霸皇燒鵝冰室：「燒」化不良

晌平日甚少會晌美孚食晏晝飯，一定喺事出有因，今次就喺嘞，腳傷要睇跌打，既然要落街，就順便食埋個晏晝飯先返屋企，美孚老友夏總喺WFH之人，所以，拉埋佢落嚟陪吓小弟。

「霸皇燒鵝冰室」開咗好一陣子，不過就未幫襯過，今次就番去睇跌打嘅路線，就順道嚟幫襯吓。裡面同一般茶餐廳嘅格局無異，卡位為主，又有啲細圓枱，牆上貼滿食物相。

亦如大部份茶記，卡位側櫃桶拉出嚟就放滿餐具、牙簽、糖包，另外，枱面就放有水杯、熱水、鹽、胡椒粉同紙市，都幾企理。

門口貼有一個廚師推介嘅餐牌，A-H共8款，種類都算多樣化，定價$58-$68，包餐飲，睇落可以當午餐或既餐餐牌咁。

玻璃脆皮乳豬拼油雞飯 $70

夏總就鍾情乳豬，睇落啲乳豬同油雞都幾靚仔，無詳細問佢好唔好食，不過，見佢好快清晒碟飯，就應該唔差。

霸皇燒鵝飯拼叉燒 $58

餐廳名字叫的霸皇燒鵝，而廚師推介餐又有得揀燒鵝，當然試吓佢，另外可拼一款燒味，就揀叉燒。呢度啲燒味賣相確喺幾好樣，食落先知好唔好，先講啲燒鵝，都算唔錯，有油脂香，鵝皮都有啲脆口，鵝肉都嫩滑，不過，叉燒就差啲，入口比較乾，所以，有啲硬，又無乜蜜香。

熱奶茶

睇茶色已覺得有啲淡，飲落確喺差啲，茶底比較弱，唔叫得唔好飲，只喺茶味不足，影響整體感覺。

因為老婆唔好燒味，所以，難得有夏總陪，算喺叫做可以試試呢家「新店」。

個人評分
味道：7/10
環境：6/10
服務：7/10
抵食：8/10
平均每人消費：HK$58

餐廳資料：
霸皇燒鵝冰室
地址：美孚蘭秀道1-24號地下N21及N22號舖
電話：9885 1751