餐廳有自家烘焙，所以，鋪面設有新鮮出爐麵包賣，望上去都幾吸引，喺等入座期間都見唔少客嚟買包。鋪內個環境幾唔錯，以冰室而言地方算闊落，環境整潔夠光猛，不過，啲冷氣就開到超大，凍到好似雪房咁，就算喺夏天都唔需要開到咁猛，不負「冰」室之名。
餐具、紙巾、牙籤、糖包都放晒喺側邊嘅櫃桶，值得一讚嘅喺除咗擺齊所有物品之外，都放得企理，食嘢最緊要係乾淨嘛！
由於佢哋嘅下午茶餐去到6:00pm，所以，我哋都仲可以食到，最神奇嘅喺連午餐都做到6:00pm，另外，無論午餐還是下午茶，定價都比一般茶餐廳為高。
豉油王豬頸肉炒意粉（午餐）$67雖然喺炒意粉，但佢哋啲意粉口感比較幼身，然而，都算炒得香口，又夠均勻，有豉油香，而豬頸肉口感爽口，幾唔錯。
咖喱吉列豬扒意粉（午餐）$67件炸豬扒超大塊，又炸得金黃，外觀夠晒霸氣，咬落香脆就唔在講，肉質鬆化，又富肉汁，而咖喱比較港式，雖無印度咖喱咁有豐富嘅香料味，但香香辣辣，都惹味香口。
椰香咖喱汁焗雞扒飯（午餐）$67上文都講過，店家嘅港式咖喱汁都唔錯，再淋上椰奶，雖然飯底唔喺炒飯底，但個椰奶咖喱汁底撈飯確喺好食，而呢個喺配雞扒，雞扒煎得香口，比預期嫩滑，而咁多款碟頭嘢，最大份量喺佢。
輕型家鄉炒米粉（下午茶餐）$48因為有叫午餐，又有叫下午茶餐，一比之下，輕型嘅份量真喺好輕型吓，目測估計都少咗三分一，所以 根本就喺將貨就價，食下午茶餐無咩著數咗，而所為家鄉炒米粉就喺加咗啲蝦仁同蝦乾，還好嘅喺味道唔錯，米粉炒得爽身。
輕盈揚州炒飯（下午茶餐）$48唔好睇相以為碟炒飯好多，其實真喺輕型份量，就連餸料都好輕型，食落感覺啲餸料比較偏少，好在啲飯粒都炒得分明，爽身唔油。
輕型鐵板牛柳絲炒麵（下午茶餐）$48反而呢個鐵板就交足貨，用上傳統嘅「牛牛」鐵板好有感，加埋送到嚟鐵板散出熱氣騰騰，有睇頭，而且個炒麵炒得惹味，牛柳絲又夠腍滑，呢個真喺最抵食。
熱奶茶向來去茶記都喺嗌奶茶，今次都唔例外，睇落色澤都幾對辦，味道方面呢？茶底都香，不過，口感就唔算滑，個人嚟講，屬中上啦。
我哋一班舊同事耐無聚，梗喺想食吓、講下，坐耐啲啦，不過，呢度啲冷氣真喺太扯，食完都唔敢坐耐啲，費事凍到病，佢哋嘅趕客策略幾成功。此外，因為太大冷氣，啲嘢食、嘢飲嚟到一陣間就凍晒，多多少少都令到味道大打折扣，招呼方面普普通通咁啦，其實由安排入座、落單、送餐，感覺都好麻麻哋。
個人評分
味道：7/10
環境：6/10
服務：5/10
抵食：7/10
平均每人消費：HK$58
味道：7/10
環境：6/10
服務：5/10
抵食：7/10
平均每人消費：HK$58
餐廳資料：
荳子冰室 Cafe De Beans
地址：上水智昌路3號上水中心2樓2038, 2038B, 2052號舖
電話：2610 0988
荳子冰室 Cafe De Beans
地址：上水智昌路3號上水中心2樓2038, 2038B, 2052號舖
電話：2610 0988
沒有留言:
發佈留言