此外，有一點都幾特別，就喺牆上掛上好多幅彩繪，細心睇睇，原來喺一位駐店畫家嘅手筆！
題外話，牆上仲貼咗張嘢：提交戶客意見調查及追蹤官方IG，即可獲得一張$50現金券，當然唔可以錯過啦。
講番食物方面，主餐牌就有幾多選擇，不過，食得精明划算啲，就梗喺揀番午餐，包沙律或餐湯、主食、飲品，以所揀嘅主食嚟定價；而飲品有升級優惠，此外，亦可以加配小食或甜品。既然留港消費，又想支持吓小店，當然食得豐富啲。
冬陰功湯（細）既然叫兩個餐，咁就梗喺一個要湯，一個要沙律，試晒兩款嘢。睇樣就好對辦，飲過先知堅定流，一入口果然有料到，辣度溫和，帶微微酸同少少香料味，飲落頗為開胃。
青木瓜沙律看似平平無奇，但食落就知好有個性，青木瓜絲、甘筍絲口感爽脆，而個汁底嘅辣度比個冬陰功湯勁，不過，辣得嚟就唔會好嗆喉，加多幾分酸香味，食多兩啖好令人變得更開胃。
手打青咖喱雞肉米線 $75老婆就想食啲濕濕哋嘅嘢，而泰式咖喱一向都非常有特色，分青咖喱、紅咖喱、黃咖喱，所以，揀碗青咖喱米線。啲青咖喱好有辣勁，刺激過癮，而咖喱嘅質感較厚身，好掛啲米線，夾埋確喺幾好食，啲雞肉亦唔錯，又有好多配料同雞蛋，個人而言，只喺嫌米線有少少偏腍。
軟殼蟹蟹肉炒飯 $118另一個主食就選炒飯，個人嚟講都鍾意食蟹，但就好怕拆肉，麻煩嘛，所以，就揀呢道軟殼蟹蟹肉炒飯。個炒飯唔錯喎，食完唔會一碟底都喺油，而事實上個飯炒得爽身，又食得到絲絲蟹肉；面頭嘅軟殼蟹，炸得香口，味道唔錯。
龍眼冰 +$15、熱青檸水食泰菜，小弟就幾多時會揀龍眼冰，解辣一流，個糖水底好清潤，甜味幾純香自然，而龍眼一食就知唔喺罐頭貨色，有種蜜香，如果俾多幾粒就好喇；熱青檸水，跟平常飲檸水嘅味道好唔同，青檸有種獨有芳香。
蝦餅 $38
芒果糯米飯 $38最後來一客芒果糯米飯作結，最欣賞喺用上白糯米搭黑糯米，糯米仲喺暖暖哋，咬落軟糯煙韌，混埋啲椰奶，好食，再者，個芒果夠熟，入口味道清甜，將3者一次過放入口，就更加正啦。
綜合而言，啲分量好足，定價又親民，加上午餐嘅選項又好有彈性，可以講喺性價比高嘅泰國餐廳，值得再訪嘅小店！
個人評分
味道：8/10
環境：8/10
服務：9/10
抵食：9/10
平均每人消費：HK$120
餐廳資料：
泰Grill Thai Grill
地址：荃灣享和街53號都城大樓地下E1號舖
電話：5776 0962
沒有留言:
發佈留言