Fûhn：開心喜「越」生日飯

我哋嘅死佬飯局晌疫情之下，兩年幾無搞過，適逢其中一位死佬就快生日，就草草哋3丁友搞咗個死佬小飯局慶祝吓，兼講吓近況。搵餐廳由小弟負責，方便大家就揀咗銅鑼灣區，而年幾前試過「Fuhn」，覺得幾好，而老友都喜歡食越南嘢，小飯局就決定晌度食。

時隔一年，環境就無咩轉變，裝修依舊簡潔明淨，以四人枱為主，部份間起大型膠板成為兩張二人枱，是夜眼見都幾多人幫襯，可見「Fuhn」嘅出品都有一定質素。

而我哋一行3人，被安排坐晌最尾一角，自成一角，當然最好，你知啦，麻甩佬有時講嘢越講越大聲，嘈到人哋就無咁好啦！

枱旁放咗幾款食越南菜嘅基本調味醬料，如自家製魚露、是拉差辣椒醬及醬油。

餐牌就好似唔同咗，變得簡單咗，翻一轉餐牌，款式依然咁多，以種類分，就分為湯粉、撈粉、飯品、特色菜、米紙卷、拼盤、法包、沙律、小食、甜點、兒童餐。

飲品方面，同樣喺選擇多多，咖啡、椰青、沙冰、奶昔、梳打、特色花茶、啤酒……等等。

冰磚鮮奶咖啡 $48

平常食鮮奶咖啡喺飲熱嘅多，因為睇到靚嘅拉花就特別賞心悅目，不過，今次見佢哋有款「冰磚」就轉試吓凍嘅鮮奶咖啡。送到嚟嘅咖啡有4大粒咖啡冰磚，慢慢溶，所以，基本上喺越飲越香濃。但個人意見，一起手嘅鮮奶咖啡可以沖得濃少少，因為奶泡比咖啡多，要等啲冰磚溶一陣先啱口味。

牛油果奶昔 $48

牛油果晌來被視為健康有益嘅食，等陣你就知我哋點啲幾唔健康嘅小食，所以，其中一個死佬就點咗一杯牛油果奶昔嚟平衡吓。佢話，口感好綿滑，涼涼哋又幾清新，牛油果味都幾濃郁，夠晒真材實料。

柚子益力多沙冰 $45

另一位死佬取態唔同，最緊要夠爽，所以，瞄準咗沙冰類，當中以柚子益力多沙冰喺最想試。堆到大大杯，入口涼透心，而沙冰打得幼細，唔會有冰粒感，每口都滲出柚子香甜味，又帶有少少益力多嗰種酸味，好醒神，啱晒襯一陣啲熱氣小食。

鹹蛋黃薯條 $35

先嚟一個膽固醇萬歲嘅鹹蛋黃薯條，唔使多介紹啦，總之就又熱氣，又高膽固醇，但就惹味好食，鹹蛋黃推得唔錯，令薯條食起嚟超鹹香，加上薯條新鮮炸起熱辣辣，感覺就更加正。

奧爾良雞翼 $65

再嚟喺繼續唔健康系列嘅炸雞翼，以往，通常食越南菜會喺牛油炸雞翼，奧爾良雞翼就第一次試，所以，唔太知佢本身喺咩味，而食落，有啲似似哋「肯德基」嗰種，炸得乾身唔油，咬落外皮勁脆口，味道鹹鹹香香，肉質就好嫩滑。

手打炸蝦餅 $98

我都話我哋今餐飯好唔健康，再嚟一個小食都喺炸嘢，蝦餅喺自家手打，質素自然睇高一線。蝦餅搓成好大件，兼且厚身，入口口感非常彃牙，而且，鮮蝦味十足，絕無欺場。最鍾意喺佢哋每道小食都件住啲酸醃菜，可中和吓啲炸嘢，食落確喺幾令人開胃！

軟殼蟹米紙卷 $88

米紙卷喺好有特色嘅越式小食，所以，一定會嗌，在乎喺點咩口味。數款選擇中，軟殼蟹似乎最有睇頭。米紙卷十分晶瑩剔透，睇得到裡面捲住好多米粉、生菜、甘筍絲，紥得夠實淨，入口口感煙韌而清爽，配軟殼蟹，好食！

越式鵝肝醬法包 $98

話咗膽固醇萬歲，越式法包都揀咗款有鵝肝醬嘅。件法包大概8吋長，幢面就塞滿好多餡料，如酸蘿蔔絲、青瓜絲、扎肉及鵝肝醬。一啖過咬落去法包外層超脆，包心軟綿，所有食材混合所帶出嘅味道紛陳，而鵝肝醬味道豐腴，佐以啲酸蘿蔔絲、青瓜絲，唔覺膩，反而帶有一份清香酸爽。

越式扎肉拌金邊粉 + 太陽蛋 $78

幾個麻甩佬，點都要叫啲粉麵飯墊墊肚嘅，而撈金邊粉印象中好少食，通常喺湯嘅或炒嘅。碟越式扎肉拌金邊粉都好大碟，加埋隻煎得好靚仔嘅太陽蛋，伴以少少沙律菜，賣相好唔錯。重點噝啲撈金邊粉，入口涼涼哋，金邊粉好軟熟，帶微微酸，之後再篤穿隻蛋黃撈勻佢，又有唔同風味，而扎肉質感爽爽哋，整體幾好食，亦好適合依家天時暑熱之下食。

雖然今餐叫嘅嘢，以小食多，但食吓、食吓都幾飽，加埋個法包、拌金邊粉，就真喺飽晒。幾個佬，吹水吹成晚，都喺因為太耐無聚，總之，喺一個愉快嘅死佬之夜。

個人評分
味道：9/10
環境：7/10
服務：8/10
抵食：8/10
平均每人消費：HK$220

餐廳資料：
Fûhn
銅鑼灣駱克道459-461號The L. Square 1樓
2219 8328