2021年7月31日星期六

霹靂南洋 Restoran Perak:「霹」靜小飯局

馬來西亞,前後去過兩次,第一次短玩5日,只去檳城同吉隆坡,而第二次同朋友去玩長9日,去咗檳城、浮羅交怡、吉隆坡同馬六甲,非常盡興,對大馬印象非常好。由於疫情關係,友人喺好慬慎嘅人,香港唔清零佢都唔出嚟飯聚,卒之等到呢日,就專登約出嚟食馬拉菜,選址「霹靂南洋」,一來未試過,二來位置最就到大家方便。

2021年7月30日星期五

Dazzling Cafe:鋒「芒」畢露

今日參加咗個本地遊,午餐食得早,而結束點問晌尖沙咀,所以,順道逛一逛The One地庫吓Aeon,入點貨之餘,並食埋個早鳥晚餐先返屋企。晌商場嘅餐廳指南望兩望,就決定試試台灣過江龍嘅「Dazzling Cafe」,因為知道佢哋嘅蜜糖吐司、窩夫鬆餅都幾有人氣。

意廊 Avanti Pizzeria:「意」論紛紛

早前報到旅發局搞嘅「賞你遊2.0」,參加咗個本地團,一早去到邊界白虎山山頭參觀麥景陶碉堡(只喺外面睇一睇而已,因屬二級歷史建築,圍封咗),再返回沙田食晏,然後到訪曾大屋,最尾就到尖沙咀嘅歷史博物館自由參觀,隨後就各自解散。午餐安排晌「麗豪酒店」嘅「意廊」,之前都嚟過幾次,但都好一段時間嘅事,印象都幾唔錯。

2021年7月28日星期三

Pancake House HoiHoi:「薯」不簡單

早三個月前左右,同老婆睇完戲,晌「荃灣廣場」嘅一家美式餐廳,帶佢初嚐梳乎厘班戟,佢非常鍾意,仲話有機會要再試試。最近,同食友傾開偈,講關於啲梳乎厘班戟,佢就話日本過江龍,有名古屋No.1嘅「Pancake House Hoi Hoi」晌「荃新天地」開咗新分店,地點就晒我哋,所以,搵晚過開嚟就試試佢哋嘅梳乎厘班戟質素喺點。

2021年7月27日星期二

Barista by Givrés:「瑰」得有道理

早排與朋友到蘇豪食飯時,無意間留意到呢一間咖啡店「Barista by Givrés」,之後再上網睇睇佢哋嘅風評,的確唔錯,尤其佢哋嘅開放式牛油果多士,賣相非常吸晴。趁今日公司飯唔喺好啱食,一支公過到嚟嘆番個午餐。

2021年7月24日星期六

泰小子 Thaiholic:街頭美食新常「泰」

前一篇食評講到小弟同朋友由大埔經粉嶺、上水、元朗一直踩單車踩到嚟屯門,是日天氣都有啲熱,少少曬,踩吓抖吓咁,中途就晌元朗食午餐,最後,以屯門公園為终點,再晌附近周圍兜吓,因為屯門真喺相對少入嚟。友人之前晌網上見到有一家小店「泰小子」主打賣泰式香蕉煎餅都幾人氣,又開晌屯門區,加上我哋踩住單車,故此,真喺專誠踩過過嚟拜會一下,當喺食個下午茶補充番啲糖份,否則對我哋呢啲區外客真喺未必行到咁入。

富興潮州粉麵:絕不「興」盈

今日約好同朋友踩單車,由大埔出發,北上經粉嶺、上水再沿新單車徑打橫過踩到去元朗,其實舊年10月都踩過一次,不過,當時踩到去元朗就回程返大埔,今次就唔同,踩單程,到咗元朗會再繼續,目的地喺屯門,然後坐返屯馬線走。上到去到元朗外圍嘅「南山軒」食晏,今次就入咗元朗市中心「富興」食粉麵,喺友人介紹,要試試一款大雜會式嘅粉麵,喺絕不輕盈之選。

2021年7月22日星期四

Crown Super Deluxe:歡樂今「燒」

過往,都食過好幾次日式鐵板燒,但就唔算多,一來日本菜都屬中上價嘅菜系,二來食有質素嘅鐵板燒確喺算高消費。今晚同多年老死豪一豪嚟到位處德己立街嘅「Crown Super Deluxe」嘆鐵板燒,聚一聚加暢談一番。唔嚟過「Crown Super Deluxe」都唔知日式鐵板燒雖然喺日式菜系,但都同美國有點淵源,受其影響下成長、發展。

2021年7月21日星期三

你妳 You You:翻兜「你」由

年半前到訪過荃灣嘅「你妳」,除台灣菜做得出色之外,一份肉鬆芋泥吐司印象猶深。最近,要過到紅磡攞嘢,知道佢哋紅磡開咗間分台,專誠過去一趟,等老婆可以試試呢一款吐司。

2021年7月20日星期二

十二鍋 12 Pots:「鍋」心之選

原來台式一人一鍋已經好耐無食過,再睇番小弟自己嘅食評,對上一次已經喺兩年幾前嘅事,然而,對呢一類一人火鍋嘅形式感覺唔錯。今晚約咗其中一個「死佬」飯聚,選址就番佢,所以,揀咗嚟到佐敦嘅「十二鍋」。貪其位置又近港鐵佐敦站,但小弟又可以揀搭屯馬線返美孚,夠晒方便。

2021年7月14日星期三

一盅點心 Dim Sum Gathering:為你「盅」情

同老婆飲茶食點心,佢就鐘意去酒樓,覺得有飲茶嘅「氣氛」,並且,大多數跟屋企人多,尤其疫情之下,更加唔會約朋友嘆茶。再兩日晌元州街嘅「米線樂」食米線,之後偶然見到「青山道」一角落有家點心專門店「一盅點心 」,天藍色襯白嘅門口,晌青山道顯得特別醒目,所以,趁老婆做義工出開街,帶佢嚟點心專門店嘆點心。

2021年7月13日星期二

米線樂•麻辣豬骨濃湯 Tasty Rice Noodles:惹味在「線」

因為家住美孚,所以,晌荔枝角、長沙灣一帶嘅足跡都比較多,加上好幾位親友、朋友都喺住晌順寧道一帶,故此,不時約晌呢頭短聚。今晚就簡單嚟到「米線樂」食餐米線,粉麵店中,米線鋪都幾深受港人鍾意,因為平靚正嘛。

2021年7月11日星期日

Coti the Bistro:「廠」蕩尋美味

以往,都去過荔枝角、觀塘、牛頭角呢一類工廠區搵食,仲不時有意外驚喜,相對嚟講,新蒲崗剛較少,因為總喺感覺唔太方便。不時,依家唔同晒,過嚟新蒲崗,小弟可以由美孚搭屯馬線一程過,晌啟德落又得,到鑽石山先落都得,視乎晌新蒲崗靠北、定靠南一面。今次就貪新鮮過咗嚟一轉,就番住觀塘線嘅舊同學,一齊食個午餐聚一聚。選址「Coti the Bistro」,因為見其風評唔錯。

2021年7月10日星期六

從心素食 Heartful Veggie :從心「鎖肉」

老婆話今日幫咗佢拎晒成喼帳薄返公司,晏晝餐飯就佢請,小弟當然欣然接受,不過,餐廳都喺等番佢揀,佢就揀咗「從心素食」,因為佢想我試試呢度嘅「片皮鴨」,佢之前同朋友試過,覺得非常有特色。

2021年7月8日星期四

八號草 RINK 8:高質素新場

老友夏總既喺美孚街坊,又喺保齡球友,自從多年前美孚嘅保齡球場無咗,佢就要成日跨區打波。最近佢話見到個場開番,但原來轉咗做一站式體驗場館,有法式滾球、草地滾球、健身房、掟飛標機,仲有間西餐廳,同佢嚟聚一聚食餐晚飯,兼等佢緬懷吓晌度打保齡嘅時光。

2021年7月6日星期二

知粥嘗樂 Congee Wonderland:心滿意「粥」

完全玩晒食字嘅店名,喺幾易入腦,而位置正正晌炮台山站斜對面,幾分鐘步程,如果落雨嘅話,又可以駁天橋過去,非常方便。帶老友嚟食粥,老友無微言,皆因「知粥嘗樂」唔喺單賣普通嘅粥,梗喺有啲特別先過嚟試吓啦。

2021年7月5日星期一

柏景餐廳 Café on the PARK:盛夏「泰」狂熱

自疫情開始,都無專登走去食自助餐喇,因為覺得感染風險少少高,不過,隨着疫情緩和,加上之前去過兩次「宅渡假」,都包自助早餐,睇到酒店都做咗唔少防疫安排,啲人亦頗自律,所以,對自助餐嘅感覺都安心不少。本土個案勉勉強強算喺28日清零,豪一餐當應吓景吧!揀「柏景餐廳 」除質素外,亦因為有大嘅折扣,以及方便我哋啲美孚人,食完搭西鐵兩個站就到。

2021年7月3日星期六

Deer Kitchen:記「鹿」良好

周末日,行山團因天氣過熱唔成團,所以,就同老婆過嚟荃新天地二期嘅「英皇」睇場戲兼食晏,電影就揀咗災難片「極地冰劫」,近兩個鐘長,全片都無冷場,啲特技都好犀利,拍到真嘅一樣。而食晏地方,就過番嚟荃新天地一期嘅「Deer Kitchen」,鍾意佢環境好,多年前亦幫襯過觀塘店,記得佢哋嘅出品喺唔錯,雖然喺5年前嘅事,但屹立至今,就證明有一定實力。

2021年7月1日星期四

百樂門囍宴 Joy Cuisine:我的星期六美孚早餐 ~ 早茶有着「樂」

原來,好耐無約姨仔落嚟美孚飲早茶,睇番啲食評,原來亦好耐無嚟過呢一間「百樂門囍宴」飲茶,再者,「我的星期六美孚早餐」系列亦都喺好耐無寫過,無寫原因唔喺星期六無出街食早餐,只喺近排不外乎去開嗰幾間餐廳或快餐店,又真喺無乜好寫。所以,今次就寫番一篇早茶。