November：11月嘅消暑奇「冰」

早前旅發局搞嘅「賞你住」，總算爭到一席位，可以預約到沙田嘅「帝逸酒店」住番晚，兼包個自助早餐，所以，安排咗個本地小旅行。先晌西貢影影近來新登場嘅壁畫，再行茅坪古道，睇睇竹林隧道同西貢藤皇，由西貢行到去大水坑，轉馬鐵落石門，再行過去酒店。嚟到石門，晌京瑞廣場打個轉，並順便買啲嘢飲。兜兜轉轉見到賣台式飲品嘅「November」，睇睇，有好多果汁系飲品，啱我哋兩公婆喎。

餐廳以湖水藍為主調，有啲少女風，由於店子晌商場內，外面有幾熱都無關係，涼住冷氣慢慢等。而晌鋪面駐足咗一陣，因為睇見張餐牌有好多選擇，可以講喺間非傳統台式飲品店，有啲花多眼亂，有咖啡系、抹茶系、朱古力系、台式鮮奶系、水果系、沙冰系……等等，總之就好多，又可以額外加配料。最後揀咗兩款，拎返酒店慢慢嘆。

熱情Orange $35

我都睇死我老婆會揀呢款，因為有熱情果嘛，喺佢「飛弗」，佢要少冰，因唔想飲太凍，出嚟嘅效果喺涼涼哋，咁就啱晒佢。睇到粒粒嘅熱情果籽，就知喺用上新鮮熱情果，仲加入鮮橙，配以綠茶做茶底，店員更話佢哋嘅茶底喺即點即沖，所以，份外芳香；原來仲加咗唔少椰果，大大杯，整杯果香味十足，尤其帶點酸香嘅熱情果香味，真令人越飲越醒神。

芒果沙冰 $38

小弟就要芒果沙冰嚟冰爽一下，因為行到身水身汗，真喺要飲杯沙冰嚟降溫，而芒果口味則喺我嘅「飛弗」，而沙冰可以揀加奶蓋或椰果，當然要前者啦。雖然只喺拎上手，已有點點涼入心嘅快感，大口啜一啖，真喺超爽，沙冰嘅質感打得好綿密，完全無冰粒感，芒果嘅香味好濃郁，非常香甜，加上面層注入不少綿滑奶蓋，飲到一半先再撈勻佢，感覺更正，口感變得更加柔滑細緻。

兩杯凍飲，當喺慶祝我哋完成今轉嘅行山，雖然天氣真喺幾熱，但我哋3:00pm先起步行，沿路大部份有樹蔭，2.5小時到達富安花園，比預期中輕鬆，加上最後嘆番杯涼爽嘅沙冰，消晒暑。

個人評分
味道：8/10
環境：6/10
服務：8/10
抵食：9/10
平均每人消費：HK$36

餐廳資料：

November
沙田石門安群街3號京瑞廣場一期 2樓279號舖
3460 4348