靠得住粥麵小館 Trusty Congee King：美中不「粥」

嚟親荃灣食晏，例牌喺因為睇完早場，平啲嘛！今次就無乜心水食晏想食乜，行經「靠得住」時，見幾旺，而老婆對佢都有信心，又想食吓粥同糉，就試吓呢間必比登推介餐廳。其實個人而言，就唔喺好信呢啲名牌法力，食嘢始終好講個人口味。

嚟得早，其實未夠12:00pm，但都坐滿人咁滯。裡面裝修簡約，大部份都喺卡位，最靚位梗喺靠窗嗰排啦，但我哋就只坐晌中間嘅二人枱。

枱上放有紙巾、基本調味料，另外，開咗壺菊花杞子茶（$10），真喺幾香，茶味清雅，不過，張枱唔大，擺咗呢堆嘢，再加埋啲食物都喺緊緊夠擺。

翻一翻餐牌，選擇確實多，基本嘅有多款粥品、撈麵、湯麵，特別啲嘅有鎮店四寶、精選推介、特色小食。此外，仲有啲精選午市小菜、小菜組合。

肉丸魚腩粥 $68
靠得住以粥起家，粥品自然靠得住，而老婆鍾意食魚，目標就放晌精選魚湯靚粥系列。的確佢啲粥煲得真喺好夠綿滑，啲米粒開晒花，有米香，加入埋魚湯，感覺就更鮮甜。粥面已放咗兩大條魚腩，魚肉嫩滑富鮮味，下面仲有3粒肉丸，雖然唔知來貨定自家製，但質感鬆化。

靠得住鹹肉糉 +$28

嗌咗粥，可以以優惠價加配小食，老婆對鹹肉糉情有獨鍾，散點要$34，依家叫做平咗啲。佢哋啲糉喺做得唔錯，紥實，質感好，蛋黃仲有少許漏油，更重要喺肥豬肉唔多，啱晒老婆口味。

蠔仔肉鬆泡飯 $65

另一主食點咗個泡飯，濕濕哋啱呢啲天氣食，睇外觀份量幾足，啲飯粒分明，最怕啲餐廳明明啲飯煮過籠都照用嚟做泡飯；啲蠔仔飽滿富蠔味，有質素，加埋啲肉碎、冬菇、冬菜，幾豐富，唯可惜，個湯偏鹹，小弟相對都食得鹹吓，都覺得鹹，老婆口味偏淡，佢就接受唔到。

因為餐廳都旺，侍應唔太多，招呼算喺咁啦，關於個泡飯好鹹嘅問題，埋單後有反映俾收銀姐姐知，佢話下次早啲同佢講，叫廚房換過碗，仲話送杯豆漿俾我哋拎走飲，我話就唔需要喇，純粹提一提，唔喺貪呢啲，但服務一環肯定加番佢分。

個人評分
味道：6/10
環境：7/10
服務：8/10
抵食：7/10
平均每人消費：HK$94

餐廳資料：
靠得住粥麵小館 Trusty Congee King
地址：荃灣大河道98號如心廣場二期1樓101號舖
電話：2661 2728