太平洋咖啡 Pacific Coffee Company：悠閒短聚

幾個月前去過一次「饒宗頤文化館」嘅「Pacific Coffee」嘆午餐，覺得環境好好，好舒服，打算趁呢日天氣好，仍然涼涼哋，唔太熱，再去多次，點知原來轉咗為另一家咖啡店，加上「饒宗頤」有啲活動搞，可以講喺人滿之患，所以，轉場落返去「曼克頓山」間「Pacific Coffee」，呢一間分店都好耐無到訪話過喇。

由於喺周日關係，就算呢間店都有唔少人幫襯，不過，就幾鍾意佢個環境，因為地方大，樓底又高，空間強，更特別多梳化櫈，可惜，今次都喺一櫈（梳化櫈）難求。

小弟向來都喜歡試新嘢，早前就喺經過見有款「福岡抹茶咖啡系列」，好奇都想試試，睇吓呢款帶和風嘅「鴛鴦」喺點。呢個新系列有兩款出品：黑糖福岡抹茶咖啡、黑糖福岡抹茶咖啡其樂冰，前者較合我喜好。

除咗「福岡抹茶咖啡系列」新嘢外，仲見到有另一款新嘢「無酒精特飲及小食系列」，新出咗幾款特飲：茶之魅、椰林飄香梳打及兩款小食：烤芝士辣玉米片配三醬、香辣雞翼配甜酸醬。我見到上面水牌嘅廣告仲有其他小食，如西班牙油條、椒鹽魷魚，店員就話會輪流推出。

原本就打算只喺嚟坐吓、飲吓嘢，就因為新推出咗幾款小食，咁就不如試試，嚟一個輕怡下午茶過過口癮。

黑糖福岡抹茶咖啡 $43

賣相就無廣告相咁靚架喇，不過，味道又確喺唔錯，尤其是小弟本身就頗鍾意黑糖。入口細味一會，既有咖啡嘅醇香感，又有陣陣抹茶嘅幽香，跟飲港式嘅鴛鴦喺有分別。

茶之魅 $42

老婆就試咗一款無酒精特飲，因為喺以茉莉花茶沖泡，並加入青檸、薄荷葉及薄荷糖漿，非常大杯，望上去感覺清爽怡人。店員介紹話喺一款雞尾酒「莫吉托」演變出嚟，以茉莉花茶代替冧酒。入口青檸嘅微酸，卻滲出輕柔茶香，加上薄荷，好啱天氣漸熱嘅時候飲用。

香辣雞翼配甜酸醬 $48

一客有8隻雞翼，算唔少，焗得色水都幾靚仔，外觀帶點金黃。味道點先？唔錯喎，啲雞翼本身已塗咗層微辣嘅辣醬，放心，唔喺好辣嗰種，但就會好有惹味感，再沾少少甜酸醬，感覺就更正。食呢個雞翼，配上面嘅「茶之魅」就更襯。

雖然仍處於疫情之下，但因為緩和咗好多，大家都多咗外出，就好似今日咁，整間餐廳都可以講坐滿晒人，三幾個朋友悠閒聚一聚，享受愉快嘅午後時光，舒緩一下經常困晌屋企嘅日子。

個人評分
味道：8/10
環境：8/10
服務：8/10
抵食：7/10
平均每人消費：HK$60

餐廳資料：
太平洋咖啡 Pacific Coffee Company
荔枝角寶輪街1號曼克頓山地下04-05號舖
2907 1234