2021年7月27日星期二

Barista by Givrés:「瑰」得有道理

早排與朋友到蘇豪食飯時,無意間留意到呢一間咖啡店「Barista by Givrés」,之後再上網睇睇佢哋嘅風評,的確唔錯,尤其佢哋嘅開放式牛油果多士,賣相非常吸晴。趁今日公司飯唔喺好啱食,一支公過到嚟嘆番個午餐。
蘇豪呢區始終有少少隔涉,所以,就算午飯時間過到嚟,都唔會太多人,比起晌德輔道、皇后大道一帶,呢頭食嘢就悠閒、輕鬆得多。
室外嘅壁畫成為打卡熱點,而室內就一室以白色為主調,襯以波燈,裝修簡潔明亮,不同嘅角落又擺放少少植物,讓人有種小清新嘅感覺。
剛好,對住些利街挨窗嘅吧枱位仲有空櫈,揀坐晌度喺個人認為最心水吓位置,一來外面陽光燦爛,坐近窗可以舒舒服服享受日光浴,二來對住半山自動扶手電梯,望住上上落落嘅身影,自覺更悠閒,更要好好享受此時此刻。
一紙餐牌就顯示晒餐廳所賣嘅食物,輕食啲嘅如多士、牛角包或其他烘焙包點,大份量啲嘅有牛油果、水煮蛋……等食材配酸種多士,以及各款意大利麵。
咖啡亦喺店家嘅賣點,有多種特色咖啡供選擇,當然,唔少得各種口味嘅熱茶,甚至有埋沙冰、雞尾酒添。
此外,餐廳仲兼營零售咖啡豆,晌鋪內飲過覺得啱飲,又有興趣返屋企自己沖番杯,就不妨買番包豆返去試吓。
bowlEverything Eggs Benny $138
餐牌就寫到明有咩食材,包括意大利風乾火腿、菠菜、水煮蛋、荷蘭汁、牛油果、開心果仁碎及杜卡香料,配以酸種多士。知喺咁,但成品絕對喺驚喜連連,賣相精緻,色彩斑斕,未食單喺睇都賞心樂事呀,尤其牛油果捲成玫瑰花形,心機之作,而一抹紅菜頭醬亦喺有畫龍點睛之效。
會唔會好睇唔好食呢?放心,真喺有姿勢,有實際,水煮蛋煮得啱啱好,一切開蛋黃澎湃湧流,菠菜煮腍咗,亦調過味,底下嘅火腿油潤鹹香,而牛油果絕對熟到剛好,入口軟綿如牛油,無論點配搭,襯上柔韌嘅酸種麵包,都好好食。此外,個荷蘭汁做得酸香開胃,餐牌提及嘅杜卡香料,嗒落味道九乘幾似啲孜然粉,又有啲開心果仁碎,令整道菜味道紛陳,妙絕。所以呢,無論食材配搭,做菜功夫,都盡見心思。
bowlLavender Latte +$30
點選任何早午餐菜式,+$25可配啡茶,焦糖、榛子、玫瑰鮮奶咖啡都試過,但呢一款薰衣草咖啡就未試過,需額外+$5。咖啡嘅拉花好靚仔,表面平滑,線紋細緻,個拉花亦好對稱,邊邊就放咗唔少薰衣草乾花作點綴。聞落,薰衣草香氣嚟自啲乾花,入口反而覺得薰衣草嘅味道較含蓄,但咖啡味就好醇香,口感均勻,沖泡嘅手勢非常好。
另一亮點就喺佢哋兼營意大利雪糕,除口味多之外,就喺玩法亦多,基本嘅手工玫瑰花形雪糕自然成為打卡之作,另外,仲可配雞蛋仔、咖啡成為甜點。故此,追加個雪糕當餐後甜點,亦消吓暑。
bowlHandcrafted Gelato Rose $65
意大利雪糕共提供10款口味,思前想後,決定揀最心水吓兩款口味:芒果及開心果,成品送上,真喺好靚,一瓣一瓣咁砌上去,好有立體感。雪糕嘅質感好柔滑,富奶香,而芒果味好清甜,開心果味則有好濃郁嘅堅果香味,個筒又夠脆喎,真喺夏日嘅消暑佳品。
天空放晴,予人感覺都舒服好多,加上一頓豐富嘅午餐,以及美味、冰涼嘅甜品作結,喺生活嘅一種小確幸!

個人評分
味道:9/10
環境:8/10
服務:8/10
抵食:8/10
平均每人消費:HK$200

餐廳資料:
Barista by Givrés
中環士丹頓街7號地舖
9659 0816

沒有留言:

發佈留言