銀龍粉麵茶餐廳 Ngan Lung Restaurant：超「龍」縮放飯

平時都較少出嚟尖沙咀食晏，食晚飯就多，今回有特別任務，做一日車長帶團出嚟食自助餐，而我哋幾個車長就晌附近搵間茶記快快手醫肚就算。一出酒店門口，無遠就見到「銀龍」，大家都喺無咩要求嘅人，就佢啦，最緊要就腳及快手。

餐廳設晌地庫，落到去都幾大吓，都喺基本嘅茶記格局：2人枱、4人枱、卡位，四正夠光猛。

而餐具、基本調味料就放晒晌枱上，鍾意佢有蓋冚住，衛生啲。

要快嘅，最好就喺揀午市套餐，星期一至日，每日有8款選擇，定價$60-$72，尖沙咀嚟講，算相宜架喇。雖然我哋一人叫一個飯，但都「些牙」少少嚟食。

豬軟骨餐肉煎蛋飯 $60

呢度啲碟頭好大，我哋3個人嘅午餐都好足份量，好似呢款就俾足3隻煎蛋，兩大片厚切餐肉，加埋多嚿豬軟骨，非常有睇頭。我就只喺黐嚿豬軟骨試試，香濃惹味，啲肉又鬆化，真喺唔錯喎。

頭抽霸王雞客飯 $68

平常食燒味飯時，叫雞飯啲雞都喺俾到手掌大小嘅份量，但呢個霸王雞就俾到一大碟，睇落仲好靚仔，唔肥，而食落雞皮好爽，皮下脂肪又真喺少，肉質嫩滑，沾上一點頭抽令肉味更鮮。

刴椒豆腐蒸䱽魚飯 $60

小弟就揀咗蒸魚，同樣一整碟好大條䱽魚，雖然以辣椒同蔥花去蒸，但辣度好微，卻有種提鮮之效，最緊要喺蒸得啱啱好，啲魚肉確喺嫩滑，下面仲墊咗少少豆腐，沾上豉油，帶微辣，實在唔錯。

熱奶茶、熱咖啡

既然嚟到茶記，小弟嘅必然選擇就喺熱奶茶，睇落茶色似乎有少少淡，但幸而飲落又無話過多奶，茶奶比例都OK，茶味都夠香。

今餐都算快靚正，我自己就比較少幫襯「銀龍」，食物嘅質素比預期好，招呼方面就一般般啦，無話好，亦無話差，叫做符合我哋想快嘅要求。

個人評分
味道：8/10
環境：7/10
服務：7/10
抵食：9/10
平均每人消費：HK$60

餐廳資料：
銀龍粉麵茶餐廳 Ngan Lung Restaurant
地址：尖沙咀加拿分道4-6號集友大廈地舖
電話：2721 1155