不過，講到想更多私隱度，就莫過於廂房喇，店家原來設有幾種廂房，有大有細，啲枱可以分開擺，疫情時守番限聚令，亦可以拍埋一齊，等疫情消失就可以坐埋一齊高興啲，最正喺暫時無最低消費嘛。
落單方面，基本上喺以二維碼網上落單，既可以慢慢撳，又可以睇番落單記錄，乜都清清楚楚，減少不必要誤會。
不過，為免部份人唔識用，或唔想用，佢哋都有實體餐牌。食火鍋最緊要喺湯底同食材，佢哋主打就有呢個尚膳養顏美人鍋、滋補椰子雞鍋、薑母鴨湯鍋，前者就可以配其他湯底作鴛鴦湯底，食材選擇亦非常之多，又可以點啲佐酒小食。
不過，飲品方面就無晌真體餐牌中擺出嚟，所以，晌番佢個網上落單系統上做啲截圖午大家參考吓。
晌落單時見到系統中有一個「本月優惠」，可惜幫襯當日仍未開始，事後向店長查詢，原來每個星期會有一款食材以低過半價推出大特賣，並補多句，4月尾就會推出。之但喺，店長話依家仲有做緊7折（湯底、啤酒類除外），所以，依然抵食。
除收加一股服務費，仲有一項茶芥醬料費，每位收$20，就包咗出面自助區嘅醬料（基本大路嘅醬料都有）同幾款涼拌前菜（蕎頭、毛豆、四季豆）。兼放有一大壺特製檸檬水，點特製，咪加咗啲香葉，飲落喺有啲唔同，最啱食完晒嘢清一清口腔。
杞子圓肉菊花露 $68、汽水 $12支 打邊爐點可以無啲凍飲，平常任飲任食就會點汽水，不過，今次見有啲自家製嘅健康特飲，當然選後者啦。揀咗杞子圓肉菊花露，真喺滿滿嘅一大渣，而且，睇得到裡面有唔少杞子同圓肉，絕無欺場，入口果然甜潤清涼，微微菊花清香，喺最好選擇。
尚膳養顏美人鍋 x 酸菜白肉鍋 $188 最原意喺諗住美人鍋搭椰子雞鍋，可惜，椰子雞鍋同薑母鴨鍋因為喺不作配搭為鴛鴦鍋，所以，揀咗配酸菜白肉鍋，不過，錯有錯着，感覺選呢個仲好，等陣再講。佢哋嘅湯鍋好大份，而且，堅足料。店員教路，佢哋啲湯底唔喺用嚟打邊爐咁簡單，個湯本身已喺一鍋靚湯，所以，先試試啲湯，而之後加番嘅喺專用湯水，並非就咁加水咁行貨。
尚膳養顏美人湯 睇得見嘅竹絲雞已經喺大大隻，而湯內仲有好多藥材，如紅棗、杞子、圓肉、黨參，撈兩撈，更有好多桃膠，點唔滋補養顏吖。個湯飲落真喺好滋味，鮮甜濃香卻唔濁氣，又唔會有太大朕藥材味，恰到好處。
酸菜白肉湯 呢一個湯就跟養顏美人湯好唔同，有一股清新嘅酸香，嗒落酸酸哋，卻有一種醒胃感，好清爽，個人覺得亦好飲。更唔好錯過啲酸菜同白肉，雖然啲白肉睇落好似好肥，但一來切得好薄，二來帶點酸菜嘅酸香，而且，湯內仲有好多寬粉麵，真喺連麵食類都可以慳番。
上文講到揀酸菜白肉鍋喺明智之選，就喺因為呢個鍋內本身已有好多酸菜同薄切腩肉，與此同時，更奉送多一客酸菜白肉，所以，完全可以慳番唔需要點豬肉類及蔬菜類嘅火鍋料，當然，你想試其他豬肉類產品就另議。
手切牛肉（細）$188 同枱唔喺好多食肉獸，加上兩個鍋底，有雞肉、豬肉，所以，就點一客手切牛肉。啲牛肉真喺靚牛嚟，色澤紅潤無話瘀瘀啞啞，油花都好靚、好平均，並且切得厚薄一致、適中。
牛肉一向都唔使灼得太耐，輕灼十多、廿秒已OK，入口口感非常腍滑，既有肉香，又有油香，平衡而好食，正呀喂！
三色滑拼 $128 自家製手打滑有墨魚滑、蝦滑、鯪魚滑，喜歡手打滑嘅客人最好就嗌三拼啦，一次過試晒三款。三款手打滑都搓到大大球，放上蔥花、蟹籽、芫荽做點裝飾，外觀幾亮麗。
手打滑都喺手工嘢，搓到起膠確喺幾費時，試試啲效果先。墨魚滑同蝦滑都超爽彈，前者嘅墨魚味好突出，後者嘅蝦味好鮮，而鯪魚滑食得出加咗陳皮，有點點陳皮幽香。
炸魚皮 $48 點炸魚皮既可以當餐前小食又得，又可以用嚟當火鍋料。就咁食，酥脆惹味，如果飲啤酒嘅客人，用嚟配啤酒更喺天作之合；放湯輕輕灼一灼，軟腍，卻喺另一番風味。
本來都點咗啲海鮮，但店長話佢哋新推出一爐兩食，就咁加個鋼蒸籠，就成為早前頗時興嘅海鮮蒸鍋，等客人打邊爐同時又可以食到海鮮蒸鍋，盡享海鮮本身嘅鮮味。定價喺「海鮮價」，睇當日供應，問過價錢，感覺都OK，加上有七折嘛，又可以斷人頭咁嗌。
所以，一口氣試咗蟶子皇、大元貝、桂花蚌，收得咁嘅價錢，真喺無欺場，淨喺睇啲呎吋已好夠十足，加上啲色澤光亮，新鮮度爆燈。後尾問我哋意見時，先知啲海鮮喺當日晌街市買嘅揀手貨，因為依家疫情生意唔穩定，唔敢訂太多，都喺睇當日嘅訂枱量先到街市預多少，所以，店長話保證新鮮生猛。
桂花蚌 $58/隻 唔講得少啲，蚌有成隻手掌咁大，而且，因為客唔多，全程蒸海鮮有靚姐幫手搞，有晒計時器計住。最貼心喺啲蚌起咗肉，又除掉晒啲內臟，食起嚟時超方便，蚌肉爽彈，味道鮮甜。
大元貝 $48/隻 唔知阿姐喺咪見我瘦底，留隻「好嘢」俾我，雖然我未有膽固醇高嘅問題，但都唔會食得太過火。然而，啲元貝肉同樣好彈牙，好好味。
蟶子皇 $58/隻 足半呎長嘅蟶子皇當然好有睇頭，同樣起咗肉，方便食用，又加咗好多蒜蓉，卻冚唔過蟶子嘅鮮甜味，當然，底下嘅粉絲吸收晒啲海鮮嘅鹹鮮味，唔可以錯過啦。
生果盤（免費） 其實食完兩個鍋底都半飽，加埋啲手切牛肉、手打滑、3款蒸海鮮，真喺好飽吓。臨尾仲送份生果盤嚟，好窩心，而且，唔喺幾粒橙、蘋果，喺有蜜桃、菠蘿、蜜瓜同橙，真喺好有誠意，中間仲有粒乾生果嘅朱古力，絕對喺討晒客人歡心。
食咗成晚，所試嘅食物，無論鍋底，抑或食材，都可以講甚具質素。而服務方便，亦好熨貼，不時幫我哋啲湯底撇走湯面啲雜質，又不時幫忙加湯；食蒸海鮮時，更喺食一款海鮮，換一次餐碟，真喺有種賓至如歸嘅感覺。
個人評分
味道：9/10
環境：7/10
服務：8/10
抵食：8/10
平均每人消費：HK$320
味道：9/10
環境：7/10
服務：8/10
抵食：8/10
平均每人消費：HK$320
餐廳資料：
尚膳養顏滋補鍋 Fancy Hotpot
旺角彌敦道607號新興大廈1樓106-112號舖
3105 0773
尚膳養顏滋補鍋 Fancy Hotpot
旺角彌敦道607號新興大廈1樓106-112號舖
3105 0773
沒有留言:
發佈留言