因為喺外賣專門店，環境、服務就無太多嘢好寫，不過，望落去，至少鋪面都企理乾淨。而當日招呼小弟位哥仔就幾好禮貌，兼詳細解釋轉套餐點搞。初時，單睇店名，以為佢哋淨喺賣漢堡，原來仲有意粉、薄餅，而飲品亦非只得汽水、梳打之類，仲有多款健康嘅冷泡茶，仲有幾多口味添，真喺估佢唔到。簡單講，任何主食加$10/$15轉為套餐，多一份薯條或蒜蓉包，前者可揀任何一款汽水，後者就可揀任何一款冷泡茶。
除咗單張所顯示嘅固定款式，仲有一啲新款式或不時出現嘅期間限定，好似呢期就見到有啲芫荽漢堡、麻辣漢堡、吉列炸蠔漢堡、藍鱈魚柳嘅熱狗，睇落甚有新鮮感，又幾吸引，所以，都揀咗一款芫荽漢堡試試。
此外，人多高興吓，可以試吓佢哋啲派對4人餐，漢堡包 x 意粉 x 薄餅 x 小食 x 飲品，選擇彈性大，實價$398，都食得過。
雖然非繁忙時段，但亦見佢哋有做埋foodpanda、UberEats，加上始終都喺即點即做，都等咗15min左右，一大袋裝得齊齊整整。
返到屋企，影番張大合照先啦，兩個餐，剛好小食試到薯條及蒜蓉包，而飲品，小弟向來唔健康，梗喺要汽水啦，老婆講健康，就要冷泡茶。
薯條、蒜蓉包 雖然由店家拎到返屋企都喺十多分鐘，但薯條始終喺即炸即食，拎到返去難免差咗少少，不過，除有茄醬，仲附送黑松露醬，自然提升番啲薯條味道，而蒜蓉包就烘到好似多士咁，較乾身而脆卜卜，兼好勁嘅蒜香。
人氣素牛肉漢堡 $98 都唔使多問，老婆一定喺揀素牛肉漢堡，其實，之前都曾經試過「未來牛肉」呢種素牛肉，質感、味道都好像真，所以，對素牛肉都好有信心。雖然，晌餐牌上都未有提及喺用邊一款素牛肉，但食落真喺幾唔錯，質感好鬆軟多汁，真喺有種食肉嘅感覺，加上塊素牛肉都幾厚身，仲有配上燒菠蘿、芝士，味道豐富。
芫荽天婦羅豚肉漢堡 $68 初睇個名，以為將啲豚肉做成天婦羅夾晌中間，真喺諗多咗，其實喺啲芫荽做成天婦羅，再夾上豚肉漢堡扒，配上一個芫荽醬汁嘅組合。雖然喺貪得意揀嚟試，但估唔到效果比預期中夾喎，當然，大前題喺你唔抗拒芫荽，炸咗之後有啲脆脆哋，而塊豚肉漢堡扒好鬆化，佢哋啲包又好鬆熟。
蜜瓜梳打、玄米綠茶 蜜瓜味嘅嘢飲一向冷門少少，小弟都甚少揀，今次純粹貪得意，蜜瓜味梳打感覺一般般啦，除非你本身好鍾意蜜瓜味；反而支玄米綠茶感覺幾唔錯，淡淡茶香，頗清新。
整體食物質素都唔錯，加$10轉套餐都好抵，我個芫荽天婦羅豚肉漢堡亦有驚喜，喺個人氣素牛肉漢堡個人覺得有少少貴，不過，有食過素嘅人都知，素食其實貴過一般嘅嘢食。
個人評分
味道：8/10
環境：7/10
服務：8/10
抵食：8/10
平均每人消費：HK$95
味道：8/10
環境：7/10
服務：8/10
抵食：8/10
平均每人消費：HK$95
餐廳資料：
Hong Kong Burger
美孚吉利徑6-8號美孚新邨第3期地下74C號舖
5432 6585
Hong Kong Burger
美孚吉利徑6-8號美孚新邨第3期地下74C號舖
5432 6585
沒有留言:
發佈留言