而左邊嘅「上層」，就喺主用餐區，湖水綠襯白，格仔地磚，藤椅配白色雲石餐枱，無傳統越南餐廳嘅框框，反而，好有一派法國餐廳嘅風情。眾所周知，越南曾經喺法國殖民地，當地本身亦有唔少法國餐廳。整體感覺悠閒舒服，更配以大大塊透明膠樣做阻隔，既有防疫之效，又唔會太影響餐廳嘅環境觀感。
當然，佢哋都喺賣越南菜，枱上嘅餐具就放上餐碟同筷子啦，而晌昏暗嘅燈光下，枱上小小嘅蠟燭燈，就令氣氛更富情調。
食物方面（餐牌唔喺影得太清楚，見諒），亦有別一貫嘅越南菜，唔喺啲慣常所見嘅法包呀、湯檬、牛油雞翼呀……，比較有種融和法國風嘅菜式。大類可分為烤類、炒類、米紙卷類、小碟及小食類。
另一張喺飲品餐牌，底面兩頁，都喺以酒類飲品為主，亦有少少非酒類飲品供選擇。順帶一提，店內侍應全都喺外藉人士，顧客群亦以外藉人士居多，所以，氣氛比較熾熱。
Mango Juice $68、Grapefruit Juice $58 我倆都揀咗果汁，果汁都喺鮮榨嘅，亦唔會溝其他嘢，所以，入口唔單止喺原汁原味，更喺超濃郁。就以小弟揀嘅芒果汁為例，雖然唔知喺用上邊一款芒果，但果香味濃，極之清甜，加一片蕃石榴片作點綴，自不然加多少少印象分啦。
Hamachi Tartare $168 先登場喺一道「鰤魚他他」，咩喺鰤魚？咪即喺油甘魚囉，哈哈！咪以為就咁切碎啲魚生就喺，睇番餐牌，仲加入好多材料，包括柚子、青瓜粒、青蔥、芫荽，加上酸酸辣辣嘅蕃茄香辣醬汁，所以，無論食味，抑或口感，都豐富而有層次；再者，油甘魚本身油脂夠足，肉質帶點黏，做成他他就已經幾好食。
此外，大廚更將道他他配上黑芝麻米餅，米餅非常之脆口，並充滿芝麻香氣，放上大量他他，別有一番滋味。
Crispy Eggplant $108 第二道屬「小炒」菜式，亦喺是日最討老婆歡心嘅菜式，一來老婆偏素，呢道菜開正佢嗰瓣，二來喺食起嚟茄子嘅口感好有驚喜。其實，單睇賣相，就好似一般小炒咁，一堆雜菜少茄子，平平無奇，但呢道菜絕對喺深藏不露。
啲茄子一入口，堅喺外脆內軟，我哋覺得喺撲咗粉先炸後炒，所以，第一口咬落外層脆脆哋，再細嚼，茄子肉好腍、好嫩滑，而混入九層塔、青蔥、辣椒去炒，非常有香氣。相反，餐牌話有用一啲薑味肉汁，小弟又唔喺好覺。
Wok-fried Clams $208 再嚟亦喺一道「小炒」菜式，店長推介我哋試試，喺因為嚟咗一批好靚嘅托托蜆，曾經都食過一次，不過，應該喺久遠嘅事。店長介紹時，話用上咖喱葉、青惹、蒜頭、辣椒去炒，非常香口惹味，更伴有濱海墊底，喺一道幾有趣嘅菜式。
啲托托蜆非常之大隻，所以，一客都喺得4隻，不過，蜆肉肥大肉口，食落既鮮甜，又確喺好惹味；而底下嘅濱海捲起一卷卷，吸收晒啲醬味，入口軟綿，十分好食。
Ca Phe Sua Pork Ribs $258 最後一道菜式，亦喺店長推介，甚有法國菜風情，卻加有越南菜嘅元素，因為喺以越南咖啡去烤豬肋骨，並沾滿黑白芝麻，更伴有一啲醃蘿蔔，賣相精巧，卻蘊藏心思。
專登配上切肉嘅餐刀，而豬肋骨烤得肉質超鬆化，輕易就切到出嚟，既有咖啡嘅醇香味，又有芝麻嘅香氣，極之惹味，更有啲燶位脆邊嘅效果；配上嘅醃蘿蔔，酸香醒神，正正平衡番豬肋骨嘅重味感。
Che $98 餐廳有甜點供應，詳情可向店員查詢，佢哋建議我哋試試呢一款以西米做底，加入紅火龍果、奇異果、粟米片，再伴上一球椰子雪糕而成嘅甜點，大大碗夠晒我哋二人共享。
先嚐一口椰子雪糕，冰涼而清甜，椰子味好香濃，再以生果、粟米片配雪糕，效果又唔同晒；最底下嘅西米，配生果又得，配雪糕都得，得咗！
餐廳定位都喺中高檔之間，所以，除環境好之外，服務亦好到位、熨貼，店員除好有禮之外，對菜式都好有認識，介紹菜式時都好用心，唯小弟嘅英文喺有限公司，否則，可以同店長有更多互動、更多交流。
個人評分
味道：8/10
環境：8/10
服務：9/10
抵食：7/10
平均每人消費：HK$525
味道：8/10
環境：8/10
服務：9/10
抵食：7/10
平均每人消費：HK$525
餐廳資料：
Le Garçon Saigon
灣仔永豐街12-18號地下
2455 2499
Le Garçon Saigon
灣仔永豐街12-18號地下
2455 2499
沒有留言:
發佈留言