Pickabowl：美式「Bowl」仔飯

荃灣算喺我哋兩公婆不時會到嘅地區，因為由美孚過嚟一個站5分鐘車就到，加上近年近西鐵呢邊多咗啲新商場落成，過嚟呢邊嘅機會就更多。今日過到嚟「荃新天地二期」，發覺呢間餐廳好眼熟，再睇睇，醒番起，就喺成年前晌荔枝角幫襯過主打賣美式魚生蓋飯，知道喺健康嘢，所以，就同老婆晌度食番餐。 

跟荔枝角店差唔多格局，近入門口位左邊，就喺半開放式廚房，睇到好多食材放晒出嚟，色彩繽紛，非常搶眼。

而晌門口望入去都已經可以睇晒餐廳嘅室內環境喺，比荔枝角細，走簡約路線，環境整潔，基本防疫功夫都做足。雖然話疫情緩和，但不時都有一、兩單個案，始終，社區喺咪無晒隱形患者都喺未確實，個人衛生都唔可以鬆懈。

門口就有電子顯示屏餐牌，上面喺配搭好嘅指定款式，下面就喺DIY自選。但不妨拎個餐牌埋位慢慢研究。數一數，由A至S共19款，非常多元化，定價為$60-$108，「bowl」底更有多款選擇，如白飯、糙米、黃薑椰菜花……而且，仲可以追加額外食材，以及多加$25升級為套餐，多咗溫泉蛋、鰹魚昆布湯及甜品。

此外，亦提供加配飲品優惠，如汽水（+$6）、蔬菜汁（+$12）、鮮榨果汁（+$22）、大大杯嘅冷壓果汁（+$35）。

上次嘅食評都有介紹到咩叫做美式魚生蓋飯（Poke Bowl），今次就唔累贅講到次，反正店家都有貼出嚟，自己睇睇店家點介紹。

餐廳營運比較有少少快餐模式，晌門口嘅收銀枱落單，再分配一個傳呼器，一響就可以出去拎。

經典吞拿魚 $79

老婆揀咗款經典吞拿魚，裡面吓食材非常豐富雖，飯面有吞拿魚、紅菜頭粒、菠蘿粒、紅腰豆、中華沙律、甜椒、生菜……等等，並灑下大量白芝麻，飯底就選上糙米飯配黃薑椰菜花，砌到一大碗，色澤驕艷亮麗。吞拿魚喺赤身貨色，鮮甜新鮮，配上各種食材，味道豐富，口感清爽，十分好食，更話估唔到咁仲飽肚添。

薑汁松板豬 $73

我呢款就以松板豬為主角，因為喺和風系，再配以菠蘿粒、豆角、豆腐乾、南瓜粒、車厘茄及生菜，同樣飯底揀咗糙米飯配黃薑椰菜花。賣相一樣色彩繽紛，食材豐富，成碗拎上手真喺幾墬手，份量十足無欺場。

松板豬煎得香口，口感仲帶點脆脆哋，個人覺得薑汁味可以仲重啲，而加埋其他食材，口感豐富，味道紛陳。

佢哋嘅糙米飯唔會好硬，因為糙米跟白米佔嘅比例唔太高；而啲黃薑椰菜花軋碎晒，口感有啲似小米，老婆都覺得咁樣配搭都幾有新鮮感。

升級套餐 +$25

上文都講過可升級轉為套餐，包溫泉蛋、鰹魚昆布湯及甜品。隻溫泉蛋本身喺靚貨，蛋黃好綿，蛋香十足，只喺流心感唔強。而鰹魚昆布湯味道比較清，湯內嘅豆腐粒非常滑溜。甜品喺抹茶蕨餅，口感煙糯，抹茶味幽香帶甘。

蜜桃汁 +$6

雖然升咗級有湯飲，但見只喺+$6，所以，就揀咗罐蜜桃汁，味道清甜，而且，仲帶有少少果肉，又真喺幾唔錯喎。

蘋果紅菜頭檸檬西柚汁 +$22

老婆喺健康人，汽水當然唔喺佢杯茶，見有兩款100%鮮榨果汁，就要咗呢款幾種蔬果打成嘅純果汁。我都試一口，真喺好有一種天氣新鮮感，而且，味道清爽，夏天飲就更正。

食完之後，仲有啲手尾，自用餐盤自已執，如方便，店家都鼓勵客人幫忙收拾，晌餐廳尾，就會見到個餐具回收處，依家都有不少餐廳會咁做。

近排天口熱得交關，郁啲都上到33°C、34°C，食呢種美式魚生蓋飯喺幾唔錯嘅選擇，將魚生、蔬菜切成一小口，加入飯底，配上醬汁，食起嚟既清爽，又健康。

個人評分
味道：9/10
環境：7/10
服務：8/10
抵食：8/10
平均每人消費：HK$115

餐廳資料：
Pickabowl
荃灣楊屋道18號荃新天地2期地下G06號舖
2590 9330