湘野 Xina Gye：「湘」得益彰

作為美孚街坊，當然知道有咩新店開業啦，而呢一間「湘野」其實開咗一段日子，不過，因為喺賣湘菜，即喺湖南菜，辣嘢嚟，所以，一直無幫襯。到最近，老死夏總話去挑戰吓，我又見間餐廳經常客似雲來咁，小弟就捨命陪大佬。

對外全落地玻璃，所以，晌外面都已經睇到餐廳燈火通明，一字長形格局，簡約裝修，淺木色系襯綠，整體感覺幾舒服。最好梗喺窗邊卡位，有街景望吓，又闊落，不過，當然被人揀晒啦。

枱側拉櫃一邊放齊筷子、匙羹、牙簽同紙巾，而另一邊喺吉嘅，唔喺放漏嘢，而喺放飯煲，因店家嘅米飯喺可以原煲咁上。

一大張紙就喺餐牌，唔少喺湖南家常菜，但好老實，湖南菜小弟都喺第一次食，雖話家常，但對我哋嚟講都喺有特色，定價亦好相宜。落單就掃二維碼，另外，一大壺麥茶先奉上。

湘野辣椒炒肉 $99

見餐牌放咗大大張相，絕對喺餐廳嘅推介，仲專登叫人叫埋手打鴨屎檸檬茶嚟襯。呢度啲餸菜真喺好夠份量，就好似呢道炒肉，一大「鑊」架，我哋揀小辣，所以，食起嚟有辣勁，卻唔會太嗆喉。而精選鄉野黑豬肉質好軟腍，除咗有青椒香，仲好有蒜香，好惹味，餸飯一流，不過，一片片薄薄透明嘅唔喺好知乜，但爽爽哋幾脆口。

泡椒牛蛙 $129

田雞好耐無食過，難得老死都啱，所以，嗌一客試試。嘩！非常之大鍋，雖然面頭放咗唔少辣椒，但食落無預期咁辣，不過，都比「湘野辣椒炒肉」辣一級，此外，仲有唔少黑木耳、枝竹作為配菜。講番啲田雞，果然好嫩滑，具辣勁，又有少少酸辣感；而黑木耳好爽脆，枝竹嗦滿汁好好食，但由於幾辣吓，小弟就淺嚐少少，其他就留番俾夏總處決。

蒜蓉粉絲活蝦 $118
就番小弟，就點一道完全唔辣嘅蒜蝦，單睇賣相就知喺好手功嘅菜式，所有鮮蝦都起晒雙飛，砌得好立體，並且墊滿粉絲，加咗勁蒜，所以，食起嚟好惹味，而蝦肉鮮甜爽彈，絕對食得出靚蝦嚟，粉絲又嗦滿汁，口感滑溜溜，正呀！

五常大米 $10碗 / $30煲

幾款餸都好配飯，一煲雖然喺抵，不過，兩個人食唔到幾多，都喺散點一碗碗先。晌大廳有個位放滿晒迷你飯煲，真喺有少少震撼感。小弟就無深究何謂「五常」，但啲飯粒好軟熟，好有飯香。

手打鴨屎香檸檬茶 $28

既然店家推薦「手打鴨屎檸檬茶」要配上「湘野辣椒炒肉」，加上食辣嘢搵杯凍飲解吓辣喺小弟「生存之道」，當然嗌番杯。果然勁大杯，仲加片薄荷葉做裝飾，睇落更清爽。飲落確喺冰涼解辣，而「鴨屎香」喺烏龍茶類，茶底濃郁又幽香，檸檬香味清新又無澀味，甜度又啱啱好，好飲！

呢個鋪位都轉過好多手，觀乎人流，似乎「湘野」可以做得更長，一來環境企理光猛，二來招呼好，服務殷勤，啲侍應又好有禮貌，個個嚟食餐飯都唔想受氣嘛，三來食物確喺有水準，何況同類餐廳晌呢區無，嗜辣嘅客人就猶如搵到新大陸。

個人評分
味道：8/10
環境：8/10
服務：9/10
抵食：9/10
平均每人消費：HK$150

餐廳資料：
湘野 Xina Gye
地址：荔枝角寶輪街9號地舖
電話：3580 1088