2021年4月27日星期二

MeKong 泰.越.港:泰• 抵食

今晚屋企無飯開,就乘少少機約咗老友短聚,佢話就我,就揀咗晌番中環食,小弟一收工就可以過到嚟。佢話想食泰國嘢,就揀咗間小店「泰潮」,因為食過兩次外賣,真喺幾唔錯。但過到去,原來已經轉咗名「MeKong」(泰.越.港),但睇落好似只喺轉咗個招牌,鋪面格局跟以前喺一樣。反正嚟到,我哋對食嘢又唔喺高要求,隨遇而安啦!
咪睇個鋪面細細,入到去,成個鋪位都幾深,雖然喺小店,目測所見都大概有40個位左右。間隔晒膠板、一般防疫都做得妥妥當當,加上晚市人流較少,客人亦識各自走位,所以,用餐都感覺安心。
雖然裝修就簡簡單單,勝在夠乾淨企理,但兩邊牆貼上香港晚上街景,又用「魚檔」常見嘅燈罩,睇起嚟比較有香港地道特色,所以,似一家地道茶記,多過一間泰越菜館,哈哈。
打開餐牌第一頁,就喺個一人晚餐,亦喺睇勻散點、二人餐,呢個一人套餐最划算,又可以試得嘢多。套餐包餐湯、小食、飲品及甜品,共10款選擇,定價都哋$73-$85,而飲品亦可加錢升級。
順便就介紹埋佢哋嘅散點餐牌,同樣選擇多多,由頭盤、沙律、湯品、咖喱、飯麵、檬粉、主菜、蔬菜、甜品,到各式飲品,都一應俱全,從定價所見,尤其以中區而言,更屬於經濟實惠。
此外,上面都提過有款二人餐,就貼埋出嚟,其實都抵食,不過,只包餐湯、白飯、主食、副食,賣$148。如果想飲吓嘢、試啲小食,樣樣要額外加,咁就不如嗌一人晚餐。
佢哋將啲餐具放入紙袋仔一份份放晌枱,小弟幾鍾意呢個安排,感覺夠衛生。而餐廳亦支持走飲管,當然,要「十卜」吓啦。
bowl迷你泰式酸辣無骨鳳爪
話就話迷你,但都俾到一大碟仔,咪話唔驚喜。啲鳳爪好爽口,當然無骨,啖喺肉就食夠爽,酸酸辣辣咁,而辣度實際都有啲狠。
bowl泰國風味沙爹雞肉串燒
餐牌列明兩串,咁就啱啱好,一人一串唔使拆開嚟分。個雞串鎳食喎送到嚟時熱辣辣,咬落去雞肉嫩滑,有肉汁,而且,啲沙爹好香、好惹味。下面仲墊咗好多椰菜絲,夠晒誠意十足啦。
bowl是日餐湯
今晚嘅湯水喺清雞湯,湯裡有少少冬瓜,查實個湯唔差,都幾濃香,唔會淡茂茂,最緊要仲喺熱辣辣,好怕啲湯水喺凍冰冰,就算暖暖哋感覺都喺大打折扣。
bowlMekong海南雞配油飯 $85
海南雞有唔少,而油飯更喺一大碟,等同平時飯碗量嘅兩碗,伴上泰式辣醬,可以講交足貨。啲海南雞真喺唔錯,雞皮爽滑,而皮下脂肪少,已去晒骨,啖啖肉之餘,又夠嫩滑,沾點辣醬,雞鮮味更突出;油飯都好正,飯粒爽身,帶雞油香。
bowl泰式黃咖哩牛腩飯 $80
無論黃咖喱、青咖喱、紅咖喱,泰式咖喱一向有賣點,我哋兩個都喺少少食肉獸,所以,另個選擇喺黃咖喱牛腩飯。同樣份量十足,一大兜咖喱,餸料滿滿,又一大碟飯。啲咖喱夠香濃,稀杰度啱啱好,撈飯一流;而牛腩軟腍鬆化,牛筋就咬口有嚼頭,並伴有好多蔬菜同薯仔。
bowl龍眼冰、泰式椰汁珍多冰 +$8
個一人晚餐只包一般港式飲品,見轉為泰式特飲都喺加$8,絕對喺抵。老友嘅珍多冰就唔講喇,總之就夠大杯,而我嘅龍眼冰算喺唔錯,個糖水底有啲蜜香,而龍眼亦落得唔少,清爽又清甜。
bowl泰式大菜糕
甜點喺泰式大茶糕,點為止泰式?我覺得喺加入椰汁囉。睇樣好似普普通通咁囉,但食在手工,打橫一望,椰汁、大菜,層層相間,驟眼睇落都十多層啦。味道方面,幾爽口,有淡淡椰汁香味。
兩款一人晚餐都好掂,又豐富,又大份量,老友都大讚好抵食。啲招呼都唔錯,店員殷勤快手,雖然有晒招呼,但唔使加一。題外話有少少好奇,店名「MeKong」點解中文店名唔譯為「湄公」(越南好出名嘅河流)?中文店名「泰.越.港」,初時仲以為有啲港式嘢,除幾款飲品,真喺又搵唔到乜港式嘢食,哈哈!

個人評分
味道:8/10
環境:7/10
服務:8/10
抵食:9/10
平均每人消費:HK$90

餐廳資料:
MeKong 泰.越.港
中環嘉咸街7號地舖
2488 4444

沒有留言:

發佈留言