山區裡的走走趯趯: INN - I’m Not Nothing：周末「廠」盪

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2021年4月3日星期六

INN - I’m Not Nothing：周末「廠」盪

一連幾日復活節假，除咗頭兩日有啲zoom聚會之外，無特別搞啲咩活動，因為，相信無得出遠門，晌香港度度地方都會逼滿人。而今日，早上完成zoom之後，出去晌荔枝角公園走走，再行落去荔枝角搵食。行近到D2 Place Two附近時，接過張單張，話喺新餐廳，又有9折，就上去睇睇呢間「INN」（I’m Not Nothing）喺點先。

張單張除講明午餐有9折外，仲可以儲印花，儲滿8個就可以換一客免費午餐，而午餐嘅定價喺$82-$138，都喺我哋打算消費嘅範圍內，加上，本身我哋都無話心水要試邊間，都喺睇啱就幫襯嗰隻。

都好一段日子無嚟「憶利工業中心」搵食，餐廳位處「憶利」二樓，一出電梯就見。無論門口，定室內，裝修得都幾骨子，一室以白為主調，放置咗啲羅馬柱，又擺放唔少植物，掛上細細盞嘅水晶吊燈，整體感覺休閒。而大部份座位都選上藤椅，坐起嚟都幾舒服，只喺稍稍覺得啲位排得有點密。

近入口嘅左邊，即水吧側，仲有一張四人大木枱，可謂自成一角，私隱度更高。

午餐嘅選擇都唔少，由輕怡嘅到重肉感都有，共11款，不過，更正吓佢單張所提及嘅定價，應該喺$88-$138，包餐湯及餐飲，但餐飲只限選$28以下，轉飲其他嘅，就有半價優惠。此外，亦可以加配法式班戟、其他甜點，小弟原本都有打算嗌多個甜點作結，但所揀嘅主菜份量實在比預期大好多，所以，就無再嗌甜點喇。

是日餐湯

今日嘅餐廳喺黑松露忌廉湯，睇外觀都幾真材實料，入口，黑松露嘅香味好突出，而湯中仍然咬到微細嘅野菌粒，略嫌喺個質感滑得嚟帶少少糊糊哋嘅感覺，但整體確喺唔錯嘅。

特色沙律碗 $88

老婆想食清啲，所以，揀咗份沙律碗，餐牌就寫住有牛油果、希臘芝士、藜麥、車厘茄、羽衣甘藍，配以檸檬香醋汁，實際就仲有啲火箭菜、櫻桃蘿蔔，睇起嚟色澤亮麗，非常豐富。無論邊樣食材，老婆都讚夠晒新鮮，希臘芝士提昇咗一入鹹香味，而個檸檬香醋汁亦令到個沙律更加酸香清新，真喺越食越開胃。再者，藜麥、羽衣甘藍都喺啲有營食材，食落叫人更健康。

香燒焗豬肉眼配肉桂蘋果醬 $108

原本打算點香草羊架，可以是日午餐未有供應，可惜！可惜！不過，豬肉眼都好有興趣，尤其配肉桂蘋果醬，喺老婆超鍾意嘅口味。不得了，件豬肉眼勁大件，仲要成吋厚，最緊要喺煎得香脆，而肉質軟腍鬆化；個蘋果醬都好正，除咗帶有濃郁嘅玉桂香之外，仲有大大粒嘅蘋果肉，絕無欺場，其實件豬肉眼本身都唔肥，而配咗蘋果醬，就更添風味。