2021年8月30日星期一

霜瀛 Shimoumi Sushi:「霜」機無限

食「廚師發辦」(Omakase)向來都喺高消費嘅項目,尤其是要喺有番咁上下水準嘅。要同級數,但又想平啲,都有辦法嘅,就喺食午餐,當然,一餐「廚師發辦」動輒要兩個小時,喺要慢慢享受至得,所以,趁星期六、日嚟就最好,放慢腳步慢慢細味,渡過一個愉快滿足嘅周末。最近,就到訪咗上環嘅「霜瀛」,食到餐好嘅「廚師發辦」,價位又比起晚市便宜一大截,可謂一箭「霜」鵰。
餐廳入口,需經酒店電梯先可以到達,角落嘅樓梯只到一樓嘅「淼屋」,雖然,上到二樓,餐廳嘅門面唔顯眼,不過,內裡裝潢卻一派和風,淺木色系為主調,襯以淺灰色皮座椅,加上柔和嘅燈光,感到蠻舒服。
食「廚師發辦」嘅最佳位置當然喺可以直接面對師傅嘅板前席,因為可以睇到師傅切魚生嘅刀功、揑壽司嘅手勢,以及跟佢哋嘅互動,喺學嘢嘅好時機。全場只有一張U形板前席,僅得10個位,加上疫情關係,寧願做少幾個客嘅生意,唔使等啲隔板影響晒成個場嘅美觀,將客人安排隔開啲嚟坐,一定開唔足,就更加珍貴。板前席上加設聚焦嘅燈效,影起食物上嚟嘅效果更好。
如果食其他定食,非「廚師發辦」或壽司家食,尤其嚟食晏,靠窗有兩張木枱,亦喺理想座位,因為挨住落地大玻璃,感覺更開揚。如天氣好,透入燦爛陽光,予人心情就更好。此外,餐廳內仲有兩個個室,因為有客人,就不便參觀,就更加唔方便影相。
晌呢啲中高檔餐廳,除咗環境,餐具及服務都喺值得留意嘅一環。一碟、一杯都好古雅,就連筷子托都特別別緻,之後盛載之食物嘅器皿亦都賞心悅目;而服務方面,好熨貼,侍應落單時會先問問有無嘢唔食得,或食物敏感,態度既有禮,又不時添茶及收拾餐具。師傅上菜嘅速度,亦喺恰到好處,令人用餐感到悠閒唔急促。
仲有,枱前擺放一些小花束,初時真喺以為純粹當裝飾,美觀一下,原來亦會用嚟作擺盤之用,一陣晌部份菜式上,你就會見到佢哋嘅蹤影。
先分享餐廳嘅主餐牌,外觀都好別緻,主要都喺做「廚師發辦」,分別有兩個價錢:$1,680及$1,380,當然,價錢貴啲,內容又豐富啲,其次,就喺單點嘅壽司同刺身。
再介紹喺午市套餐,午市定食共有9款選擇,定價為$238-$468,豐儉由人,已包括沙律、蒸蛋、麵豉湯及甜品。此外,就仲有1款「霜瀛日本A4和牛午餐」,定價為$980,以及1款「霜瀛廚師精選午餐」,亦即是「廚師發辦」,定價為$880,包含嘅菜式非常豐富,對比主餐牌嘅「廚師發辦」,嚟食午市真喺划算好多。
bowl田園沙律
睇樣確喺平平無奇,然而,師傅介紹時,沙律菜喺嚟自澳洲,感順會爽滑啲,襯上自家製凱撒汁,灑上少少白芝麻,的確啲沙律菜好鮮爽,個汁又唔會得個酸字,熱吓身,等客人打開胃納。
根據餐牌,食完沙律就喺上刺身,加上又真喺見住師傅切緊幾款魚生,點知,侍應從廚房捧出一份賣相別緻嘅「前菜三點」,食「廚師發辦」就喺有呢啲驚喜,失驚無神多樣特色菜。每逢上菜,師傅都會介紹一下,包括食材及其亮點,有時有啲特別嘅煮法都會分享。
bowl水雲
墨綠色嘅水雲,其實喺啲藻類,滑滑溜溜咁,好有營養價值,配咗啲酸醋汁,食起嚟酸爽醒胃。
bowl秋葵漬
師傅話啲秋葵喺自家醃,平時食秋葵,有啲黏黏潺潺感,今次醃漬咗,口感比較爽,無咗嗰種滑潺感。
bowl溫室蕃茄
比預期稍為有啲酸,但蕃茄味好濃郁,感覺酸爽鮮活,加上溫室嘅,自然更加健康啲。
師傅醒碟醋物俾我,用作間場,用嚟清一清味蕾,醋物喺啲鱆魚粒、青瓜片。
此外,仲有啲自家製嘅子薑,同樣喺食刺身或壽司時間場之用,啲子薑食落幾爽脆。
卒之到刺身登場啦,師傅為咗賣相靚,每次都以3款刺身嚟上碟,比起一件件上自然靚好多,先喺3款白身魚:鮫鰈魚、深海池魚、間八。
bowl鮫蝶魚薄切
之前都食過一次,但就真喺少接觸,薄切盡顯師傅刀工,每一片厚薄均一,並且薄至透光,灑咗少少柚子青提味,師傅就建議沾丁點醋。魚味比較清,質感就有少爽爽哋,另加一小件火炙裙邊,有份香口爽滑感。
bowl深海池魚
好多時食「廚師發辦」都有呢一款魚嘅蹤影,可以講喺常客,肉身晶瑩帶點淡粉色,師傅特登晌刺身上鎅幾刀,増加美感。襯上少少紫蘇,顯得格外幽香,而食落肉質嫩得嚟帶爽口,魚鮮味頗突出。
bowl間八
印象中,呢款魚應該喺第一次食嘢,感覺較陌生。然而,師傅整得好靚,加咗少少黑魚籽,以及金箔,立時變得好矜貴,而底下燒一燒過嚟,故食起嚟帶點油潤,但魚肉依然好鮮味。
再上另外3款非魚類嘅刺身,整體賣相同樣吸晴,而且,絕對喺用料無欺場,包括南非鮑魚、赤貝、果蝦,晌做法上更加咗好多技巧,真喺睇見都開心啦。
bowl南非鮑魚
先經過慢煮,所以,鮑魚非常軟腍,唔會韌到好似擦紙膠,而且,好有鮑魚嗰份甜味,口感柔韌;鮑魚下面仲有啲壽司飯,更加入少少鮑粒,可以講喺口感豐富。
bowl赤貝
望上去好有光澤,唔喺單單切成刺身就算,加多幾刀鎅晒花咁,仲唧咗啲檸檬汁落去。故此,乜都唔使沾就可以放入口,貝肉十分爽彈,卻又帶點韌勁,喺跟食魚刺身嘅另一種體驗。
bowl果蝦
希望我無聽錯或寫錯,初時以為喺牡丹蝦,原來喺一種叫果蝦嘅種類,不過,口感有啲似牡丹蝦,肉質帶黏,伴以自家製蝦膏醬,喺以鮮蝦膏抽出嚟唔加任何嘢去煮,所以,鹹鮮味好強。
bowl赤身、中拖羅串
餐牌就寫明喺刺身6貫,以為完咗刺身部份,睇住師傅整呢串刺身串,以為喺整俾隔離枱,原來喺俾小弟,又多一份驚喜。赤身配上芥末,中拖羅配上海瞻,可謂雙重口感,雙種滋味,真喺賣相與味道兼備。
bowl北海道帆立貝
正所謂好事成雙,(驚)喜事連連,師傅見我識欣賞佢啲壽司啩,醒多一件火炙帆立貝俾我,新鮮嘅北海道帆立貝,輕輕燒一燒,以紫菜包住食。帆立貝鮮甜無比,又厚肉,更驚喜喺搽咗一陣黑松露油,有微微黑松露香,卻又唔會太搶其鮮味,有趣。
bowl鱈魚片
真喺一不離二,二不離三,師傅話準備下一段壽司時間,就先送碟鱈魚片,俾我過過口癮。每片做成半塊麥芽餅乾大細,既薄且脆,沾少少沙律醬,感覺更香口,多謝師傅嘅心意。
睇住師傅捏壽司飯嘅手勢、功架,柔中帶剛,已喺一件賞心樂事。壽司部份就真喺跟番餐牌俾足6貫,雖無同場加映,但選材、細節位一樣有驚喜。
不過,未食壽司前,師傅專登整咗粒飯俾我試,等我嗒出飯粒嘅真味同其搓飯嘅感覺,用上日本米就唔使講啦,夾起嚟唔會散晒,入口極之鬆軟。順帶一提,在枱前新放上一塊墨綠嘅雲石碟,非常雅致。
提多樣細節位,師傅由魚生從雪櫃拎出嚟,到切好,都攤過一陣備用,更不時以手背去量吓啲魚生嘅溫度,會唔會仲喺好冰凍、適合俾客人食未。
bowl銀鱈魚壽司
首先登場喺銀鱈魚壽司,銀鱈魚經過微燒,等魚肉滲出丁點魚油,卻唔過火,跟食煎過嘅銀鱈魚好唔同,魚肉非常嫩滑細緻,只帶微微油潤,感覺一樣好好。
bowl北寄貝壽司
近年都算食多咗以新鮮北寄貝所做嘅壽司,跟平常迴轉壽司食嗰啲紅紅哋嘅平價貨色好唔同,淨喺明亮光澤嘅外觀已彈出咗。處理上,燒燒個底先做,師傅解釋咁做會令北寄貝更出到佢陣甜味,再加點檸汁,好清新,貝肉有種爽脆感。
bowl喜知次壽司
帶點紅紅嘅喜知次,火炙過,並塗上少少醬油提味,所以,變得額外富油香,肉嫩而帶點膠質,魚味頗濃;而驚喜位喺中間放咗一啲萬能蔥,味道清香,可平衡一下魚油嘅油脂。產自九州嘅萬能蔥,「萬能」喺個名字而已,萬唔萬能,睇你點利用啦,哈哈!
bowl大拖羅壽司
刺身部份就試咗赤身、中拖羅,估唔到嚟到壽司部份可以試埋大拖羅,一睇樣你就知啲油脂幾豐富,而且,分布平均,所以,入口真喺好有油香,誇張少少講有種入口即化嘅感覺。師傅仲磨咗少少宮城櫻花鹽,不過,可能睇相就睇唔出嚟,更能吊出魚鮮味,比醬油感覺會有啲唔同,又喺另一種體驗。
bowl右口魚邊壽司
本身喺晶瑩剔透嘅白身魚,但火炙過後,一身古銅色,加上在魚身上鎅晒花,顯得非常亮眼。入口陣陣油香,真喺一件比一件濃味,而肉質帶點煙韌,比無燒過嘅右口魚喺截然不同嘅感覺,細節位喺師傅加咗少少柚子青,晌油潤嘅味道中,滲出一點點清新。
bowl馬糞海膽壽司
不經不覺,嚟到最後一款壽司,平常海膽都會做成軍艦,但今次師傅搞搞新意,紫菜就放晌中間,佢話咁就唔會擺太多紫菜,而影響咗海膽嘅味道。馬糞海膽即喺馬糞海膽,只要處理得好,鮮甜味就非常突出,而且,口感甘香豐腴,綿密細膩,仲有種甘甜嘅餘韻。
bowl迷你丼
之前食過好幾次「廚師發辦」,去到呢個位,都喺以吞拿魚刴成蓉做手卷,但今次晌「霜瀛」,就做成一份幾小口嘅迷你丼,有吞拿魚蓉、萬能蔥、三文魚籽作為組合,而啲三文魚籽好特別,以醬油、味琳漬過,甜甜哋咁,總之,就算迷你丼都做得好有心思。
bowl霜瀛日式蒸蛋
無論定食,抑或「廚師發辦」,茶碗蒸 都喺「常客」,印象中,都好似未遇過啲難食嘅茶碗蒸。今次所品嚐嘅茶碗蒸都好有水準,蒸蛋本身非常滑溜就唔在講,而且,甚具蛋香,裡面更混有不少元貝絲、冬菇、魚肉,真心好食。
bowl麵豉湯
餐牌就咁寫住麵豉湯,加上又喺午餐,初時,都諗住喺普通嘅麵豉湯,飲落你就知好唔同。原來,加入大蜆去煮個湯底,再加上木魚碎,成為一道海蜆麵豉湯,故此,個湯好鮮甜,既有麵豉嘅香味,又有陣陣海水嘅鹹鮮味,讚呀!
bowl甜品
都預咗喺雪糕嚟,不過,口味都有驚喜,有少有嘅栗子口味,亦有第一次聽到嘅益力多口味,仲有一款,不過,就唔記得。小弟揀咗栗子口味,味道非常清甜,而且,富奶香,最有心思喺雪糕中仲有啲栗子粒粒,非常好食。好奇問師傅喺咩品牌,佢只透露喺日本貨直送。
全程唔止Yoshi師傅招呼周到、俾咗好多驚喜,兩位侍應亦都招呼得十分熨貼,如收碗、換碟、添茶都喺恰到好處。今餐飯,唔止食到好嘢,仲試咗多款首嚐嘅食材,又再長知識喇。每一次「廚師發辦」嘅體驗,都喺一次學習嘅機會。

個人評分
味道:10/10
環境: 9/10
服務:10/10
抵食: 9/10
平均每人消費:HK$970

餐廳資料:
霜瀛 Shimoumi Sushi
上環蘇杭街57號香港嘉賦酒店2樓
3188 8007

沒有留言:

發佈留言