茶館 Tea House：咩都蒙「茶」查

約咗細妹交收，返一返石硤尾老家一趟，順便約佢食餐晏晝，由佢決定就晌附近嘅「茶館」搞掂，反正佢無要求，小弟亦無差咩要求。

呢間茶記都曾經食過，印象中都唔差，環境如一般茶記咁，以卡位為主。其實，地方都算大，亦唔會感覺好逼。

雖然枱面已放上簡單調味料、牙簽，但餐具、餐紙記放晌枱側拉櫃，不過，無叉用，晌隔離枱攞，亦無，無人補餐具，叫咗幾次先有人補充，招呼真喺麻麻。

午市每日提供8款精選午餐，定價$53-$57，包是日例湯同熱飲。如果呢啲唔啱食，仲有啲招牌特餐、撈一到餐、全日英式早餐……等等。

是日例湯

果然好例湯，青紅蘿蔔煲豬骨，當然，驚喜就無，但飲落都足料同夠老火。

沙丹豬扒意粉 $53

細妹就試試個豬扒意，其實即喺茄汁煎豬扒加多隻煎蛋，兩大件有骨豬扒幾夠份量，煎得香口，但佢話肉質有少少乾，此外，意粉亦稍稍過腍。

咖喱牛脷飯 $55
小弟就揀咗碟牛脷，但勁多問題，一來唔知點解等咗好耐，老妹食咗大半我碟飯先嚟，一上枱已經覺得唔對辦，再試咬一啖，百份百肯定喺牛肉，唔喺牛脷。明明今日精選午餐只有牛脷，無牛肉，唔知點解會錯，咁我本意想食牛脷，當然麻煩侍應換過。

如是等多10min，卒之嚟咗碟咖喱牛脷飯，不過，牛脷勁韌，唔好食，咖喱好杰、好餬，得個辣字，唔香，薯仔過腍，真喺成碟都唔得。我懷疑啲牛脷根本出咗問題，所以，「咋咋帝」搵牛肉頂上，如果開心見誠講牛脷有問題，咁我就情願食牛肉啦。

熱奶茶

本應，杯奶茶確喺唔錯嘅，茶底都幾芳香，不過，上面有冷氣滴水，意外令杯奶茶加料，好在都叫飲咗大半杯，剩低啲梗喺唔敢飲啦。

今餐晏仔咩都麻麻，招呼麻麻，嘢食麻麻，衛生麻麻，不過人就善忘，可能三幾年後唔記得又嚟食過。

個人評分
味道：4/10
環境：6/10
服務：4/10
抵食：7/10
平均每人消費：HK$54

餐廳資料：
茶館 Tea House
地址：石硤尾石硤尾村美薈樓地下6號舖
電話：2618 1680