就一個水牌睇晒，共6款選擇，但你會見到F同G兩款菜式喺固定：客家鹹雞飯、梅菜扣肉飯，原來茶記嘅前身喺主打賣客家菜，依家用番原名，但就走茶記路線。餐飲今次揀凍檸茶，酸爽夠解渴嘛，所以，一嚟到就猛貫幾口，相都唔記得影呀！

客家鹹雞飯 $57
既然喺主打呢兩款客家碟頭飯，我哋都喺食呢兩款。鹹雞飯就飯餸分開，份量幾足，老友就話幾唔錯，雖然唔知冰鮮定新鮮雞（個人估都喺前者多），但雞有鮮甜味，皮下脂肪少，雞皮爽滑，肉質亦夠嫩滑，而且十分入味，鹹鹹香香。

梅菜扣肉飯 $57

難得老婆無一齊，選擇自然可以放縱少少，就要一客梅菜扣肉飯，梅菜同扣肉都非常之多，冚過晒成碟飯。啲扣肉睇起嚟都肥架，一層肥膏一層肉，不過，咬落又真喺唔覺油膩，滷得入味，口感蠻鬆化，啲梅菜無過鹹，反而帶點甜味，撈飯一流。

今次行山因為有啲新手，所以，就安排一條唔太長，亦唔太難嘅，又睇到兩個唔同嘅水塘，大家都行得開心，晌「文記」食得飽飽，又涼完冷氣、攤抖完，大家都話力氣都返晒嚟。

個人評分
味道：8/10
環境：7/10
服務：7/10
抵食：8/10
平均每人消費：HK$60

餐廳資料：
文記茶餐廳
地址：屯門順達街739號地下Y號舖
電話：2442 2828