王子牛腩牛雜粉麵專家：「雜」以為常

雖然無正式統計，但相信除茶記之外，最多嘅就喺粉麵鋪，始終呢兩樣喺香港嘅平民飲食文化。而粉麵店之中，以主打賣牛雜、牛腩嘅為多，今晚到訪嘅「王子」亦喺以此為賣點。

始終喺旅遊區，用餐期間人流出出入入，感覺都喺以遊客居多。環境如一般粉麵店，裝修平實，最緊要都喺乾淨企理啫。

留一留記錄又好，俾大家做參考又好，慣例都會影一影餐牌。呢度唔單止有粉麵，仲有多款飯品，以及咖喱煲仔，而小食、飲品亦有加配優惠，總之選擇多元化。

如果睇見咁多嘢而心大心細，咁不妨晌牆上嘅「王子必食推介」度着手，姑勿論喺唔喺宣傳技倆，至少都縮窄咗範圍。

炸雲吞 +$15
香口嘢一向好有市場，而加配又有優惠，就無理由唔試吓，所以，先試咗份炸雲吞，話時話都好耐無食過。啲雲吞皮炸完卜卜脆，餡料唔算好多，不過，沾埋啲甜酸醬，作為前菜小食就幾醒胃。

炸魚皮 +$15

另外，老友叫咗個河粉，就自然想加配份炸魚皮，啲炸魚皮預先包裝好，感覺衛生。同樣，咬落去好香脆，老友就喜歡放湯浸一浸，好似食響鈴咁，另一番風味。

牛三寶河 $65

除咗牛坑腩，呢個牛三寶喺招牌之一，三寶包括牛腩、牛筋、牛肚，聲測聽落幾多人叫呢一款粉麵。啲餸料放到滿滿，成碗面都喺，每樣嘢都好入味，而牛腩極為鬆化，牛筋就柔韌有咬口感，牛肚就好爽口，唔會韌到咬唔開，河粉口感滑溜。

肉燥豬扒飯 $54

啲肉燥有別於台式嗰種，無咁油、咁肥，個人而言，反而有點似意式嘅肉醬，只喺用咗滷水做，加埋啲飯好軟熟，撈飯食確喺幾香濃好味。而豬扒好厚身，炸得甘香唔油膩，質感鬆化到不得了，份量十足，不愧喺推介之一，覺得性價比高。

凍奶茶、凍檸菜 +$8

本來就想叫紅豆冰，但諗諗吓都喺想嘆杯凍奶茶，皆因今晚既食炸雲吞，又炸魚皮，仲有豬扒都喺炸嘅，要少冰，咁就唔會飲到尾變得太淡口。個茶底幾唔錯，幾有茶香，茶奶比例亦OK。而老友嘅凍檸檬茶佢都話唔錯，個茶底夠香濃，檸檬唔會有澀味。

小弟就唔會特別揀啲好有名氣，或者大品牌嘅餐廳，可以嘅話都盡量幫襯吓小店，嘆吓地道嘅港式嘢，外國人就更加鍾意啲地道嘢。

個人評分
味道：8/10
環境：7/10
服務：8/10
抵食：7/10
平均每人消費：HK$76

餐廳資料：
王子牛腩牛雜粉麵專家
地址：尖沙咀樂道23號地下B號舖
電話：2383 0369