日和茶舍 Serenity Tea Room：美味大搜「茶」

我哋完咗晌沙田「帝逸」嘅Staycation，無晌沙田食晏，反而出返尖沙咀，一來點都喺要出返市區，二來出開嚟順便逛逛尖沙咀，再者，有朋友介紹一家日本餐廳，出品唔錯，所以，就拜訪一下。

餐廳位處商廈一樓，門面裝潢都已見特色，入到去，果然好有和風，日系嘅裝修予人感覺幽雅，尤其淺木系，都喺頗喜歡嘅色系。除咗近門口嘅一幅花牆，啱晒俾人打卡之外，牆上都掛上唔少彩繪，帶嚟點點詩意。

仲有，值得一提喺佢哋嘅卡位超闊落，坐起嚟寧舍舒服，枱上更放啲小擺設，真喺做到茶舍嘅悠閒感。

周末嘅午餐有多款選擇，原創湯飯、精選一人鍋、精選午餐，定價由$118-$258，正所謂豐儉由人。我倆同樣揀咗精選午餐，套餐已包咗餐湯、小食或沙律、餐飲，若果改選主餐牌內其他飲品，有減$9優惠。

除咗周末午餐餐牌，順便影埋主餐牌其他版面俾大家參考，如小食、甜點及各式各樣飲品。

粟米忌廉湯

做法比較喺日式西餐廳嘅感覺，喺西式嘅忌廉湯，但質感無咁厚身，覺得喺以牛乳取代忌廉，所以，飲落無咁膩，但粟米味保持到好濃郁、好清甜。

唐揚炸雞

我哋兩個人，就一個揀小食 弓個揀沙律。小食喺和風炸雞，特別就唔算特別，但炸得唔錯，唔算油膩，而且，啲雞肉幾嫩滑。

和風沙律

何謂和風？其實主要喺醬汁用咗胡麻醬，不過咁，啲沙律菜、紫椰菜絲好新鮮爽脆，又襯咗少少車厘茄同櫻桃蘿蔔，賣相靚仔好多。

醬油橡果豚肉野菜丼 $138

就咁講橡果豚肉，你可能唔知喺乜，但睇埋英文菜名，你就知喺正嘢嚟，以西班牙黑毛豬嚟做，自不然喺質素嘅保證。加上醬油去燒，啲豚肉真喺好食，既鬆化，有肉香，又有啲燶邊，好掂！溏心蛋亦做得唔錯，蛋黃軟軟哋，好綿密，而珍珠米同樣軟密，而帶點黏糯，不過，略嫌野菜又喺上述嘅沙律菜，有有啲普通。

原條日式鰻魚旋風蛋飯 $158

原條上蒲燒鰻魚咁上，份外有啲霸氣，其實，都曾經試過原條上嘅鰻魚飯，再襯以炒滑蛋，但用上「旋風」嚟形容個蛋，個人就覺得有少少誇張啫，不過，啲蛋幾香，口感亦滑滑哋；講到啲鰻魚，燒得好香，個醬油汁嘅香味好濃、非常惹味，而鰻魚嘅魚油好足，口感十分之嫩滑。

日式蒸餾咖啡

小弟今朝早餐無飲到咖啡，所以，晏晝餐飯有配額，就試咗杯日式蒸餾咖啡。感覺啲豆嘅烘焙唔喺好深度，所以，出嚟嘅咖啡香醇得嚟就唔會有陣苦味，之後落咗奶反而感覺無咁好。

熱情果洛神花茶 +$39
餐飲嘅花茶只喺較普通嘅烏龍花茶之類，而主餐牌有款「熱情果」花茶，開正老婆口味，二話不說就相中呢一款花茶。艷紅色嘅花茶，睇到粒粒熱情果籽，果然喺真材實料，唔喺靠糖漿。入口涼快酸爽，果味天然，啱晒炎夏之下飲。

天氣好好，又喺周末，加上疫情大幅緩和，眼見街上嘅人都多咗，但香港周邊嘅地區爆番晒上嚟，所以，防疫都唔可以鬆懈，基本嘅個人衛生都要做足。

個人評分
味道：8/10
環境：8/10
服務：8/10
抵食：8/10
平均每人消費：HK$185

餐廳資料：

日和茶舍 Serenity Tea Room
尖沙咀堪富利士道6-6A號爵寓1樓
2413 6333