2021年9月17日星期五

NutTea:「仁」氣奶蓋茶

講起堅果,或者果仁,第一時間就喺諗起整蛋糕,或作為零食,隨着科技嘅發展,加埋健康理念,就產生出由植物做嘅堅果奶。之前都曾經試過飲咖啡時用上燕麥奶,感覺唔錯,覺得啲植物奶唔輸蝕得過啲牛奶。「Nuttea」顧名思義就喺以堅果奶為主打,早前就趁吓熱鬧都試一試。
搭級而上,店面嘅裝潢比較多綠化,又擺咗好多堅果出嚟做裝修,仲有掛上好多人氣產品嘅靚相,有陣陣小清新嘅感覺。
原來產品都好多元化,選擇非常之多,影咗電子屏幕嘅餐牌出嚟俾大家參考,就唔細說有咩類別呀、款式呀!不過,健康嘢喺要付出多少少代價,堅果奶本身嘅成本都高,所以,店家嘅產品會比一般所見嘅茶飲店喺貴咗一截。
正所謂花多眼亂,真喺心大心細唔知揀乜好,好在門口楝咗個人氣排行榜出嚟,唔想煩,不妨以此作為參考,睇吓有無啲啱飲嘅。
此外,仲有啲季節限定、夏日限定、每日限定,亦可以考慮吓,因為,機會錯過未知幾時有返。雖然,可能都喺促銷嘅宣傳效果,如果真喺啱飲嘅,咪揀呢啲限定囉。做得特別推廣嘅,應該唔會差得去邊。
晌等候期間,仲周圍望吓,店內仲有一張有開堅果奶嘅誕生過程,見幾有趣,就貼埋出嚟,原來都有好多工序。
bowl伯爵朱古力堅果奶蓋茶 $47
揀呢個一來喺人氣排行榜奶蓋茶嘅首位,二來每日限定100杯,自然,有種手快有手慢無、唔執輸嘅心態啦,當然,伯爵茶、朱古力都喺鍾意嘅食材嚟。伯爵茶嘅茶底,配上厚身嘅朱古力堅果奶蓋,再灑上唔少唂咕粉,很吸引嘅賣相,蓋面有張小標籤教你點飲,面頭嘅朱古力堅果奶蓋好挺身,好似雪糕咁嘅質地,香濃軟滑,再試啖茶,好幽香,最後將兩者溝埋,細味濃香獨特嘅奶蓋茶,兩者喺幾夾嘅。
bowl牛油果堅果奶 $46
揀俾老婆試嘅就喺人氣排行榜堅果奶組嘅首位「牛油果堅果奶」,因為佢都幾鍾意牛油果,夠健康嘛!呢個用上花俏嘅紙杯裝,打開蓋睇睇,質感都幾杰身。牛油果本身喺味淡之物,但入口飲落都算濃牛油果味,可謂真材實料,但老婆就稍嫌佢比較杰,飲完一杯好飽肚,真喺連飯都唔使食。
初嚐堅果奶,感覺都唔錯,老婆本身都唔太飲得鮮奶,可以飲,但唔可以多,但飲完啲堅果奶就無乜狀況出現喇。

個人評分
味道:8/10
環境:7/10
服務:8/10
抵食:8/10
平均每人消費:HK$47

餐廳資料:
NutTea
中環皇后大道中151-155號兆英商業大廈地下C2號舖
8481 6591

沒有留言:

發佈留言