嚟工廠區，有時真喺要尋尋覓覓，餐廳地址標五芳街，但其實入口開晌彩虹道，加上應該喺攞工廈食堂牌，無招牌，差啲過門不入。而入到餐廳內，跟工廈又喺另一個世界可謂別有洞天，裝修帶點日系嘅西餐廳，天花掛上大量乾花，兩邊天花線位放滿綠油油植物，加埋有點和風嘅吊燈，予人有種小清新嘅感覺。
除咗地方大之外，柔和嘅燈光，寬敞嘅卡位，都讓人坐得好舒服，再者，外面正午上到成34°C，晌室內則「涼朕朕」，就梗喺更加寫意啦。此外，睇到餐廳將都分隔一段距離，又以大大塊膠板阻隔，心理上點都安心好多。
題外話，入門口時侍應向每人派張卡，印有餐廳名，初時唔為意，坐低再睇睇，先留意到喺口罩套，又幾細心喎。其實，呢度嘅服務都幾好吓，侍應有禮，快手收拾已用餐完畢嘅碗碟，又不時為你添水。
嚟之前都有睇過啲食評，平日有午餐供應，都幾抵食，主菜連餐湯及飲品，都喺一百蚊樓下。不過，周六日就轉為周末早午餐，選擇有沙律、意粉、飯品、主菜、甜品、飲品……等等，但選主食就只包餐湯及蒜蓉包（加$18可配是日沙律），其他都要額外另點。難得咁耐無聚，當然食得豐富少少。
餐叉同匙羹都放晌枱上嘅小木盒之內，但如果食到扒類食物時，侍應先會再送上餐刀，不過，我就喜歡放晒晌枱俾客人自由取用，最好仲有啲蓋可幾冚住，感覺就更衛生。
蕃茄忌廉湯先登場當然喺餐湯，橙紅色嘅蕃茄忌廉餐，質感做得幾滑溜，味道帶濃郁蕃茄味，微微哋酸，感覺唔錯。不過，所配嘅蒜蓉包又薄又細塊，未免hea咗少少。
蒲燒鰻魚飯 $98 舊同學頗喜歡日食，所以，揀咗呢一道蒲燒鰻魚飯，原條日式鰻魚鋪晌飯面，灑上紫菜碎及芝麻，襯以蛋絲及時蔬，外觀都幾唔錯，味道呢？舊同學話條鰻魚燒得好香，咬落綿滑帶油香，而個蒲燒醬汁濃郁、惹味，下低嘅白飯粒喺日本珍珠米，軟綿而黏糯。
法式燉煮羊膝配白飯 $138 又有羊類主菜，早幾日晌美孚先食過羊膝，我又唔介意再食。同樣，羊膝嘅份量依然大大隻，小弟選咗配飯，配埋啲燉蔬菜，賣相甚有睇頭。啲羊肉一切就開，輕易骨肉分離，肉質燴到好鬆化，醬汁則濃香度啱啱好，跟羊肉所帶嘅微微羶香好平衡，確實好食。
提拉米蘇窩夫 $88 見餐牌中有一款提拉米蘇夾窩夫嘅甜品，好似幾得意，好奇想知喺點，就試一試。原來喺以雞尾酒杯做出提拉米蘇，再插上一件窩夫，賣$88其實定價有啲貴。不過，提拉米蘇部份做得唔錯，最底層嘅蛋糕浸得透透咖啡酒，口感濕潤，而中間嘅馬卡風芝士打得輕柔軟滑，面層灑滿咗唂咕粉。而件窩夫都好脆口，配一抹提拉米蘇，效果幾好。
是日精選蛋糕配飲品 $48 甜品一欄有呢個非常划算嘅組合，而是日嘅蛋糕喺巴斯克芝士蛋糕，「巴斯克」喺指將啲芝士餅焗燶啲，做成焦焦哋嘅效果，不過呢一件真唔算好喺「巴斯克」，但襯以忌廉及橙乾，賣相好靚。而芝士蛋糕嘅味道很有濃郁芝士味，質感綿密卻好軟熟。
鮮奶咖啡 甜品都喺襯咖啡最搭配，而咖啡中，小弟都喺較鍾愛鮮奶咖啡。好鍾意呢一類瓦杯，有時飲咖啡都要有啲意境，個心形拉花都算唔錯，花紋細緻，表面亦好平滑，唔會起泡泡。小呷一口，咖啡嘅味道十分醇香，帶點果仁嘅香味，奶泡亦打得綿密。
凍蜜桃茶 $36 舊同學就要杯冰凍嘅蜜桃茶，佢話夠爽、夠解渴喎，實際上味道都幾好，嗰份蜜桃味幾清甜，確喺有陣陣桃香，雖然唔知茶底喺咩茶，但芳香好飲。
席間，講起好多昔日讀書年代嘅往事，轉眼間都變咗好多，無錯呀，就好似依家啲啲工廠區都唔同晒啦，加上鐵路都四通八達，小弟家住美孚而靠近西鐵一邊，所以，屯門都入多咗，估計第時土瓜灣、九龍城、新蒲崗一帶都會嚟多咗呀！
個人評分
味道：9/10
環境：8/10
服務：8/10
抵食：8/10
平均每人消費：HK$225
味道：9/10
環境：8/10
服務：8/10
抵食：8/10
平均每人消費：HK$225
餐廳資料：
Coti the Bistro
新蒲崗五芳街31-33號永顯工廠大廈地下C號舖
3575 9983
Coti the Bistro
新蒲崗五芳街31-33號永顯工廠大廈地下C號舖
3575 9983
沒有留言:
發佈留言