四季餐廳 Seasons Cafe：四季如常

如果唔喺行完山，基本上唔會嚟梨木樹商場食嘢，而晌梨木樹商場裡面，都有3間茶記，但點解揀「四季」？皆因喺老友嘅「飯堂」，其實食邊間我都無偏好，最緊要老友鍾意，反正，都只喺搵個地方攤抖吓，吹吓水，食個下午茶而已。

對上一次嚟呢度，已經喺4年前嘅事，環境就當然無乜點變，望上去都仲喺新簇喎，最緊要都喺企理乾淨啫，鋪內以卡位為主，有少量圓枱。

不過，價錢就一定有變，尤其近年香港嘅經濟，加少少都應該啦。下午茶時段，影影份下午茶餐牌出嚟俾大家參考吓。輕怡少少嘅有麵包餐、多士餐、薯條沙律餐、三文治餐、吉列魚柳餐，飽肚啲嘅就有濃湯通粉餐、迷你丼、炒粉飯麵、烤焗飯餐……等等，豐儉由人。

粒粒金磚西多士配蒜香生炸雞中翼+阿華田 $40
老友對店家嘅金磚西多士情有獨鍾，睇番上次食評，佢都喺揀呢個配搭，不過，以前賣$38，雞中翼仲有3隻，依家就縮咗水。雞翼炸得有少少黑，都未叫燶嘅，肉質就幾唔錯，外皮香脆，而「粒粒金磚」厚西多賣相立體又靚咗，比一般一塊過嘅，多咗啲炸邊位，多幾份脆香口感，搽滿牛油，沾滿糖膠，喺港式經典。

千島醬吉列魚柳包+熱檸茶 $35

小弟就揀咗份醒胃啲嘅、又輕盈少少嘅千島醬吉列魚柳包，用上長型熱狗包，包身好鬆軟，吉列魚柳大大件，炸得金黃脆口，裡面夾住好多生菜、青瓜同蕃茄，加埋啲酸咪咪嘅千島醬，令口感更清爽，正正平衡吉列嘅油膩感。早餐已經飲咗杯咖啡，下午茶就改飲熱檸茶，令自己更開胃啲。

上次整體感覺一般，而今次顯然比上次好。原本打算一次過行晒針草帽，不過，同行有其他人無咁行得，去到鉛鑛坳已接近2:00pm，再上大帽山就比較晏，只好留待下一次再挑戰。

個人評分
味道：7/10
環境：7/10
服務：7/10
抵食：7/10
平均每人消費：HK$35

餐廳資料：
四季餐廳 Seasons Cafe
地址：葵涌和宜合道389號梨木樹商場1樓129號舖
電話：2994 6338