就在近入口旁嘅用餐區，有一組陳列櫃，趁等候茶飲時走一圈睇睇。櫃上放有好多唔同種類嘅產品，都喺店家自家工場調配嘅茶飲，有小包裝，有禮盒裝，以花果茶嚟講，定價都唔貴。
睇相就睇唔清有啲乜，幸好佢哋都備有產品單張，貼出嚟俾大家參考，產品真喺多元化，而且，除圖文並茂之餘，仲介紹埋有咩配料同功效，真喺按圖索驥，揀番自己嘅心水。
不過，現買嘅茶飲就無咁全面，包晒所有店家出品。但喺，可供選擇嘅款式都唔少，亦確喺幾特別，有別一般台式茶飲店嘅款式，更可選熱飲，同樣可以揀少甜少冰。此外，仲兼營甜品，款式唔多，但勝在精緻。不過，此刻就只剩兩款甜品而已。
茶飲定價$35-$38，而蛋糕賣$48件，故此，Tea & Cake Set就最抵嘅，每人自選飲品一杯及蛋糕一件，都喺賣$58。
士多啤梨千層批（散點價 $48） 佢哋每一件蛋糕都喺獨立盒裝，予人感覺衛生，內附小叉仔，食用都方便。而望上去外型做得有板有眼，酥皮烘得金黃，層次都分明，入口都算酥脆且富牛油香，中間嘅士多啤梨吉士亦做得香滑，士多啤梨味都十足，整體亦唔會太甜。
玫瑰荔枝慕絲（散點價 $ 48）蛋糕做成一朵玫瑰花形，賣相自然搶到唔少分，加上以少女嘅粉色系，就更増加咗打卡度。單睇外面唔知葫蘆裡面賣咩藥，一切開，底層喺海綿蛋糕底，中間仲有一層玫瑰味嘅果凍，酸香醒胃，而粉色嘅荔枝慕絲做得既柔滑，又有淡淡嘅荔枝清香，整體感覺好清新。
桂圓紅棗茶（散點價 $36） 小弟一向都偏愛桂圓，所以，揀咗呢一款以桂圓、紅棗、枸杞、冰糖所做嘅桂圓紅棗茶，但有別一般好似泰式嘅龍眼冰咁，杯內唔多見桂圓肉，但飲落又有一陣陣桂圓嘅清甜，感覺好清潤，嗰陣甜味又好純香自然。
桂花雪梨茶（散點價 $38） 老婆就好鍾意桂花陣香氣，佢本身都有買啲桂花嚟自己沖，不過，未試過配雪梨，睇樣同我杯桂圓紅棗茶好似樣，不過，唔睇張單張真喺唔知裡面除桂花、雪梨乾之外，仲有橘皮、甘草、菊花及冰糖，飲落確喺幾清甜芳香，味道多變不單一。
雖然只是一杯茶飲、一件蛋糕，但感覺已寫意悠閒，心情放鬆，香港人實在太匆匆忙忙，慢活一下亦是養生之道。
個人評分
味道：8/10
環境：8/10
服務：8/10
抵食：9/10
平均每人消費：HK$58
味道：8/10
環境：8/10
服務：8/10
抵食：9/10
平均每人消費：HK$58
餐廳資料：
好茶養生 Hocha.Elite
旺角太子道西193號MOKO新世紀廣場1樓123D及123E號舖
3153 4979
好茶養生 Hocha.Elite
旺角太子道西193號MOKO新世紀廣場1樓123D及123E號舖
3153 4979
沒有留言:
發佈留言