山區裡的走走趯趯: Café Crêpe：魔「法」薄餅

2021年5月25日星期二

Café Crêpe：魔「法」薄餅

記得早年，都講緊喺4年前嘅事，晌中環試過一家法式清新小店，又喺主打法式薄餅，有鹹亦有甜，印象都幾唔錯，亦喺第一次試鹹嘅法式薄餅。今日嚟到「Cafe Crepe」，又可以重溫一下鹹味法式薄餅嘅滋味。

其實，晌門面已經見到佢哋整法式薄餅個廚房，師傅就不停手密密製作，所以，一入門口，就聞到陣陣嘅香氣。

餐廳分兩層，地下因為間開一半做廚房，所以，用餐區唔算大，目測大概10個位左右，但環境裝修幾唔錯，走簡約路線，有種細細哋法式咖啡室嘅感覺。

拾級而上，上到二樓，因為嚟得早，所以，二樓就未有客人。地方就大好多，座位亦多好多，牆上掛有少少畫作作點綴，近尾一排吧位枱櫈，最合適嘆嘆咖啡，睇吓街景。

本來都影咗個餐牌俾大家參考，但大大張啲字又細，而臨走見有啲紙本嘅細細張被人拎，就索性掃描出嚟俾大家參考。法式薄餅當然喺主打，仲有早餐、湯品、沙律、法式三文治、漢堡、意大利麵，以及各式飲品，選擇也頗多元化。

鮮奶咖啡 $32

先嚟一杯心水嘅鮮奶咖啡，餐牌已寫到明喺意大利進口Lavazza咖啡豆，當然，質素唔差得去邊，加上咖啡師嘅好手勢，天鵝拉花非常靚，線紋好細緻，咖啡面平滑無起泡粒。完全無攪過，入口口感卻非常均勻，咖啡嘅醇香度高，每一口嘅餘韻仍盤旋於口腔，絕不失禮於一啲大咖啡店。

黑松露香煎帶子法式薄餅 $139

唔好以為淨喺得面頭兩大粒帶子，其實，法式薄餅內就包住好多帶子及蘑菇，並以白汁及松露油處理過。先分享吓薄餅面嘅帶子，大大粒，好爽口，香煎過加埋黑松露醬，份外滋味；而法式薄餅內餡嘅鮮野菌，唔喺罐頭貨，有菌香，配以爽口嘅帶子粒粒，以及帶濃香嘅白酒忌廉汁，同埋啲芝士碎，食味真喺好唔錯，而薄餅皮又軟熟、又有蛋香。咪睇塊薄餅扁扁哋咁，份量可不少，幾飽肚吓。