2021年7月5日星期一

柏景餐廳 Café on the PARK:盛夏「泰」狂熱

自疫情開始,都無專登走去食自助餐喇,因為覺得感染風險少少高,不過,隨着疫情緩和,加上之前去過兩次「宅渡假」,都包自助早餐,睇到酒店都做咗唔少防疫安排,啲人亦頗自律,所以,對自助餐嘅感覺都安心不少。本土個案勉勉強強算喺28日清零,豪一餐當應吓景吧!揀「柏景餐廳 」除質素外,亦因為有大嘅折扣,以及方便我哋啲美孚人,食完搭西鐵兩個站就到。
因為相對小弟嚟講,都真喺好就腳,計及多年喛都嚟過好幾次,餐廳嘅環境無咩大變,但甜品擺放嘅位置就有所調動,擺得更集中。而餐廳簡約時尚,地方寬敞,座位編排得唔算密,枱與枱都隔開得一定嘅闊度。
由於今期嘅主題喺 「泰•尋味之旅」,泰菜一向都幾受港人歡迎,而場地佈置都可以睇到花咗唔少心思,有唔少相應主題嘅裝飾,近正門一邊嘅佈景版,真喺見到有啲姐姐專登企晌度打卡,直情當去咗泰國一轉。上文都講過佢哋嘅自助餐經常有折扣優惠,平日成人一位收$608,預早經官網訂位並繳付全費最高去到6折呀!
上文都講過依家啲酒店做自助餐,都加強咗好多防疫安排,好似呢度咁,有部份食物需由廚師服務,就算喺自取嘅,都有晒透明膠罩冚住,再者,凡出去拎食物嘅客人,都需要戴上口罩。講咗咁多,一於去片睇吓有咩食。由門口開始順住介紹,最後再返嚟門口位嘅甜品區。
bowl海鮮吧
以前嚟過,都知佢哋無供應生蠔,始終都喺高風險,個人嚟講,食唔食都好無所謂。但仍有大蜆、翡翠螺、凍甜蝦及長蟹腳,我就見幾多客人不停拎長蟹腳喇,但補給都幾快。
bowl沙律區
晌海鮮吧隔離就喺沙律區,眼見得少少沙律菜、栗米粒、紅腰豆同青瓜,心諗以前嚟都唔喺咁少架,再行過啲,原來仲有即製嘅式青木瓜沙律,因為就咁擺咗啲青木瓜絲、甘筍絲,以為裝飾而已。
bowl凍切肉
冷盤亦有好多款式,先介紹幾款冷盤凍肉,有凍肉香腸、巴馬火腿及莎樂美腸,襯以少少蔬果做裝飾,又擺得幾靚仔,觀感上自己較吸引到客人取用。
bowl冷盤區
再沿路行過啲,就見有一大堆的的骰骰嘅冷盤小食,如涼拌青瓜木耳、刁草醃三文魚……等等,而主題性方面就有甜酸鳳爪、八爪魚沙律之類。
試咗當中嘅泰式青木瓜沙律、甜酸鳳爪及八爪魚沙律,青木瓜沙律酸香爽口,越食越開胃;個鳳爪甚具辣勁,一邊食,一邊飲住凍飲,而八爪魚沙律亦不俗,八爪魚柔韌好食,帶有濃濃嘅泰式風味。
bowl刺身、壽司、和食
本身都喜歡食刺身、壽司,不過,平常食自助餐就好少揀,因為有太多主題食物嘛!但點都要介紹一下,始終喺唔少港人嘅喜好。刺身有北寄貝、八爪魚、希靈魚、吞拿魚及三文魚,而壽司及壽司卷,則少少咁放出嚟,保持有8、9款俾大家揀,遠少少側邊就仲有啲冷麵、漬物,整體選擇真喺唔少。
bowl西式餐湯、麵包籃
食餐飯當然要飲番碗湯,西式餐湯嘅代表喺蕃茄忌廉湯,無試嘅原因唔喺唔鍾意,而喺因為我知「柏景」有提供燉湯,胃納名額有限,當然要有優先次序啦;而西湯旁自然喺跟啲西式麵包,鍾意佢哋以電熱板烘住,令麵包「暖粒粒」。
跟住輪到介紹熱盤呢個大片區啦,一大張L長形食物枱,擺放十多款中西美食及多款主題菜式,有即煮粉麵檔、燉湯、多種熱盤、燒烤、烤肉……等等,夠晒陣容鼎盛,以下就逐一分類講講。
bowl泰式船麵
呢度一向都有即煮粉麵供應,但今回既然主題喺泰式,自不然粉麵就轉為泰式船麵,配料無以前供應港式粉麵咁多,主要喺圍繞番泰式嘅配料,如泰式牛丸、魚蛋、豬肉丸、鮮蝦、雞肉……等等,湯底就可揀豬骨湯或冬蔭功湯,仲供應埋多種泰式醬料作調味添。
bowl泰式椰子雞湯
上文都講過要留位俾個燉湯,呼應主題,燉湯就喺泰式椰子雞湯,確實幾搶手,因為我第一轉出去拎都無晒貨,不過,等多十多、廿分鐘又有一批新貨燉起咗。
入口非常之熨口,果真新鮮滾熱辣,唔喺講少,嗰陣陣椰香好突出,真喺椰香撲鼻,四處飄溢,入口湯頭勁清甜,非常好飲。
bowl熱盤、泰式燒烤
老實講,十幾廿款美食,真喺唔記得晒咁多,憑相片及少少記憶,試試盡講有啲乜:青咖喱雞、泰式香茅蒸魚、泰式炸魚餅、炸蝦餅、蔗蝦、泰式燒菠蘿、金不換黑豚肉燥炒飯、燒豬頸肉配糯米飯、泰式炒時蔬、泰式炒海鮮、鹽焗鱸魚、泰式辣椒炒龍蝦鉗、烤秋刀魚、泰式烤墨魚、泰式燒雞翼、紅酒燴牛尾、香草烤羊脾配蜜糖芥末汁、醬燒豬肋骨、香茅燒雞……等等,當中部份菜式更會不時轉款。
啲青咖喱雞真喺幾正,青咖喱好香,而咖喱唔單薄,有陣陣泰式香料味,雞肉又夠滑,仲有唔少菇菌,伴印度烤餅就更正啦。
再試一試泰式香茅蒸魚、泰式炸魚餅、蔗蝦同泰式燒菠蘿,啲蒸魚好嫩滑,滲出淡淡香茅香,卻唔會搶咗啲魚鮮味;炸魚餅、蔗蝦都好好食,彈牙有咬口,又唔油膩喎,而燒菠蘿味道非常清甜。
另一轉就試咗鹽焗鱸魚、醬燒豬肋骨、烤羊脾幾款肉,伴啲烤南瓜、泰式炒時蔬,其中嘅豬肋骨同羊脾肉真喺好正,味道香濃,肉質十分鬆化。
人人都鍾意食海鮮架啦,一於一大碟泰式炒海鮮一齊「些牙」,大蜆同長蟹腳味道極之鮮甜,而以泰式去處理,估唔到惹味之餘,亦無冚過海鮮嘅鮮味。
再追加多一碟泰式辣椒炒龍蝦鉗,個人嚟講,之前嘅泰式炒海鮮好食啲,龍蝦鉗睇起嚟高檔啲,但食落嘅感覺無啲長蟹腳咁夠鮮味,不過,就啖啖肉。
燒豬頸肉配糯米飯喺墊肚嘅選擇,啲燒豬頸肉燒得好香口,帶點焦香,肉質爽爽哋,沾上啲酸辣醬,滋味提升,而糯米飯煮得黏糯綿身,唔錯。
bowl慢烤原條牛肉眼
唔使多講,原條烤肉喺自助餐嘅必備,是晚所見就喺原條肉眼,燒得外觀焦香,加上燈光,又喺一款極盡誘人嘅美食。此外,仲有烤南瓜及薯蓉作配搭。另外,提供上燒汁、黑椒汁、洋蔥汁、芥末……等等,亦喺指定動作。
bowl飲品區
餐廳近尾,就喺飲品區,不停供應大量罐裝汽水、果汁、啡茶,如果想襯番啲惹味泰菜,可以另加$68位無限暢飲泰象啤酒、勝師啤酒或紅白餐酒,酒類唔喺好啱我哋,飲冰凍汽水襯泰菜已經好夠。
bowl甜品區
甜品對自助餐而言,又喺不可或缺嘅一部份,印象中,「柏景」嘅甜品絕對屬多選擇、多元化及質素中上之列。當然,今之以泰式為主題,就多咗好多泰式甜品,睇落都頗有特色,一口氣介紹晒去:荔枝泡芙、美式芝士餅、木瓜慕絲、熱情果芒果蛋糕、朱古力班尼、抹茶芝士餅、椰汁西米糕、泰式奶茶凍、香芒椰皇西米露、班蘭千層糕、芒果糯米飯、檸檬撻、椰青大菜糕、藍蝶花啫喱、菠蘿金寶、自助班戟機、泰妃椰奶葡撻、榴槤芝士撻、泰式珍多冰……等等,淨喺睇到有咁多款已喺好賞心悅目。
先嚟一個全泰式嘅甜品拼盤,由於喺少見嘅款式,所以,感覺特別好食。當中以泰式奶茶凍、泰妃椰奶葡撻、榴槤芝士撻最得小弟歡心,除因為夠特色之外,味道仲好個性化,突出到個主題。
bowlMövenpick雪糕櫃
甜品中,有品牌嘅雪糕亦喺不少大酒店自助餐嘅必然選擇,是夜就有4款Mövenpick雪糕供應,包括士多啤梨、檸檬青檸雪葩、雲呢拿夢幻及楓糖合桃,此外,亦有多款配料俾你配。而雪糕櫃內,仲有啲雪米糍,喺咩品牌就無特別問喇。
試咗多款泰式甜品當然未夠喉啦,再掃多5款甜點伴上兩球Mövenpick雪糕,平常食蘋果金寶就食得多,但菠蘿金寶就第一次,確喺好食喎,菠蘿果肉非常香甜,熱情果芒果蛋糕及抹茶芝士餅亦都出色;Mövenpick雪糕就唔使多講,喺質素嘅保證。
最後,喺生果時段,只有西瓜同蜜瓜,所以,加多一球士多啤梨雪糕襯一襯,為今餐完美作結。
再到訪,自助晚餐算得上保持質素,再者,至緊要用餐安心。目測有八乘幾滿,以星期一晚嚟講,實在喺好唔錯嘅入座率。臨尾,見侍應送上唔少生日蛋糕俾啲客,原來,於生日月份內惠顧自助餐,可享免費生日蛋糕一個(睇落有近一磅左右),趁着疫情緩和,自然多咗人出嚟搞慶祝。

個人評分
味道:9/10
環境:8/10
服務:8/10
抵食:9/10
平均每人消費:HK$425(官網預訂6折優惠)

餐廳資料:
柏景餐廳 Café on the PARK
尖沙咀廣東道33號中港城皇家太平洋酒店園景翼2樓
2738 232

沒有留言:

發佈留言