山區裡的走走趯趯: Iberians：「伊」食無憂

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2021年4月14日星期三

Iberians：「伊」食無憂

原本，舊年嘅四月真喺安排咗一次西班牙之旅，由巴塞隆拿入，玩埋華倫西亞，最後馬德里走，可惜，一場新冠令行程泡湯，雖然依家已有疫苗，但外國仲有不少地方疫情反覆，甚至頗嚴重，所以，真喺唔知幾時先有得飛。尋找番旅行感，當然周六、日周圍行吓，亦參加過本地遊，連Staycation都玩過吓，如果想感受吓西班牙風情，當然要擦番餐西班牙菜。舊年疫情嚴竣，就試過一次外送西班牙菜，今回就同老婆嚟到「Iberians」（伊比利亞人）再次感受一下西班牙菜滋味。

餐廳以深灰作為主調，有一份神秘感，再走進餐廳內，配合牆上嘅壁燈，卻可以幻想一下自己身處西班牙一啲小酒窖之內。地上的拼花階磚，可以說是室內裝修嘅亮點，配以深啡色嘅木枱，帶住一些原始味道，整體而言，又嚟得簡潔。此外，整個地方都頗大，但明顯卻無話用盡每吋空間用嚟擺餐枱，所以，甚具空間感。

未講有啲咩食，就真喺要先講講啲餐具，尤其啲餐碟，無論用餐嘅餐碟，抑或載食物嘅餐碟，都非常之靚，色彩奪目，圖案細緻，而碟邊嘅齒紋唔喺畫上去，真喺有啲凹凸感，似喺人手手工做嘅出品。

餐牌嘅用色如有睇開波嘅人一望就知喺西班牙國旗嘅顏色，紅襯黃，西班牙菜最大賣點就喺西班牙式小食（Tapas），而呢度提供嘅西班牙小食共有18款之多，定價為$48-$138，正所謂豐儉由人。

翻去後頁，就喺晚市所提供嘅菜式，大類分為沙律、意大利麵或飯品、主菜。店員話，由於剛開業不久，暫未有酒牌，如領有酒牌後，會提供不同嘅酒類飲品，以及更多其他嘢飲。而點選意大利麵、飯品、主菜，都會奉送餐飲，雖然叫餐飲，但唔喺一般茶啡，小弟最後就揀咗一杯鮮奶咖啡細嚐。

巴馬火腿配哈密瓜 $78
西班牙食材嘅名物中，伊比利亞黑毛豬火腿喺其中之一，餐廳有提供36個月熟成嘅火腿，但怕老婆未必太接受到，因為都會頗油潤，揀巴馬火腿配哈密瓜就應該啱到佢口味。店員介紹時話火腿喺16個月，但一啲都唔失禮，色澤閃亮富光澤，入口鹹香而帶點油潤，配以哈密瓜嘅天然清甜，果然好夾。伴碟仲有少少青橄欖、黑橄欖，少有哋唔會好鹹喎！

加利西亞鱆魚 $58
以往都食過好幾次以鱆魚為主角嘅西班牙小食，大多數都喺凍食嘅菜式，但今次呢款就改為以半煎炸嘅烹煮方式嘅熱食，並以小鐵鑊為盛載器皿。鱆魚粒入口喺估唔到嘅軟腍，卻不失咬口，而面頭落咗大量新鮮自家製嘅蕃茄蓉，酸香而非常搭配；墊底嘅仲有炸香咗嘅薯仔片，同樣好食。

法包配西班牙紅椒腸、牛肉 $78

小弟食西班牙菜話多唔多，話少亦唔少，但不時見啲西班牙小食都好鍾意用法包入饌，配蟹肉呀、醃白銀魚呀……等等。今次選上呢一款就帕德龍辣椒配西班牙肉腸、西班牙紅甜紅椒蓉配牛肉。做得好精緻，前者辣椒喺唔辣嘅，好爽脆香口，肉腸鹹香惹味；而後暫再墊咗少少焦糖化嘅炒洋蔥，有份香甜感，而西班牙甜紅辣出晒名，喺特別鮮甜，牛肉質感軟滑，配以法包，一口一件，非常好食。

西班牙海鮮炒飯 $398

主食就喺經典嘅西班牙海鮮飯，睇落頗正宗，以「大鑊飯」奉客，面頭放咗唔少海鮮食材，有大蝦，甚至加咗隻深海海螫蝦，夠晒型，此外仲有青口、大蜆、魷魚及較少用上嘅新鮮黃花魚，可謂甚有睇頭。而呢個份量，大概可以預2-3人享用。

各款海鮮料都好正，鮮甜有海水鮮味，食得出用料靚，唔喺咩雪藏貨；而飯底加入蕃紅花、海鮮湯去煮，並混入少少西班牙肉腸，除鮮香之外，更有份鹹香嘅惹味，且入口微微濕潤，飯粒卻好分明，啖啖海鮮精華，的確好好食。

鮮奶咖啡（免費）

上文都提及過點選主菜就會奉送餐飲，揀咗杯鮮奶咖啡，其實，打底都唔會有太高期望，話田呢度喺賣西班牙菜，並非咖啡店，但出奇都有水準。唔止拉花唔失禮，入口咖啡味香醇，而且，口感好均勻，完全唔使攬之下，每口都喺柔滑一致。

西班牙菜除小食有特色之外，其實佢哋嘅甜品都頗有賣點，店家就提供咗6款西班牙甜點喇。

順手，俾埋一套新餐具，用作食甜點，而餐碟喺同一系到，繪上細緻漂亮嘅花紋，實在賞心悅目。

西班牙油條 $48

講到經典，就喺西班牙嘅「油炸鬼」喇，唔嗌就好似若有所失咁。油條新鮮炸起，上枱時仲感到其熱力，入口就非常香脆，裡面就好軟綿，並且一啲油膩感都無，淋上即煮嘅朱古力漿後，就份外美味。

加泰羅尼亞焦糖奶凍 $48

翻睇番自己嘅記錄，好多年前晌西營盤嘅「Chico Chica」錯食過呢一道甜點，當時譯「加泰羅尼亞燉蛋」，確實譯為燉蛋比奶凍貼切，譯奶凍很易讓人聯想到意式奶凍，但實質唔喺嗰回事。講番個甜點，其實個樣本身都似法式燉蛋，面頭嘅焦糖做得既薄且脆，餡心挺身得嚟好軟滑，有蛋香，卻多一份濃濃嘅鮮橙清甜香味，確實唔錯。