大西洋海鮮火鍋：「鮮」入為主

早前晌佐敦食過一次海鮮粥鍋，住晌港島區嘅老友就介紹我要嚟試試「大西洋」，皆因以即撈海鮮作招徠，其次喺以放題形式經營，一個價任食，比較易啲預算，尤其一班人嚟，就會食得比較爽。

餐廳嘅正門縮晌大廈嘅通道內，但當進入餐廳，就完全有別有洞天嘅感覺，因為裡面嘅裝修喺以中國宮廷風設計，牆上又掛上很多面譜、畫作，極具古色古香。

上文都講過呢度喺以放題形式，$198、$268，2小時任食，除多款海鮮，仲有數十款海鮮料，學生、長者額外有多8折優惠，最正喺無加一，成枱人夾埋就慳好多。

如大多數放題店，有一系列基本火鍋食材就放晒晌出面食物區，自由取用；亦備有一啲小食、下酒菜……等等之類，晌等個湯底滾起前都可以過過口癮。此外，亦提供生果、甜品，做到一應俱全，目測所見，貨源都算補充快。

當然，最矚目就喺個海鮮池，有啲大蝦、鮑魚、大蜆，全部都睇得出好新鮮，仲郁郁吓。

打鞭爐點可以唔飲吓啲凍飲襯一襯，除咗近門口一大個雪櫃，放齊各式各樣嘅果汁、汽水、乳酸特飲、涼茶、啤酒之外，另一邊仲有冰凍椰青，選擇夠晒多。

出面食物區嘅火鍋料都喺偏向啲大路嘢，如蔬菜、菇菌、乜丸物丸，另外有啲火鍋料可以透過掃二維碼落單，呢部份啲料就比較有特色啲，如蝦滑、生蠔、鵝腸、黑毛肚……等等。

講到呢度，就順便介紹埋另一食火鍋嘅必備物品，就喺醬料，出面一排醬料，任君亂混，小弟就唔喜歡太濃，尤其食海鮮，免得搶走鮮味，所以，簡單蒜蓉、蔥花、麻醬，加少少湯底就OK。

再落嚟講埋我哋所揀嘅湯底，湯底有5款：經典麻辣、花膠雞湯、番茄、菌菇、及大骨湯鍋底。我哋揀咗菌菇鍋底，睇得見勁多菇菌，都好有菌香。

大蝦、鮑魚、大蜆

既然啲海鮮喺游水貨，當然食佢哋先啦，樣樣揀少少先少試牛刀，果然喺新鮮貨，食味確喺唔同，味道寧舍鮮甜，而且，蝦肉好彈牙，鮑魚好柔軟，大蜆有海水嘅鹹鮮味，且唔會有沙。

鮑魚仔、鮮蝦滑、黑毛肚、生蠔、海螺片、美滿國安格斯肥牛

再落嚟喺以二維碼落單嘅配料，除咗好快送上枱之外，成晚都無漏單。先試鮮蝦滑、黑毛肚、生蠔、海螺片，同樣食得出用料有質素，唔會有將貨就價嘅感覺。蝦滑同黑毛肚都好爽口，生蠔好鮮，且蠔味足，海螺片柔韌得嚟有啲脆口感。

再試埋啲鮑魚仔、美國安格斯肥牛，前者柔韌有咬牙，但當然唔及啲鮮鮑咁有鮑味，而後者睇落好肥，但灼熟之後入口又唔覺喎，反而充滿脂香。

黑魚片、鮮鵝腸、蝦丸、牛丸、芋頭、豆卜

晌二維碼落單部份，可以點原條嘅魚，不過小弟嫌食起嚟麻煩，就點咗黑魚片，味道唔錯，好鮮甜，肉質非常嫩滑；而鵝腸新鮮，洗得夠乾淨，唔會有啲臊味，韌韌哋，爽爽哋。

再試埋啲蝦丸、牛丸、芋頭、豆卜，算唔上話有咩特別，但食得出唔喺啲平價貨，至少兩款丸唔喺啲溝粉貨色，芋頭又粉香芋味。

豬腰花、鮑魚、生蠔、美國安格斯肩胛肥牛

去到呢個位我都差唔多，但鮑魚、生蠔確喺正，所以，翻兜一次。而豬腰花灼完之後好靚仔，食起嚟都令人開心啲。

泡芙、芒果糯米糍、藍莓乳酪

尾聲喇！尾聲喇！點都要食少少甜點先覺得完整，隨意拮咗啲泡芙同芒果糯米糍，雖然喺來貨，味道比預期好喎。來多一杯藍莓乳酪，純粹諗住幫助消化吓。本來都仲想試多才少甜品，如冰粉，但真喺好飽喇。

龍眼、哈蜜瓜、車厘茄

老友臨尾仲夾咗啲生果返嚟，誠意拳拳，就隨心食少少嚟結束今餐晚飯。

睇得見成個場保持九乘幾滿，一枱客走，又一枱客入，始終放題形式都好受香港人歡迎。此外，呢度嘅招呼幾唔錯，啲姐姐收拾好勤快，唔會堆到一枱吉碟都無人收，又會主動幫你加湯。

個人評分
味道：9/10
環境：8/10
服務：9/10
抵食：9/10
平均每人消費：HK$268

餐廳資料：
大西洋海鮮火鍋
地址：北角英皇道395號僑冠大廈地下28-31號舖
電話：2152 0348