Pancake House HoiHoi：「薯」不簡單

早三個月前左右，同老婆睇完戲，晌「荃灣廣場」嘅一家美式餐廳，帶佢初嚐梳乎厘班戟，佢非常鍾意，仲話有機會要再試試。最近，同食友傾開偈，講關於啲梳乎厘班戟，佢就話日本過江龍，有名古屋No.1嘅「Pancake House Hoi Hoi」晌「荃新天地」開咗新分店，地點就晒我哋，所以，搵晚過開嚟就試試佢哋嘅梳乎厘班戟質素喺點。

整體裝修簡約，襯以木系枱櫈，淺木色配淺墨綠色，又擺咗少少植物作點綴，滲出點點田園風。我就最鍾意喺棟起咗啲大透明膠板做間隔，既唔會遮擋咗啲空間，又有明顯嘅防疫功效，我哋亦專登揀坐一角，感覺就更安心。

廚房採半開放式，睇到師傅晌廚房前不斷製作梳乎厘班戟，密密做。

此外，每枱地下都會放置一個不織布方籃，供客人擺袋、擺背囊，喺幾貼心嘅安排。仲有，職員嘅服務又幾好，笑容就睇唔到，但禮貌十足，態度親和。

店家主打就喺梳乎厘班戟，所以，主餐牌就有足足8款選擇，可謂各有新色。

此外，亦不時有啲期間限定。我哋就喺晌IG見到呢期喺紫薯，非常有興趣。

除咗梳乎厘班戟，仲有啲夏威夷班戟，感覺如一般常見到嘅美式班戟，但就厚身少少，既有甜食嘅，亦有鹹食嘅。此外，仲有啲主菜類，如三文治、薄餅、牛扒、全日早餐、漢堡……等等。

飲品方面，主打有唔同款式嘅咖啡，以及冰搖茶、果汁、沙冰、精品茶……等等。

依家正正喺盛夏，仲見有多一系列日式刨冰，同樣喺夏季嘅限定，個餐牌無寫供應到幾時，所以，有興趣試嘅朋友仔就最多趁早，又或嚟之前打個電話問問，免得摸門釘。

石榴汁 $39

夜咗，老婆怕飲茶會瞓唔到，所以，清新嘅揀杯果汁，加上果汁標示為鮮果汁，感覺會健康啲。的確，飲落石榴果香都幾濃郁，酸酸甜甜，感覺頗為清新。

焦糖牛奶咖啡 $39

因為會揀一款梳乎厘班戟，所以，點都會搵杯鮮奶咖啡嚟襯一襯，而當中，就以焦糖牛奶咖啡喺最心水。雖然個拉花唔喺咩好複雜嘅圖案，至少都工整，咖啡表面都好平滑；而入口咖啡味好醇厚，非常芳香，仲有突出嘅焦糖味。

夏威夷班戟漢堡配牛油果、蝦、蜜糖芥末醬 $108

作為鹹食，我哋都對個夏威夷班戟漢堡都幾感興趣，一來未食過，二來見個配搭應該幾清新。出嚟嘅賣相都幾討好，漢堡面更烙上餐廳名字，除有牛油果蓉及鮮蝦，仲夾有大大片蕃茄及生菜，色澤鮮明，就算配以大堆炸薯條，都完全無邪惡感。

由於以班戟做包身，所以，口感非常軟綿，而牛油果蓉混入蜜糖芥末醬，食落去味道有層次，加埋鮮爽嘅蝦肉、鮮甜嘅蕃茄、新鮮嘅生菜，真喺感覺清新；伴菜嘅薯條炸得極之香脆，卻喺一啲都唔油。

沖繩紫薯梳乎厘班戟 $108

不愧為人氣產品，當晚目測，超過半數嘅客人都揀呢一款期間限定嘅口味，睇住一碟接一碟咁送出。的而且確，賣相真喺幾華麗高雅，面層嘅手工紫薯蓉一條一條如綿繩般冚實晒啲梳乎厘班戟，堆到成個小山丘咁，襯以士多啤梨及糖漬栗子，已值回票價。

先食咗粒栗子，好粉甜，再落刀切開件班戟，啲紫薯蓉軟滑到呢，真喺唔食都知好好食嘅感覺，見介紹牌寫住加咗馬卡風芝士去做，怪不得入口幼滑如忌廉般，兼且薯味十足，不愧嚟自沖繩嘅紫薯，而且，睇橫切面就知啲紫薯蓉份量絕無欺場；班戟部份鬆軟綿綿，空氣感強，微微濕潤，極有蛋香，再沾上打得極輕盈嘅忌廉，可以講喺完美組合。

咪睇我哋就咁食吓班戟，一份鹹點，一份甜點，其實都好夠飽，尤其啲紫薯，食落都幾飽肚吓。而老婆對兩款班戟都好讚賞，加上紫薯亦喺佢「飛弗」之一，自不然更討佢歡心。

個人評分
味道：8/10
環境：8/10
服務：9/10
抵食：8/10
平均每人消費：HK$150

餐廳資料：
Pancake House HoiHoi
荃灣楊屋道1號荃新天地1樓117號舖
2383 3860