讚好台灣 Zanhao TW：一「台」都喺美食

不時都會約老表出嚟食飯、聚舊吹吓水，不過，早排佢就病咗一輪，其實都係啲小病，但唔斷尾，依家佢好番晒，就約佢過嚟紅磡嘅「鑽好台灣」食吓台灣嘢 ，因為佢都幾鍾意食台灣菜，當然小弟都鍾意啦！

餐廳嘅格局都幾特別，睇門面以為喺一個大舖位，但喺原來左右兩邊喺唔互通嘅。而裡面嘅裝修都幾骨子，一室淺木色系，簡約得嚟又有份雅致感。

餐牌印刷精美，更有唔少台灣唔同景點嘅介紹，睇見都想去番轉台灣呀！由於好多頁，都有啲難影，幸好落單以剔紙仔形式，一大張落單紙就睇晒有咩食，包括台式便當、湯麵、特色乾拌麵、多種台式小吃，台式飲品又可用優惠價加配，點餐紙右下角更特別介紹咩叫做台灣嘅味道，非常有意思。

其實睇完個餐牌，真喺好多嘢都想試，因為一向都幾鍾意台灣嘢，咁兩個麻甩佬食量都喺有限，所以就一人揀一款主食，另外加啲特色台式小吃試試，而飲品有優惠，當然唔可以錯過啦。上菜速度都幾快，眨下眼就一枱都喺美食。

魚酥皮蛋豆腐 $35

魚酥即喺啲木魚碎，呢道冷盤簡簡單單將豆腐、皮蛋放埋一齊，淋上醬油再灑下大量木魚碎同蔥花。雖然簡單，但味道豐富，啲豆腐又夠嫩滑，皮蛋爽口，蛋黃好綿密，木魚碎又添了幾分鹹香味，有畫龍點晴之效。

路邊攤小拼盤 $45

如果多心嘅人就不妨揀小吃拼盤，店家共有3款小吃拼盤選擇，我哋就揀咗呢一款有逢甲鹽酥雞、 夜市小香腸同酥炸花枝丸嘅「路邊攤」，香口嘢一向就最討人歡心，再者，啲鹽酥雞幾香脆，小香腸皮脆鹹香，而花枝丸好有墨魚鮮味。

豐盛牛肉乾拌麵 $78

跟住講講主食，表哥就最想試呢一款乾拌麵，一來一碗麵包晒金錢牛腱、牛腩、牛筋、花枝丸、貢丸，二來佢話平常食得湯麵多，乾拌麵甚少食，感覺又覺得較有特色。拌勻啲青瓜絲同醬汁，麵條嘅食味同口感都好唔錯，加上啲牛腱好有咬口，牛腩鬆化，牛筋炆得軟腍入味，兩款丸都各有特色， 確喺食得豐盛。

蔥燒豬軟骨飯 $56
初時我都打算揀湯麵，不過睇見餐牌特別標明用上一級台灣珍珠米（台梗9號），加上啲便當仲會配埋4款配菜，所以，最後就改選蔥燒豬軟骨飯便當。啲飯粒果然極具米香，微微黏糯而好有咬口，只喺撈汁食都可以食晒成碗飯，而啲豬軟骨煮得鬆化，一咬即開，香濃惹味。

熱蜂蜜柚子茶 +$12

表哥就穩穩陣陣嗌杯熱柚子茶，都喺糖漿開沖，所以講唔上好特別，不過就幾鍾意隻瓦杯，幾有文青感。

珍珠奶茶 +$12

去茶記就近乎必然點奶茶，食台灣嘢又喺近乎點珍珠奶茶，今次都無例外。奶茶嘅味道幾唔錯，茶底都幾夠香，雖然有唔少冰，但飲到尾又唔會話淡咗，而啲珍珠煮到啱啱好，好咬口。

真喺要讚好「讚好台灣」，因為價錢既親民，啲嘢食味道又好唔錯，值得翻兜再幫襯嘅小店。

個人評分
味道：9/10
環境：8/10
服務：8/10
抵食：9/10
平均每人消費：HK$120

餐廳資料：
讚好台灣 Zanhao TW
地址：紅磡湖光街1-7號聯成大廈鴻運閣地下13及14號舖
電話：3175 2931