2021年4月13日星期二

餃掂手工餃子雲吞專門店 Nom Nom Dumpling:「松」不孤單一個

睇番啲記錄,剛好4年前幫襯過「餃掂手工餃子雲吞專門店」太子店,自始之後都未有再光顧過,原來,晌中環都有開分店,真喺無特別去留意都唔知咁近我。雖然是晚老婆上堂無飯開,但從不孤單一個,約咗行山友兼老死發哥簡單食一餐聚一聚,收工行過嚟都唔使10分鐘。
比起曾幫襯過嘅太子店,呢間分店都好蚊型,室內座位唔多,目測大概廿個左右,裝修簡約,一邊牆上有啲餃子彩繪,另一邊有始人嘅肺腑之言,長文一篇,唔知有幾多人會睇晒。雖然堂座唔多,但外賣生意就幾火吓,見到餐廳不停哋出外賣。
餐具、紙巾、特色調味料已放晒晌枱上,可惜,唔見有晌太子店擺出嚟嘅酸泡菜,有少少印象,醃得好正吓。
研究吓有咩餃子好食,翻一翻餐牌,頭版有店家嘅介紹,不經不覺,原來已開到有5間店鋪。
仲有,上面提過嘅泡菜「新鮮酸蘿蔔」,堂食唔見有免費供應,但就可以原樽買走,真喺識做生意。另外,仲有啲招牌自家製醬料作零售。
睇店名都知,店家主打嘅都喺餃子,尤其以松茸入饌,餃子嘅款式非常之多,有灼嘅,有煎嘅,亦有唔同份量,增加點菜嘅彈性。除餃子,仲有麵食、涼菜及飲品,圖文並茂,印刷精美。
bowl黃金原味皮蛋 $28
皮蛋當然食唔少啦,不過,唔喺「黑掹掹」,而喺一身金黃嘅皮蛋就好少食,貪得意就點一客。其實,味道跟平常食到嘅黑色皮蛋無咩分別,一樣外層爽彈,蛋黃綿綿,嗒落有回甘。
bowl自家製山楂雪梨水 $20
友人揀咗雪梨水,單睇啲色澤,已覺得好夠味,佢就話啲梨味意外哋好濃郁,而山楂味唔喺好重,只喺令到杯飲品滲出微微嘅酸爽。
bowl蜂蜜檸檬薏米水 $20
小弟就揀咗杯健康有營嘅薏米水,入口都頗滋潤,檸檬就令到口感好清新。雖然,叫咗喺凍嘅,但實質只喺涼涼哋啫,但都已OK,反正天氣又唔喺熱。
bowl龍鳳松茸雙煎餃 $86
餃子方面,一早就睇過啲人嘅食評,所以,一心一意試試呢一款有黑松露及白松露嘅龍鳳松茸雙煎餃,一客共有8隻,隻隻都煎得金黃。每隻餃子都包到脹卜卜,一口咬落去,睇得到外皮好薄,真喺甘香脆口,餃內塞滿肉餡,無乜太多虛位剩,而豬肉饀刴得幼細,口感鬆化,仲有陣陣松香氣。
bowl壽喜燒牛肉煎餃 $74
呢一款就有中碗(7隻)及大碗(10隻)供選擇,前者賣$56,後者賣$74。其實睇樣份份煎餃都一模一樣,外樣煎得香脆,而呢款餃標到明喺新鮮牛肉製,亦喺好足料,入口牛肉餡好嫩滑,富肉汁,好有肉香,帶點洋蔥嘅清甜味,着實都好好食,老友就話都幾特別。
bowl四川涼麵 $30
怕淨食餃子唔夠飽,點多客四川涼麵打打底,其實,由於啲餃子幾足料,所以,食咗咁多隻都有番咁上下。而涼麵揀咗少辣,),灑上花生碎、蔥花,撈勻食又確喺幾惹味,又涼涼哋,少辣個辣度小弟都接受到。
試咗兩款餃,老友都大讚幾有特色,尤其松茸餃,非常幽香。只喺略嫌地方細,所以,佢就話下次帶埋屋企人去試試太子店。

個人評分
味道:8/10
環境:6/10
服務:8/10
抵食:7/10
平均每人消費:HK$130

餐廳資料:
餃掂手工餃子雲吞專門店 Nom Nom Dumpling
中環威靈頓街55號地下
2873 2280

沒有留言:

發佈留言