鬼金棒 Kikanbo：搵食「鬼」跡

早前行山老友請飲汽水，今晚就請佢食餐拉麵，當然，都喺講笑啫，志在乘機搵個機會出嚟一齊聚聚吹吓水。老友食得吓辣，就揀咗尖沙咀嘅「鬼金棒」，一來地點我哋都就腳，二來喺店家嘅特製麻辣頗有口碑。

一入到餐廳內，好自然有一種「拉麵」鋪嘅格局，大抵喺因為一眼先望到右邊嘅吧位及開放式廚房，餐廳呈長形，都幾深吓，以紅調為主，牆頂掛上好多日本鬼鬼怪怪嘅面具，卻唔會有太嚇人嘅感覺。

我哋被安排坐晌吧枱位，企高就可以睇到師傅整麵、炒配料嘅手勢。

枱上放有水杯、筷子，更有啲紙圍裙，俾客人着住，就唔怕湯汁彈到上身，不過，環保關係，我哋就無着喇，食得小心啲就無問題，反正，平常食湯麵有幾何需要着件圍裙架，哈哈。

講到拉麵，一般日式拉麵店都做得好專，選擇唔會太多，就算「鬼金棒」標示有8款，其實都萬變不離其中，叉燒、拉麵加味噌湯底嘅基本盤，再配加大份量嘅味玉、炒豆芽菜、玉米筍、增量叉燒……等等，辣度、麻度、走蔥、走蒜……都可以自已控制，此外，仲有少少飯品供應。

而落單，就以掃描二維碼自行落單，方便快捷。之前都已經試過好幾次，最好喺自已可以慢慢搞，唔使有個侍應晌隔離，怕落得慢加重心理壓力，又可以睇番落單記錄，乜都清清楚楚，減少不必要誤會。

雪碧、芬達 @$15
友人話食麻辣，點可以唔叫罐可樂，不過，真喺賣晒，退而求其次，佢要雪碧，小弟就要罐芬達，志在過過口癮而已。的確，食住熱辣辣嘅麵條，再飲啖冰凍嘅汽水，感覺特別爽。

味玉味增拉麵 $100 + 玉米筍 $15

講到明小弟喺唔食的辣，就梗喺要走辣走麻，想食溏心蛋，故此揀咗味玉，再額外加玉米筍，大大碗拉麵，大概10分鐘後就送到。湯面除有大量玉米筍，仲放上好多蔥、蒜及炒豆芽菜，啲玉米筍仲睇得出喺炒過。

因為喺味噌湯底，唔似豬骨湯般濃厚，但就啱我心水，呷一口，味噌味香濃而不濁，無過鹹問題，唔嗆喉，亦帶有鮮甜香。

跟住試試味玉，夾開一望，老友嗰隻好似靚過我隻，因為我隻嘅蛋黃凝結度有啲過咗，溏心效果無咁強，不過，食落都好香，滷得亦不俗。

日式拉麵嘅靈魂之一喺叉燒，咁佢哋嘅叉燒喺點呢？做法非慣常所見嘅將五花腩捲起嚟滷，而喺一整嚿嚟做，真喺將五花腩原型奉上。入口頗鬆化，滷得入味，並且唔覺得肥喎。

另一靈魂就喺啲拉麵，店家只提供一款拉麵，就喺直身而較粗嘅一種，咬落有韌性，帶出柔韌嘅口感，而且，較耐浸，食到尾炷都唔會有腍咗嘅感覺，再者，份量真喺幾多吓，食晒碗麵真喺非常飽。

特製辣麻味噌拉麵 $120

老友就揀咗中辣中麻，所以，上枱時，拉麵嘅湯底呈橙紅色，佢話雖然喺中辣中麻，但無想像中咁火辣，點到即止，但食起嚟又有少少刺激感；對比起我嗰碗，佢嘅所謂「特製」，明顯喺叉燒嘅呎吋比我嘅大1-2倍之多。綜觀嚟講，佢對整碗拉麵都評分頗高，無咩挑剔位。

大家講開飲飲食食，講吓講吓，睇番自己啲食評，原來都有成年幾未食過日式拉麵，而老友更話都唔記得對上一次喺幾時嘅事，所以，今晚嘅拉麵之聚算喺補一補下大家嘅拉麵回憶。

個人評分
味道：9/10
環境：7/10
服務：8/10
抵食：8/10
平均每人消費：HK$130

餐廳資料：
鬼金棒 Kikanbo
尖沙咀金馬倫道20號地舖
2481 2889