B.O.T.H. by Texas Burger：「雙」得益彰

趁戲院開番，專登過嚟荃灣廣場睇早場「複製人徐福」，比正價平一截嗎！個故事都幾有深度，探索少少人生問題，而啲特技亦出色。睇完戲，剛好一點，放飯時間，在荃灣廣場搜尋吓，見到有家餐廳「B.O.T.H. by Texas Burger」，因為曾經都幫襯過「Texas Burger」，知道佢哋嘅出品有水準，所以，對呢家新餐廳都有信心。

唔好睇佢門面好似唔喺好大，其實，個鋪位好深，地方極之寬敞、闊落，近窗一邊喺超高樓底，好有空間感，最正當然喺仲有一大排落地大玻璃啦，令到景觀更開揚，只可惜是日陰陰天，如果有陽光射入嚟就更好。

此外， 店內加入好多綠化元素，不同嘅植物隨處見，感覺非常之好。餐廳後邊，有一整幅牆上有一大片彩繪，亦成為打卡熱點。

我哋被安排坐晌餐廳尾挨窗嘅小茶几餐枱位，配以舒服嘅梳化椅，由於喺個角落位，比較自成一角，更感閒逸寧靜！

食物方面，以Brunch、Large、Snack ＆ Sharing、Sweet作為分類，大抵顧名都可思義，不過，要留意供應時間，有啲喺供應到6:00pm，有啲則晚上先供應，有啲就全日供應。食物嘅款式好多元化，而第一版嘅Brunch及Large，都會奉送餐湯或指定飲品，亦可加錢轉配其他食品。

南瓜忌廉湯

小弟揀飲咖啡，老婆就鍾意飲湯。是日餐湯喺南瓜忌廉湯，除加咗少少鮮忌廉，仲放咗條烤野菌，令賣相多添幾分天然味，立時又矜貴咗好多咁。老婆話個湯好掂，因為南瓜味好濃郁，嗰份甜味嚟得自然，而質感細滑柔順。

水煮蛋牛油果吐司 $118

咪以為就咁一件牛油果多士，單喺賣相已睇得出好有心思，其實，牛油果下面墊底嘅仲有啲西班牙辣肉腸、意大利乾蕃茄，配以一款英式嘅酸辣醬，當然睇得見仲有啲沙律菜，並用上特大嘅牛油果，製作好有誠意。

首先，個牛油果夠晒熟，真喺軟滑如牛油。我成日諗，幾時會有餐廳會以厚切牛油果代替鮮牛油嚟做一款健康菠蘿油呢？隻水煮蛋亦做到恰當好處，一篤開啲蛋黃徐徐流下，沾上蛋漿更好味；而黑麥多士咬落外皮香脆，包心有韌勁，亦甚富麥香，喺高質嘅出品。

素食植物牛肉芝士漢堡 $128

老婆揀咗個素漢堡，其實佢之前都食過以植物牛肉做嘅漢堡，第一次食嘅時候覺得好神奇，加上佢偏素，亦都喜歡食漢堡，所以，見到呢度有就好想再試。個漢堡好大份吓，配埋炸薯條及酸青瓜，佢食半個都已經話飽，哈哈，小弟都好耐無做包底王。

植物牛肉唔多介紹喇，因為市面推出咗都好幾年，總之，咬落真喺好有「肉地」，質感同味道都真喺好似食緊真牛肉咁；裡面仲墊有生菜、蕃茄、植物芝士、炸洋蔥圈及特製醬汁，味道非常豐富、滋味。順帶一提，薯條香脆不膩，酸青瓜酸香爽脆。

焦糖鮮奶咖啡 +$25

印象中佢哋嘅奶昔都唔錯，不過，由於打算試試佢哋嘅「奶蓋班戟」，即喺慣常叫開嘅「梳乎厘班戟」，所以，都喺襯番杯焦糖鮮奶咖啡。杯咖啡真喺沖泡得好有水準，先喺朶玫瑰拉花幾唔錯，只喺面面未至最平滑，但入口口感均勻，完全無攪過，每一口都順滑細膩，焦糖嘅香味亦慢慢滲出，伴一小件牛油曲奇，喺加分位。

核果奶蓋班戟 $118

以為就咁奶蓋班戟再加啲堅果粒粒、唧啲忌廉、擺幾片生果就算，實在少覷咗佢哋出品嘅誠意。兩大件奶蓋班戟煎烘得高身大件，淋上吉士忌廉，灑滿唔少核桃粒及杏仁片，並加上煮過嘅桃肉，最後更糝埋唔少玉桂粉，最有心思喺晌表面做咗少少焦糖片，唔止賣相吸睛，令食味更具層次。

俾老婆先試為快，佢第一次食呢一種班戟，誇張少少講，有少少驚為天日嘅感覺。確實，班戟部份真喺做到好鬆軟綿綿，極有蛋香，而襯以堅果、吉士忌廉、玉桂，味道一流，而桃肉又清甜，配上少少堅果、焦糖片，又有另一番滋味。

睇咗一場精彩有深度嘅電影，又食咗一餐美味、環境悠閒嘅午餐，真喺雙得益彰，令心情更開朗。補充多一句，服務方面亦喺睇得出店員嘅誠懇及質素，好似當我哋點餐時，因為點了一客素漢堡，另一客喺牛油果吐司，店員怕我哋喺素食者，略帶提一提吐司裡有少許肉嘅成份，以免引起不必要誤會；此外，同位男店員交流時，因為我咃所坐嘅梳化椅喺較矮，佢亦刻意踎番低少少，等大家晌同一個視平線，喺一份尊重感。

個人評分
味道：9/10
環境：8/10
服務：8/10
抵食：8/10
平均每人消費：HK$215

餐廳資料：
B.O.T.H. by Texas Burger
荃灣大壩街4-30號荃灣廣場3樓337號舖
3705 2955