2021年9月7日星期二

1966 烘焙聯盟:美食「焙」審員

近期最新嘅活化景點,非「中環街市」莫屬啦,好多人就專登走過去打卡,小弟返中環工,趁食晏閃過去就非常方便。然而,較為吸引小弟嘅,都喺二樓一排嘅食店,走一圈,發覺都好多元化,而且,大多數都喺本土品牌,呢個「烘焙聯盟」唔通集合幾家本土烘焙店所組成?原來唔喺,跟店員問問,查實喺「超群」嘅新品牌,1966喺「超群」成立嘅日子。
中環都有「超群」,但呢一家「1966烘焙聯盟」所賣嘅產品就好唔同,感覺比較高檔啲、新派啲,而且,好多元化,如特別嘅蛋撻、冬甩、三文治、餡批、吐司……等等,仲有之前就晌啲飲食雜誌睇過嘅彩虹瑞士卷,都喺非常吸晴,打卡度高嘅產品。
影相都影唔得晒咁多,幸而店家都備有一啲單張,掃描出嚟大家就可以一次過了解晒佢哋有咩產品,以及價錢。
中間位有個應該喺可以立食嘅地方,擺滿晒植樹,晌整個場內都幾養眼!
不過,今次主要嚟食個輕怡午餐,所以,打算點一份三文治,再加杯飲品,如果揀熱咖啡或奶茶就有加配優惠,可惜揀樽仔凍飲就要俾原價,天氣咁熱,都喺揀凍飲吧!
bowl咖喱牛肉三文治 $38
因為鋪後有廚房,三文治都喺即點即製貨色,而包裝盒好似漢堡包咁,打開見店員加多片膠膜冚住份三文治,感覺更衛生。
三文治內除咗有咖喱牛肉,仲有生菜、炒蛋,不過,咖喱牛肉非一片片嗰種,喺做成免治一種,而且較薄身,如果做成前者,一片片咁,相信口感更佳,幸而個咖喱都做得香。厚厚嘅炒蛋就做得唔錯,炒得嫩滑,無炒過老,整體而言,味道方面着實唔錯。
bowl港式樽仔奶茶 $22
因為喺原支咁雪凍,所以,除咗夠冰涼之外,飲到尾味道不減,唔會被冰粒溝淡。實際上,飲落頗有茶記風味,茶底香濃,茶奶比例好,又有滑溜感,算喺有水準嘅港式奶茶。
午餐食完,覺得啲產品唔錯,就試埋個冬甩鬆餅同山形吐司,前者店員就介紹做法有別傳統冬甩,所以叫冬甩鬆餅,就當下午茶,後者亦話以湯種麵糰製作,故此就當早餐。
bowl朱古力冬甩鬆餅 $20
因為成個冬甩都冚咗層朱古力「脆皮」,所以,影出嚟「黑鼆鼆」(音:蚊),可能睇得唔清楚,但裡面並非以油炸嘅麵糰嚟做,而喺食落就會感覺到喺以美式鬆餅做冬甩嘅身,口感比較實在,帶點濕潤,由於鬆餅喺朱古力口味,加埋外層嘅朱古力皮,整體嘅朱古力味喺非常濃郁。
bowl綠茶紅豆山形吐司 $34
以日式湯種做麵包都唔喺咩新鮮事,然而,呢種做法嘅麵包就特別鬆軟。單喺睇外貌嘅綠茶,就知道綠茶嘅味道有番咁上下香濃,確實,入口綠茶味真喺超突出,十分幽香,而包身嘅口感非常柔軟,雖然,裡面混入嘅紅豆唔算多,但啲紅豆本身就好飽滿清甜,老婆就大讚超好食!
今次,雖然都只喺試吓啲三文治呀、冬甩呀、山形吐司呀,但都感受到嗰份製作認真,用料不賴嘅誠意。

個人評分
味道:8/10
環境:7/10
服務:8/10
抵食:8/10
平均每人消費:HK$60

餐廳資料:
1966 烘焙聯盟
中環皇后大道中93號中環街市2樓246B號舖

沒有留言:

發佈留言