2021年7月14日星期三

一盅點心 Dim Sum Gathering:為你「盅」情

同老婆飲茶食點心,佢就鐘意去酒樓,覺得有飲茶嘅「氣氛」,並且,大多數跟屋企人多,尤其疫情之下,更加唔會約朋友嘆茶。再兩日晌元州街嘅「米線樂」食米線,之後偶然見到「青山道」一角落有家點心專門店「一盅點心 」,天藍色襯白嘅門口,晌青山道顯得特別醒目,所以,趁老婆做義工出開街,帶佢嚟點心專門店嘆點心。
嘆茶、食點心真喺香港人嘅志愛,以前就話朝早、晏晝飲茶先有點心食,依家就咩時間嚟得。踏進餐廳,真喺有唔少客,留意到客人跟老闆嘅對話,就知唔少喺街坊客。而餐廳環境都闊落,裝修精簡,並貫徹門面,都喺以藍白色為主調,以4人枱為主。門口已備有消毒液,依家大多數餐廳都會咁做。
餐具整齊放好晌枱上,店員好有禮,放低洗餐具用嘅膠兜後,就問問有咩茶,有普洱、鐵觀音、香片,順帶一提,茶錢收$4位,但就無加一服務費。
咁就順便介紹埋有咩點心食,一大張點心紙羅列晒所有款式,選擇非常之多,小弟就唔嘥口水講有咩分類,反正貼出咗張點心紙,一目了然,當中有好幾款特別嘢,又喺素嘅,就更加啱食。
此外,仲有啲全日套餐,比起散點划算好多,又啲喺配蒸飯或糯米雞,絕對喺飽肚之選。
bowl千島脆炸蘿蔔糕 $33
平常晌酒樓食蘿蔔糕,一喺煎,一喺蒸,炸嘅印象中都好似喺第一次,而炸蘿蔔糕出嚟嘅效果又幾好喎,首先喺外層嘅脆漿酥脆香口,卻一啲都唔油膩,其次,裡面嘅蘿蔔糕好軟綿,好有蘿蔔嘅清甜味,再加埋一啲酸酸香香嘅千島醬汁、芳香嘅木魚碎,更令味道多變化。
bowl金菇銀芽脆皮腸 $35
素腸粉都比較少有,所以,見呢度都有提供,就嗌俾老婆試。腸粉外皮好嫩滑,又有米香,而顧名思義,裡面就喺捲住金菇、銀芽,不過,仲有一層脆脆嘅內層,唔喺太知喺乜,但非常脆口,配合上軟滑的腸粉皮,口感甚有驚喜。
bowl古早黑糖糕 $23
我哋都幾鍾意黑糖嗰陣陣清純甜味,所以,又試一試呢個古早黑糖糕,初時以為類似馬拉糕之類,原來喺類似黃金糕嗰種。咬落去軟軟糯糯,卻唔黐牙,好有韌性,黑糖嘅清純甜味亦好香,當甜點嚟食都得。
bowlC飽肚點心拼盤套餐 $58
呢一款套餐可以晌6款主食中揀一款,有蒸飯,有糯米雞,糯米雞相對較有特色啲,所以,主食就要經典糯米雞。真喺好夠份量,打開荷葉,拆開啲糯米飯,睇落都好足料,糯米飯好綿、好黏糯,內有火腿、雞件、冬菇、鹹蛋黃……等等,食味認真唔錯。
而套餐中嘅點心拼盤就包咗3款指定嘅點心:懷舊燒賣王、尖筍蝦餃王、XO醬菜苗餃,賣相好精緻。燒賣王食落唔止得豬肉餡,下底仲包咗蝦肉,所以,多份鮮爽感覺;而蝦餃王加入少少尖筍,令本身爽彈嘅蝦肉變得更好食;至於XO醬菜苗餃則由老婆搞掂,佢話菜苗好嫩口,XO醬令其更惹味,味道唔會好寡。
bowl白灼靚生菜 +$8
無諗過叫灼菜,不過落單時,店員提一提點套餐,可以加$8有碟菜,都好喎,雖然揀咗唔少素點心,但食番碟菜都好。味睇只喺灼菜,碟生菜淥得啱啱好,咬落去仲喺嗦嗦聲,好爽脆。
今次到訪點心專門店嘅感覺好唔錯,除咗環境闊落好坐、店員招呼勤快有禮之外,更因為試到多款咁有特色嘅點心,重要嘅喺味道一啲都唔失禮。隨後,已順便推薦咗俾住晌附近嘅親友,等佢哋打算食點心時又有多一個好選擇。

個人評分
味道:8/10
環境:7/10
服務:8/10
抵食:8/10
平均每人消費:HK$83

餐廳資料:
一盅點心 Dim Sum Gathering
長沙灣青山道152號地舖
2368 6039

沒有留言:

發佈留言