小茶屋 Kochaya：「茶」明真相

早前晌豉油街嘅「阿四車仔麵」食完晏，行返過去地鐵時，偶然見到呢一家似喺賣台式茶，但主打以日本直送茶葉去泡茶，加上見到啲人揸住店家嘅「罐裝」出品晌門口打卡，覺得頗為特別。上次因為食得飽，就未有試，今回再出旺角，就到訪拜會一下。

門口企咗唔少等成品嘅客人，就知幾夠人氣， 從門面望入去所見，裝修都比較日系，以金色配襯淺木，唔會太浮誇，但又有種高雅感。

平常台式茶飲店所見，不外乎烏龍、鐵觀音、四季春……等等，但呢度嘅就喺抹茶、焙茶、玄米茶同煎茶，真喺比較特別。而每一系列都喺4、5款配搭選擇，唔算話好多，但夠精，同埋至緊要喺啱飲。再者，我諗都喺要襯番日本茶葉嘅特性，都唔可以亂溝。如大多數茶飲店，可以額外加配料，如椰果、蘆薈、珍珠……等等。

除咗用日本茶葉泡茶呢個賣點吸引我之外，另一亮點喺其罐裝拉環式嘅設計，晌中環一家賣尼泊爾餃子店都飲過啲特飲喺用呢個方式製作，不過，就未見過個機嘅真身，今次，就叫做近距離「接觸」，比起用膠杯膠蓋嘅，拎返屋企就更穩陣。

鮮奶黑糖珍珠玄米茶 $38

黑糖喺小弟首選，平常食日本嘢都會遇到玄米茶，但做成茶飲，真喺初體驗。剛沖好出嚟嘅賣相非常之靚，下層喺牛奶，上層緩緩向下滲嘅喺玄米茶，再淋咗少少黑糖，非常有層次感。店員叮囑飲嘅時候要搖勻，呢個當然啦，入口好神奇，有茶味，又有米香，加上牛奶嘅乳滑純香，真喺得喎，加上珍珠煮得啱啱好，煙韌而有咬口，仲滲出黑糖香，非常滿意！

菠蘿百香果煎茶加椰果 $36

老婆就喺百香果鐵粉，正正就有呢一款煎茶有咁嘅口味，所以，完全唔使諗揀邊款。除咗百香果，仲加入菠蘿汁，一身金黃色，頂頂一層奶蓋，老婆講笑咁講話點解幫佢揀咗罐凍啤！入口非常清爽，而味道甜甜酸酸，既有菠蘿嘅清甜，又有百香果嘅果香，好平衡，底下仲混入好多椰果，有得飲，又有得食。

平常飲用抹茶呀、玄米茶呀，都喺熱茶「淨飲」居多，第一次品嚐日本泡嘅特色茶，感覺真喺幾特色，最估唔到效果出奇地夾、出奇地好。有無咁誇？你嚟買杯試吓，查明一下真相咪知囉！

個人評分
味道：9/10
環境：7/10
服務：8/10
抵食：8/10
平均每人消費：HK$37

餐廳資料：
小茶屋 Kochaya
旺角豉油街29號地下4A號舖